ရန်ကုန်၊ ဧပြီလ ၁ဝ ။                ။ ထိုင်းနိုင်ငံ၊ အမြန်လမ်းမကြီး၊ မိုင်တိုင်အမှတ် ၆၈ အနီးတွင် မြန်မာအလုပ်သမားများ လိုက်ပါလာသည့် ကား တစ်စီး တိမ်းမှောက်ခဲ့ရာ အမျိုးသမီး ၆ ဦး သေဆုံးခဲ့ပြီး ၁၂ ဦး အပြင်းအထန်ဒဏ်ရာရရှိခဲ့ကြောင်း နိုင်ငံခြားရေးဝန်ကြီးဌာနမှ ယနေ့ ဧပြီလ ၁ဝ ရက်တွင် သတင်းထုတ်ပြန်သည်။

ထိုင်းနိုင်ငံတွင် အလုပ်လုပ်ကိုင်ရန်အတွက် မြန်မာအလုပ်သမား ကျား ၂ဝ ၊ မ ၁၈ဝ ၊ စုစုပေါင်း ဦးရေ ၂ဝဝ တို့မှာ ဧပြီလ ၉ ရက်၊ ည ၁၁ နာရီအချိန်ခန့်တွင် ကား ၄ စီးဖြင့် မဲဆောက်မြို့မှ ချာချင်ဆောင်မြို့သို့ ထွက်ခွာ ခဲ့ခြင်းဖြစ်သည်။

ထိုသို့ ထွက်ခွာလာစဉ် အမျိုးသမီး ၅၁ ဦး လိုက်ပါလာသည့် ကားမှာ မိုင်တိုင်အမှတ် ၆၈ အနီးတွင် ကားဘီး ပေါက်ကာ တိမ်းမှောက်ခဲ့ခြင်းဖြစ်ပြီး ၆ ဦးသေဆုံးခဲ့ကာ ၁၂ ဦးအပြင်းအထန် ဒဏ်ရာရရှိခဲ့သည်။ ယင်းအနက်  ၅ ဦးမှာ အသက်အန္တရာယ် စိုးရိမ်ရသည့် အခြေအနေရှိကြောင်း သိရသည်။

ကျန် ၃၃ ဦးမှာ အနည်းငယ် ထိခိုက်ဒဏ်ရာရရှိခဲ့ပြီး ၎င်းတို့ကို Tak ခရိုင်ဆေးရုံသို့ ပို့ဆောင်ဆေး ကု ပေးနေကြောင်း သိရသည်။

အဆိုပါ မြန်မာအလုပ်သမားများမှာ ထိုင်းနိုင်ငံ၊ ဗန်ကောက်မြို့အနီး Chachoengsao မြို့ရှိ Sukhonavason Co., Ltd. ရှိ ကွန်ပျူတာ၊ လျှပ်စစ်အပိုပစ္စည်းများ ဖြုတ်သည့် စက်ရုံသို့ အလုပ်သွားရောက်လုပ်ကိုင်ရန်အတွက် Golden Royal Mandalay Co., Ltd. မှတစ်ဆင့် စေလွှတ်ခဲ့သည့် MoU အလုပ်သမားများ ဖြစ်ကြောင်း သိရသည်။

အဆိုပါ အခင်းဖြစ်ပွားရာနေရာသို့ မြန်မာအလုပ်သမားသံအရာရှိရုံးမှ သံအရာရှိ ဦးအောင်ခင်မြင့်နှင့် ဦးနိုင်မင်း သူတို့က သွားရောက်ကာ သက်ဆိုင်ရာဒေသအာဏာပိုင်များနှင့်အတူ လိုအပ်သည့် ကူညီပံ့ပိုးမှုများ ဆောင်ရွက် ပေးနေကြောင်း သိရသည်။

ပြီးခဲ့သည့် မတ်လ ၃ဝ ရက်နေ့ကလည်း ထိုင်း-မြန်မာနယ်စပ် မဲဆောက်မြို့မှ ဘန်ကောက်မြို့သို့အသွား မြန်မာ အလုပ်သမား ၄၇ ဦး လိုက်ပါလာသည့် မော်တော်ယာဉ်သည် မဲဆောက်မြို့ အထွက် တောင်ဆင်းလမ်းတွင် မီးလောင်ကျွမ်းခဲ့ပြီး မြန်မာအလုပ်သမား အမျိုးသား ၂ ဦး၊ အမျိုးသမီး ၁၈ ဦး၊ စုစုပေါင်း မြန်မာအလုပ်သမား၂၀ မီးလောင်သေဆုံးခဲ့သည်။

ထို့ပြင် ပြီးခဲ့သည့်နှစ် နိုဝင်ဘာလအတွင်းက မဲဆောက်မှဘန်ကောက်အသွားလမ်းတွင် မြန်မာ အလုပ်သမား များပါသော ဗင်ကားနှင့် ၁၀ ဘီးထရက်ကားဝင်တိုက်ခဲ့ပြီး ကားမီးလောင်ကျွမ်းမှုကြောင့် မြန်မာ ၁၃ ဦး သေဆုံးခဲ့သည်။

ထိုင်းနိုင်ငံမှ ကားလမ်းများသည် အဓိကလုံခြံုရေးစံများ နည်းပါးခြင်းနှင့် ဥပဒေသက်ရောက်မှုလည်း ချွတ်ယွင်း ချက်ရှိခြင်းတို့ကြောင့်  ကမ္ဘာပေါ်တွင် ဒုတိယ လူသေဆုံးမှုအများဆုံးဖြစ်ကြောင်း ကမ္ဘာ့ကျန်းမာရေးအဖွဲ့ကြီး WHO ၏ တိုင်းတာချက်အရသိရသည်။

ကုလသမဂ္ဂ၏ ကျန်းမာရေးအေဂျင်စီဖြစ်သည့် WHO ၏ ၂၀၁၅ ကမ္ဘာ့မော်တော်ကားလမ်းများ လုံခြံုရေး အစီရင် ခံစာတွင် ထိုင်းနိုင်ငံက ကားလမ်းများနှင့် အဝေးပြေးကာလမ်းများတွင် ၂၀၁၂ ခုနှစ်အတွင်းက ယာဉ်မတော် တဆမှုများကြောင့် သေဆုံးသူဦးရေသည် ၁၄၀၅၉ ရှိကြောင်း၊ ရာနှုန်းချကြည့်လျှင် လူတစ်သိန်းလျှင် ၃၆ ဒသမ ၂ ဦးနှုန်းရှိရာ  အလားတူနှစ်အတွင်း တစ်သိန်းလျှင် ရ၃ ဒသမ ၄ ဦးနှုန်းရှိသည့် စစ်ဖြစ်နေသည့် လစ်ဗျားက သေဆုံးမှုနှုန်းကသာလျှင် ထိုင်းနိုင်ငံထက် သေဆုံးမှု များနေခြင်းဖြစ်ကြောင်း ဖော်ပြထားသည်။