ပြင်သစ်ဘောလုံးအဖွဲ့ချုပ် (FFF) ဥက္ကဋ္ဌ နိုအဲလီဂရက်က သူဟာ အခုနှစ်ကုန်မှာ စာချုပ်သက်တမ်းကုန်ဆုံးမယ့် ပြင်သစ်နည်းပြ ဒီဒီယာ ဒက်စ်ချမ့်ကို ရာထူးမှာ ဆက်ရှိနေစေလိုတယ်လို့ ကြာသပတေးနေ့မှာ ထုတ်ဝေတဲ့ အင်တာဗျူးတစ်ခုမှာ ပြောပါတယ်။
အသက် ၅၄ နှစ်ရှိပြီဖြစ်တဲ့ ဒက်စ်ချမ့်ဟာ လွန်ခဲ့တဲ့ ၄ နှစ်က ကမ္ဘာ့ဖလားဆွတ်ခူးအောင် ပြင်သစ်ကို ဦးဆောင်ခဲ့ပြီးနောက် တနင်္ဂနွေနေ့က ဗိုလ်လုပွဲမှာတော့ အသင်းက အာဂျင်တီးနားကို ပင်နယ်တီအဆုံးအဖြတ်နဲ့ ရှုံးနိမ့်ခဲ့ပါတယ်။
ပြင်သစ်တို့ ပထမဆုံး ကမ္ဘာ့ဖလားဆွတ်ခူးခဲ့တဲ့ ၁၉၉၈ က အသင်းခေါင်းဆောင် ဒက်စ်ချမ့်ဟာ လာမယ့်အပတ်မှာ သူ့ရဲ့ စာချုပ်သက်တမ်းကို ယူရို ၂၀၂၄ အထိ သက်တမ်းတိုး ဆွေးနွေးဖို့အတွက် အနောက်မြောက်ဘက်ရှိ ဂင်းဂန်မြို့မှာ နိုအဲလီဂရက်နဲ့ တွေ့ဆုံမှာဖြစ်ပါတယ်။
"ကျနော့်အမြင်အရတော့ ကျနော်တို့ ဂင်းဂန်မှာ စာချုပ်ကို ဆွေးနွေးမယ်"လို့ လီဂရက်က Ouest-France သတင်းစာကို ပြောပါတယ်။
"သူ မနေချင်ဘူးဆိုရင်တော့ အချိန်တိုပါလိမ့်မယ်။ ဆက်နေချင်ရင်တော့ နည်းနည်းကြာအောင် ဆွေးနွေးကြရမယ်။
"ဒီဒီယာက သူ့အလုပ်ကို ကောင်းကောင်းလုပ်ခဲ့ပြီးပြီ၊ ကျတို့ သဘောတူညီမှုရလိမ့်မယ်လို့ ကျနော် ထင်တယ်"လို့ သူက ထပ်ပြောပါတယ်။
ပြင်သစ်အသင်းရဲ့ လာမယ့်ပွဲစဉ်ဟာ မတ် ၂၄ ရက်မှာ ယူရို ၂၀၂၄ ခြေစစ်ပွဲအဖြစ် နယ်သာလန်အသင်းနဲ့ ကစားရမှာဖြစ်ပါတယ်။
(AFP)