စစ်တွေ၊ စက်တင်ဘာလ ၂၂ ရက်။ ။ ပြီးခဲ့သည့် စက်တင်ဘာလ ၂၀ ရက်နေ့ ညနေပိုင်းတွင် စစ်တွေမြို့ဆတ်ရိုးကျဆိပ်ကမ်း တွင် ICRC ကယ်ဆယ်ရေးပစ္စည်းများကို တင်ဆောင်နေသည့် ဘုတ်ကို လူစုလူဝေးဖြင့် ဟန့်တားရာတွင် ပါဝင်သည့် အရပ် သား ၉ ဦးကို ပုဒ်မ ၆ ခုဖြင့် အမှုဖွင့်ထားကြောင်း သိရသည်။
အဆိုပါ ပါဝင်သူ အရပ်သား (၉) ဦးကို ပုဒ်မ ၆ ခုဖြင့် တရားစွဲဆိုထားရာတွင် ရာဇသတ်ပုဒ်မ ၁၄၃ ပုဒ်မ၊ ၁၄၄ ပုဒ်မ၊ ၁၄၅ ပုဒ်မ၊ ၄၃၈ ပုဒ်မ၊ ၄၄၀ ပုဒ်မ၊ ၁၁၄ ပုဒ်မတို့ဖြင့် အမှုဖွင့်ထားကြောင်း စစ်တွေမြို့ အမှတ် (၂) ရဲစခန်းမှ စခန်းမှူး ဦးကျော်မိုး က RiA သို့ ပြောသည်။
“ကျွန်တော်တို့ အဲလူ ၉ ဦးကို တရားဥပဒေအရ ပုဒ်မ ၆ ခုနှင့် မနေ့က အမှုဖွင့်ထားပါတယ်။ အဲဒီနေ့က အခြေနေတွေ ဆိုးပါတယ်။ မြို့ရွာဆူပူအောင်လုပ်တယ်။ နောက်ပြီး ရဲတပ်သားတွေကို တုတ်၊ ဓါး၊ ဂျင်ကလိတွေနဲ့ လူအုပ်ထဲက ပစ်ပေါက်တဲ့အတွက် ပါဝင်သူတွေကို ဖမ်းဆီးလိုက်တာပါ။”ဟု ရဲအုပ် ကျော်မိုးက ဆိုသည်။
အဆိုပါဖြစ်စဉ်တွင် ပါဝင်သူ ၉ ဦးကို အခင်းဖြစ်ပွားချိန် ယင်းညဉ့်ကတည်းက အာဏာပိုင်များက စစ်တွေမြို့ အမှတ်(၁) စခန်းတွင် ဖမ်းဆီးထိန်းသိမ်းထားလိုက်ခြင်းဖြစ်ပြီး စက်တင်ဘာလ ၂၁ ရက်နေ့တွင် ပုဒ်မ ၆ ခုဖြင့် မြို့မရဲစခန်းတွင် အမှုဖွင့်လိုက်ခြင်း ဖြစ်ကြောင်းလည်း သိရသည်။
အဆိုပါ ဘုတ်ပေါ်တွင် တင်ဆောင်နေသည့် ICRC ကယ်ဆယ်ရေးပစ္စည်းများကို အစိုးရအနေဖြင့် ပြည်သူများအပေါ် ပွင့်လင်းမြင်သာအောင် ဖွင့်ပြစစ်ဆေးခြင်းများမပြုလုပ်ဘဲ လူစုလူဝေးများဖြစ်ပေါ်လာအောင် လုပ်ဆောင်ခြင်းသာဖြစ်၍ အရပ်သားများက အကြမ်းဖက်မှုလုပ်ရပ်များဖြစ်ပေါ်လာအောင် ဖန်တီး လုပ်ဆောင်ခြင်းသာဖြစ်ကြောင်း ရခိုင့်အလင်းတံခါး တက်ကြွလှုပ်ရှားသူ အဖွဲ့ ဥက္ကဋ္ဌ ဒေါ်ကျော့စိန်က သုံးသပ်ပြောဆိုသည်။
