နေပြည်တော် (မဇ္ဈိမ) ။ ။ တပ်မတော်အရာရှိများဖြစ်သည့် ဗိုလ်မှူး၊ ဒုတိယဗိုလ်မှူးကြီ၊ ဗိုလ်ကြီး အစရှိသူ ၁၄ဦးကို ကျန်းမာရေးဝန်ကြီး ဌာနတွင် ပြောင်းရွှေ့ခန့်အပ်ထားပြီးဖြစ်ကာ ၎င်းတို့ကို ဆက်လက်ထားရှိမည်ဟု ကျန်းမာရေးဝန်ကြီးဌာန၊ ဒုတိယအမြဲတမ်းအတွင်းဝန်ဖြစ်သူ ဦးစိန်ဝင်းက ဩဂုတ် ၁၁ညပိုင်းတွင် သတင်းထောက်များကို ပြောသည်။
“ခေါ်ပြီးသားလူကတော့ ကျွန်တော်တို့က တာဝန်ပေးရမှာပဲ” ဟု ဦးစိန်ဝင်းက ပြောသည်။
ခန့်အပ်ပြီးသူ တပ်မတော်အရာရှိ အမျိုးသား ၁၄ဦးအနက် ကုသရေးအတွက် ၉ဦးနှင့် ၅ဦးမှာမူ အုပ်ချုပ်ရေးပိုင်းအတွက် ခန့်အပ်ထားခြင်းဖြစ်ပြီး “ဒီလူတွေလည်း အပြစ်နဲ့လာတာမဟုတ်ပါဘူး။ ကျွန်တော်တို့ဆီကို လာချင်သပလို့ အဆိုပြုလာတဲ့အတွက်” ဟု ၎င်းက ဆိုသည်။
တပ်မတော်အရာရှိ ၁၄ဦးကို ကျန်းမာရေးဝန်ကြီးဌာနတွင် လက်ထောက်ဆရာဝန်၊ လက်ထောက်ညွှန်ကြားရေးမှူး၊ ဦးစီးအရာရှိ(အုပ်ချုပ်ရေး)နှင့် ဒုတိယညွှန်ကြားရေးမှူး စသည့် တာဝန်များအား ဇူလိုင် တတိယပတ်ကစပြီး တာဝန်ပေးထားခြင်းဖြစ်သည်။
အဆိုပါ တပ်မတော်အရာရှိများအား ကျန်းမာရေးဝန်ကြီးဌာနတွင် ခန့်အပ်ထားမှုအပေါ် ပြည်သူ့လွှတ်တော်၏ အတိုက်အခံအမတ် ဒေါ်ခင်စန်းလှိုင်က “အစိုးရဝန်ကြီးဌာနတွေရဲ့အပေါ်မှာ တပ်မတော်ရဲ့ ဩဇာအာဏာ လွှမ်းမိုးလာတဲ့ကိစ္စတွေဟာ ဒါဟာ တော်တော့ကို ကြည့်မကောင်းတဲ့ ကိစ္စတွေပေါ့” ဟု မှတ်ချက်ပြုသည်။
ခန့်အပ်ပြီးသား တပ်မတော်အရာရှိများကို ကျန်းမာရေးဝန်ကြီးဌာနတွင် ဆက်လက်ထားရှိမည် ဖြစ်သော်လည်း ထပ်မံခန့်အပ်ရန် ရပ်ဆိုင်းထားမည်ဟု ဦးစိန်ဝင်းက ပြောသည်။
သို့သော် မည်သည့်အတွက်ကြောင့် ရပ်ဆိုင်းလိုက်သည်ကိုမူ သတင်းထောက်များက အကြိမ်ကြိမ်မေးမြန်းခဲ့သော်လည်း ရှင်းရှင်းလင်းလင်းဖြေကြားခြင်း မရှိပေ။
တပ်မတော်အရာရှိများအား ကျန်းမာရေးဝန်ကြီးဌာနတွင် ပြောင်းရွှေ့ခန့်ထားရန် စီစဉ်နေမှုအပေါ် ကန့်ကွက်သည့်အနေဖြင့် ဆေးရုံကြီးအချို့တွင် ဆရာဝန်များက အနက်ရောင်ဖဲကြိုးလှုပ်ရှားမှုများ ပြုလုပ်ပြီးနော က် အဆိုပါ အစီအစဉ်ကို ရပ်ဆိုင်းလိုက်ခြင်းလည်းဖြစ်သည်။
“အလွှာပေါင်းစုံ၊ ဘက်ပေါင်းစုံက အဆင်ပြေအောင်ဆိုတဲ့ရည်ရွယ်ချက်နဲ့ အလွှာလေးတွေနဲ့ တာဝန်ပေးဖို့ဆိုပြီးတော့ လူကြီးများက တာဝန်ပေးတာပါ။ တစ်ကယ်တမ်းကျတော့ ဘာရည်ရွယ်ချက်မှ မရှိဘူး” ဟု ဦးစိန်ဝင်းက ဆိုသည်။
တပ်မတော်အရာရှိများအား ကျန်းမာရေးဝန်ကြီးဌာနတွင် ခန့်အပ်တာဝန်ပေးရန် စီစဉ်မှုအပေါ် ကန့်ကွက်သည့်အနေဖြင့် အစိုးရရုံးစိုက်ရာ နေပြည်တော်ရှိ ခုတင် ၁၀၀၀ဆံ့ ဆေးရုံရှိ ဆရာဝန်အချို့ကလည်း အနက်ရောင်ဖဲကြိုးရင်ထိုးတပ်ဆင်ကာ လှုပ်ရှားခဲ့ကြသည်။
"ကျွန်တော်တို့ကတော့ ဒါကို မကျေနပ်ဘူးပေါ့" ဟု ကန့်ကွက်လှုပ်ရှားခဲ့သည့် အမည်မဖော်လိုသူ ဆရာဝန်တစ်ဦးက မဇ္ဈိမကို ပြောသည်။
