သာယာဝတီ၊ ဒီဇင်ဘာ ၈ ။ ။ လက်ပံတန်းမြို့နယ်တွင် ပညာရေးဥပဒေအတွက် တိုက်ပွဲဝင် ဆန္ဒထုတ်ဖော်မှုကြောင့် အကြမ်းဖက်ဖြိုခွဲခံခဲ့ရကာ ဖမ်းဆီးခံရသည့် ကျာင်းသားများသည် အစိုးရသစ်လက်ထက်တွင်လည်း ပညာရေးမူကြမ်းကို တောင်းဆိုထားသည့် ပုံစံအတိုင်း မရရှိပါက ဆက်လက် တောင်းဆိုသွားမည်ဟု သပိတ်မှောက်ကျောင်းသားတစ်ဦးဖြစ်သည့် ဗကသ အတွင်းရေးမှူး ကိုမင်းသွေးသစ်က ပြောသည်။
"အခုအနိုင်ရရှိတဲ့ NLD အဖွဲ့ချုပ်ရဲ့ကြေညာစာတမ်းမှာပါတဲ့ အကောင်အထည်ဖော်မယ်ဆိုတဲ့ ပညာရေးနဲ့ ပတ်သက်တဲ့ ဆောင်ရွက်မယ်ဆိုတဲ့ ပေါ်လစီကို ကျွန်တော်တို့ သဘောကျပါတယ်။ ဒီပုံစံအတိုင်း ဆက်ပြီး အကောင်အထည်ဖော်သွားမယ်ဆိုရင် ကျွန်တော်တို့က ပိုပြီးတော့ မြန်မြန်ဆောင်ရွက်နိုင်အောင် နောင်လာမည့် အစိုးရနဲ့ ပူးပေါင်းဆောင်ရွက်သွားဖို့ ရှိပါတယ်။"ဟု ကိုမင်းသွေးသစ်က ပြောသည်။
ထို့ပြင် အစိုးရအား ကန့်လန့်တိုက်ကာ အမြဲတစေ ဆန္ဒပြတောင်းဆိုနေခြင်းမဟုတ်ဘဲ နိုင်ငံကို ပညာတက်ဖြစ်စေချင်သည့် အတွက် တောင်းဆိုနေရခြင်း ဖြစ်ကြောင်း ထို့အတွက် စေတနာအရင်းခံတူပါကလည်း ပဋိပက္ခများ ဖြစ်လာစရာမရှိကြောင်း ကိုမင်းသွေးသစ်က ပြောကြားခဲ့သည်။
"ကျွန်တော်တို့ကတော့ ပညာရေးမူကြမ်းကို မရမချင်း ဆက်လက် တောင်းဆိုသွားမှာပါ။ အရင်အစိုးရလင်ထက်မှာလည်း ကျွန်တော်တို့က တွေ့ဆုံဆွေးနွေးရေးကို တောင်းခဲ့တယ်။ တွေ့ဆုံဆွေးနွေးရေးမရခဲ့လို့သာ ကျွန်တော်တို့က သပိတ်မှောက်ခဲ့တာပါ။ ဒီအစိုးရမှာလည်း တွေ့ဆုံဆွေးနွေးရေးကို အရင်တောင်းမှာပါ" ဟု ကိုမင်းသွေးသစ်က ပြောသည်။
ပညာရေးဥပဒေကို လွှတ်တော်မှာ ပြဌာန်းနိုင်ဖို့ တစ်နိုင်ငံလုံးက ကျောင်းသားတွေစုပြီး နိုင်ငံအနှံ့ ဆန္ဒထုတ်ဖော်ခဲ့ရာမှ မတ်လ ၁၀ ရက်တွင် သာယာဝတီခရိုင် လက်ပံတန်းမြို့နယ်တွင် အကြမ်းဖက်ဖြိုးခွဲခံခဲ့ရပြီး ကျောင်းသားတွေကို သာယာဝတီအကျဉ်းထောင်၌ ဖမ်းဆီးအကျဉ်းချခဲ့ခြင်းဖြစ်သည်။ ဖမ်းဆီးခံ ကျောင်းသားများကို ဒီဇင်ဘာ ၈ ရက်တွင် ၂၉ ကြိမ်မြောက် ရုံးထုတ်စစ်ဆေးခဲ့ပြီး ဒီဇင်ဘာလ ၁၅ ရက်တွင်လည်း ပြန်လည် စစ်ဆေးမည် ဖြစ်သည်။