တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ရခိုင်ပြည်နယ်သို့ ရောက်ရှိစဉ်အတွင်း ဘာသာရေးနှင့်ပတ်သက်သော အစွန်းရောက်သဘောထားအမြင်များ ဖော်ပြခြင်းကို ရှောင်ရှားကြရန် စစ်မှုထမ်းများအား သတိပေးလိုက်သည်။
ရေဘေးဒုက္ခသည်များ ကယ်ဆယ်ရေးနှင့် ပြန်လည်ထူထောင်ရေးလုပ်ငန်းစဉ်အတွင်း ဇူလိုင် ၁၃ ရက် ရခိုင်ခရီးစဉ်တွင် ဗိုလ်ချုပ်မှူးကြီးမင်းအောင်လှိုင်က ဌာနဆိုင်ရာတာဝန်ရှိသူများ၊ တပ်မတော်သားများနှင့် မိသားစုဝင်များနှင့် စစ်တွေမြို့၌ တွေ့ဆုံစဉ် အစွန်းရောက်ဝါဒအား ရှောင်ရှားရန် အလေးထားပြောသွားခြင်းဖြစ်သည်။
"ကိုယ့် ကိုးကွယ်ရာဘာသာနဲ့ ယဉ်ကျေးမှုအတွက် အစွန်းရောက်ခြင်းမရှိစေရဘဲ ဘယ်သူမဆို တရားမျှတစွာ ကာကွယ်သွားနိုင်ရမှာဖြစ်တယ်။"ဟု ဗိုလ်ချုပ်မှူးကြီး၏ ပြောဆိုချက်ကို ဇူလိုင် ၁၃ ရက်တွင် ကာကွယ်ရေးဦးစီးချုပ်ရုံး၏ ထုတ်ပြန်ချက်၌ ဖော်ပြထားသည်။
မြန်မာနိုင်ငံတွင် လူဦးရေ ၅၂သန်းကျော် ရှိရာ ၈၇ ရာခိုင်နှုန်းမှာ ဗုဒ္ဓဘာသာကိုးကွယ်ပြီး ကျန် ၁၃ရာခိုင်နှုန်းအနက် ခရစ်ယာန် ၆ ရာခိုင်နှုန်း၊ အစ္စလာမ် ၄ရာခိုင်နှုန်း နှင့် အခြားကိုးကွယ်မှု အနည်းငယ်ရှိရာ မည်သူမဆို မိမိဘာသာ၊ သာသနာ၊ ယဉ်ကျေးမှုကို အစွန်းမရောက်သော လုပ်ဆောင်မှုဖြင့် ထိန်းသိမ်းစောင့်ရှောက်ကာကွယ်ရန်လည်း ၎င်းက တိုက်တွန်းခဲ့သည်။
