ထိုင်းနိုင်ငံ တာ့ခ်ခရိုင် မဲဆောက် နယ်စပ် ဧရိယာတွင် နိုဝင်ဘာ ၂ ရက်နှင့် ၄ ရက်အထိ သုံးရက်အတွင်း မြန်မာရွှေ့ပြောင်းလုပ်သား ၁၃ ဦး ထိုင်းအာဏာပိုင်တို့၏ ဖမ်းဆီးထိန်းသိမ်းခြင်းကို ခံခဲ့ရသည်။

နိုဝင်ဘာ ၂ ရက်တွင် မဲဆောက်ရှိ ဗျူတီဆလွန်း သုံးခုကို ထိုင်းအာဏာပိုင်တို့ ဝင်ရောက်စစ်ဆေးခဲ့ချိန် တရားမဝင် မြန်မာရွှေ့ပြောင်းအလုပ်သမား ငါးဦး ဖမ်းဆီးခံရကြောင်း မဲဆောက်ရှိ မြန်မာအသိုင်းအဝိုင်းထံမှ သိရသည်။

မဲဆောက်ရှိ အခြားသော နေရာများကို အာဏာပိုင်များက စစ်ဆေးခဲ့ချိန် နိုဝင်ဘာ ၃ ရက်တွင် နောက်ထပ် မြန်မာရွှေ့ပြောင်းအလုပ်သမား သုံးဦးနှင့် နိုဝင်ဘာ ၄ ရက်တွင် နောက်ထပ် ငါးဦးတို့ ထပ်မံ ဖမ်းဆီးထိန်းသိမ်းခံရသည်။

ဖမ်းဆီးခံရသူ ၁၃ ဦးစလုံးသည် ခွင့်ပြုချက်မရှိဘဲ တရားမဝင် အလုပ်လုပ်ကိုင်နေကြသည်ဟု စွပ်စွဲခံရသည်။ ၎င်းတို့သည် လက်ရှိတွင် မဲဆောက်ရဲစခန်းတွင် ထိန်းသိမ်းခံထားရပြီး ဥပဒေဆိုင်ရာ အရေးယူမှုများကို ရင်ဆိုင်ရမည် ဖြစ်သည်။

“ဒီမှာက မြန်မာတွေ အများကြီး အလုပ်လုပ်နေကြတယ်။ ကျွန်တော်တို့ သတိထားရပါမယ်။ ထိုင်းလူမျိုးတွေအပေါ် ဆန့်ကျင် ထိခိုက်စေတဲ့ လုပ်ရပ်တခုခုက ရဲကို တိုင်တန်းတာတွေဖြစ်နိုင်ပြီး နောက်ဆက်တွဲ အဖမ်းခံရတာအထိ ဖြစ်နိုင်တယ်” ဟု မဲဆောက်တွင် နေထိုင်သည့် မြန်မာတဦးက ပြောသည်။

ထိုင်းတွင် မြန်မာ၊ ကမ္ဘောဒီးယားနှင့် လာအို ကဲ့သို့ နိုင်ငံများမှ နိုင်ငံခြား ရွှေ့ပြောင်းလုပ်သားများသည် ၎င်းတို့ အလုပ်လုပ်ကိုင်နိုင်သည့် လုပ်ငန်းနယ်ပယ်များတွင် တားမြစ်ကန့်သတ်ခံထားရမှုများ ရှိသည်။ 

၎င်းတို့ လုပ်ကိုင်ခွင့်မရှိသည့် တားမြစ်ပိတ်ပင်ခံထားရသည့် အလုပ်အကိုင်များထဲတွင် လက်လီဆိုင်များနှင့် ဗျူတီဆလွန်းများတွင် အလုပ်လုပ်ခြင်းနှင့် တက္ကစီမောင်းသမားများနှင့် ပွဲစားအလုပ်များတို့ ပါဝင်သည်။

ထိုင်းဥပဒေအောက်တွင် အဆိုပါ ပိတ်ပင်ထားသည့် အလုပ်အကိုင်နေရာများတွင် အလုပ်လုပ်နေသည်ကို တွေ့ရှိသည့် ရွှေ့ပြောင်းလုပ်သားများအနေဖြင့် အများဆုံး‌ ထောင်ဒဏ် တနှစ် နှင့်/သို့ ဒဏ်ငွေ ဘတ် ၅၀,၀၀၀ (ဒေါ်လာ ၁,၄၀၈ ခန့်) မှ ဘတ် ၂၀၀,၀၀၀ (ဒေါ်လာ ၅,၆၃၀) အထိ ဒဏ်ကြေးများ ပါဝင်နိုင်သည့် ပြစ်ဒဏ်များကို ရင်ဆိုင်ရနိုင်သည်။ ထို့ပြင် ၎င်းတို့သည် အလုပ်ပါမစ်များ သုံးနှစ်အထိ ဆိုင်းငံ့ခံရနိုင်သလို နိုင်ငံမှ နှင်ထုတ်ခံရနိုင်သည်။

ထိုင်းအလုပ်သမားများကို အကာအကွယ်ပေးရန်အတွက် နိုင်ငံခြားရွှေ့ပြောင်းလုပ်သားများ လုပ်ကိုင်နိုင်သည့် လုပ်ငန်းများကို ကန့်သတ်ခြင်း ဖြစ်ကြောင်း ထိုင်းအာဏာပိုင်များက ပြောသည်။