သြဂုတ် ၁၁
ရှမ်းပြည်မြောက်ပိုင်းတွင် အခြေစိုက်သည့် တအာင်း(ပလောင်)အမျိုးသားပါတီ (TNP) သည် နိုဝင်ဘာ ၈ ရက်နေ့တွင်ကျင်းပမည့် အထွေထွေရွေးကောက်ပွဲတွင် ယခင်က ယှဉ်ပြိုင်ခြင်းမရှိသော မြို့နယ်များတွင် အမတ်လောင်းများ ဝင်ရောက်ယှဉ်ပြိုင်သွားမည်ဖြစ်သည်။
ရှမ်းပြည်နယ်တောင်ပိုင်း မိုင်းကိုင်မြို့နယ်တွင် ပြည်နယ်လွှတ်တော် ၂ နေရာ ပြည်သူ့လွှတ်တော် ၁ နေရာ ဖြင့် ပထမဆုံးအကြိမ် ဝင်ရောက်ယှဉ်ပြိုင်သွားမည်ဖြစ်သည်။
တအာင်း(ပလောင်)အမျိုးသားပါတီ(TNP) ဗဟိုအထွေအထွေအတွင်းရေးမှူး ဦးမိုင်းအုဏ်းခိုင်က “အဲ့ဒီဘက်မှာ ပလောင်တွေများလို့ဝင်ပြိုင်တာတော့ဟုတ်တယ် ဒါပေမယ့် ကျွန်တော်တို့အားနည်းချက်က လမ်းပန်းဆက်သွယ် ရေးလဲမကောင်းဘူးပြီးတော့ အဲ့ဘက်မှာတော်တော်များများအိမ်ထောင်စုတွေမရှိကြဘူးလေ တစ်ချို့ကျတော့ မဲဘယ်လိုပေးရတာတောင်မသိကြဘူး” ဟုဆိုသည်။
တအာင်း(ပလောင်)အမျိုးသားပါတီမှ မြို့နယ် (၁၀)မြို့နယ်ကို အခြေခံကာ အမျိုးသားလွှတ်တော်ကိုယ်စားလှယ်လောင်းများ၊ ပြည်သူ့လွှတ်တော်ကိုယ်စားလှယ်လောင်းများနှင့် ပြည်နယ်/တိုင်းဒေသကြီးလွှတ်တော်ကိုယ်စားလှယ်လောင်းများ စုစုပေါင်း (၃၆)ဦး ဝင်ရောက်အရွေးခံ ယှဉ်ပြိုင်သွားမည် ဖြစ်သည်။
ရှမ်းပြည်နယ်တစ်ပြည်လုံးတွင် အမျိုးသားလွတ်တော်ကိုယ်စားလှယ်လောင်း ၆ဦး ၊ ပြည်သူ့လွတ်တော်ကိုယ်စားလှယ်လောင်း ၁၀ဦးနဲ့ ပြည်နယ်/တိုင်းဒေသကြီးလွတ်တော်ကိုယ်စားလှယ်လောင်း ၂၀ဦးတို့ဝင်ရောက်ယှဉ်ပြိုင်ကြမည်ဖြစ်သည်။
“ တအာင်းပလောင်အမျိုးသားကိုအခြေခံတဲ့အခါကျတော့ တအာင်းပါတီဆိုလဲ တစ်ပါတီပဲရှိတယ်။မဲကလည်းတအာင်းဆီမှာပဲရှိတယ်ဆိုတဲ့ ယုံကြည်ချက်ရှိတယ်''ဟု မိုင်းအုဏ်းခိုင်ကဆိုသည်။
ကိုယ်စားလှယ်လောင်းများအား အမျိုးသမီးပါဝင်မှုနှုန်းမှာ ၂၅ ရာခိုင်နှုန်း၊ ၃၅ နှစ်အောက် လူငယ် ၂၅ ရာခိုင်နှုန်း ၃၅ နှစ်အထက်ကို ၅၀ ရာခိုင်နှန်းထည့်သွင်းရွေးချယ်ထားသည်။
၂၀၁၅ ရွေးကောက်ပွဲတွင် လွှတ်တော်ကိုယ်စားလှယ် ၁၂ဦးအနိုင်ရရှိပြီး တစ်နိုင်ငံလုံးအတိုင်းအတာဖြင့် ဆိုရသော် အနိုင်ရရှိခဲ့သည့် ပါတီများထဲတွင် တအာင်းပလောင်အမျိုးသားပါတီ(TNP)ဟာ အဆင့်ငါးနေရာမှာ ရှိခဲ့သည်။
