အောက်တိုဘာလ ၂၉ ရက်
စစ်ကိုင်းတိုင်း၊ ယင်းမာပင်မြို့နယ် အရှေ့ခြမ်းနှင့် ဆားလင်းကြီးမြို့နယ် မြောက်ခြမ်းရှိ ကျေးရွာများစုပေါင်း၍ ပြီးခဲ့သည့် အောက်တို့ဘာ ၂၇ ရက်နေ့က စစ်အာဏာရှင်ဆန့်ကျင်ရေး ရွာပေါင်းစုံသပိတ် စစ်ကြောင်း၏ ၅၉၅ ရက်မြောက်နေ့ အဖြစ် ဆက်လက်ချီတက် ဆန္ဒပြသည်။
လူထုသပိတ်စစ်ကြောင်းသည် ကချင်ပြည်နယ်တွင် စစ်ကောင်စီ၏ လေကြောင်းမှ ဗုံးကြဲတိုက်ခိုက်ခဲ့မှုကြောင့် ကျဆုံးခဲ့သူများအတွက် “ဖားကန့် - အနန့်ပါအတွက် ဝမ်းနည်းမှုကို တော်လှန်ရေးခွန်အားအဖြစ် အရှိန်မြှင့်ကြ” စာတမ်းကိုင်ဆွဲ၍ စစ်အာဏာရှင် ဆန့်ကျင်ရေးကြွေးကြော်သံများ ဟစ်ကြွေးချီတက်ခဲ့ကြသည်။
ဆက်လက်၍ လူထုသပိတ်စစ်ကြောင်းသည် နွေဦးတော်လှန်ရေးအပါအဝင် တစ်နိုင်ငံလုံးမှ ကျဆုံးခဲ့သော အာဇာနည် သူရဲကောင်းအပေါင်းတို့ကို အလေးပြုခဲ့ကြသည်။
ဆာလင်းကြီးမြို့နယ် မြောက်ခြမ်းနှင့် ယင်းမာပင်မြို့နယ် အရှေ့ခြမ်းရှိ ရွာပေါင်းစုံ သပိတ်စစ်ကြောင်းသည် ၂၀၂၁ ခုနှစ်၊ မတ်လ ၉ ရက် နေ့မှစတင်၍ ဆန္ဒပြခဲ့ခြင်း ဖြစ်သည်။
(ပုံ/ ဗီဒီယို သတင်း)
စာတည်း။ ။မောင်ကောင်း
