မတ် ၂၁
ရန်ကုန်တိုင်း၊ ကျောက်တံတားမြို့နယ်၊ မဟာဗန္ဓုလ လမ်းပေါ်ရှိ မြို့တော်ခန်းမရှေ့၌ လွန်ခဲ့သည့် ရက်အနည်းငယ်မှစ၍ သင်္ကြန်ရေကစားမဏ္ဍပ်စတင်ဆောက်လုပ်နေကြောင်း သိရသည်။
"ဆောက်နေတာတော့ နှစ်ရက်၊သုံးရက်ရှိပြီ။ ဒီမနက်ပိုင်းမြင်ခဲ့ရတာကတော့ အယောက် ၂၀ လောက်နဲ့ဆောက်နေတာ။ ကရိန်းကားကြီး တစ်စီးချထားတယ်။ မဏ္ဍပ်ဆောက်ဖို့ ပစ္စည်းတွေလည်း ချထားတယ်။ ပုံစံသိပ်မပေါ်သေးဘူးဆိုပေမယ့် အမြင်မှာတော့ မဏ္ဍပ်မှန်း အရမ်းသိသာနေပြီ။ အဲ့မဏ္ဍပ်အတွက် လုံခြုံရေးသိပ်ယူထားတာတော့မတွေ့ခဲ့ရပါဘူး"ဟု မြို့တော်ခန်းမ(ရန်ကုန်)ရှေ့၌ တည်ဆောက်နေသော ရေကစားမဏ္ဍပ်ကို မျက်မြင်တွေ့ရှိသူတစ်ဦးကပြောသည်။
ထို့အပြင် နေပြည်တော်တွင်လည်း ဧပြီ ၉ ရက်နေ့တွင် ဝန်ကြီးဌာနပေါင်းစုံ သင်္ကြန်ပွဲတော် ဆင်နွှဲရန်ရှိကြောင်း သတင်းအရင်းအမြစ်များထံက တဆင့် သိရသည်။
COVID-19ရောဂါ ကူးစက်ပျံ့ပွားမှုကို လျှော့ချနိုင်စေရန် ၂၀၂၀ ခုနှစ်မှစကာ ရေကစားမဏ္ဍပ်များဆောက်လုပ်ခြင်း၊ ရေကစားခြင်းများကို ထိန်းချုပ်ကန့်သတ်ခဲ့သည်။ ထို့ပြင် လူစုလူဝေး ဖြစ်ပွားနိုင်မည့် စတုဒီသာကျွေးမွေးခြင်းများကို COVID-19 ရောဂါမကူးစက်စေရန် သတ်မှတ် စည်းကမ်းနှင့်အညီ လုပ်ဆောင်ခဲ့ကြသည်။
စစ်အာဏာသိမ်းမှုကြောင့် ၂၀၂၁ ခုနှစ်တွင် ရန်ကုန်အပါအဝင် အခြားမြို့ကြီးများတွင် သင်္ကြန်ရေကစားမှုများမရှိခဲ့သော်လည်း ရခိုင်ပြည်နယ်၊ မွန်ပြည်နယ်နှင့် တနင်္သာရီတိုင်းရှိ အချို့နေရာများတွင် မဏ္ဍပ်ငယ်များ၊ အုန်းလက်မဏ္ဍပ်များထိုးကာ ရေကစားခဲ့ကြကြောင်း ဒေသခံများထံက တစ်ဆင့် သိရှိရသည်။
#သင်္ကြန်ရေကစားမဏ္ဏပ်
#COVID-19