ဇွန် ၂၀
မန္တလေးတိုင်းဒေသကြီး၊ မြင်းခြံမြို့တွင် ဇွန်လ ၁၈ရက်က ယာဉ်ထိန်းရဲ တစ်ဦး သေဆုံးမှုနှင့်ဆက်စပ်၍ ဒေသခံ သုံး ဦးအား စစ်ကောင်စီတပ်မှဖမ်းဆီးသွားကြောင်း ဒေသခံအချို့ထံမှသိရသည်။
ယာဉ်ထိန်းရဲ သေနတ်ဖြင့် ပစ်ခတ်ခံရ၍ သေဆုံးပြီးမကြာခင်မှာ ၎င်း၏ဇနီးဖြစ်သူမှတိုင်ကြားသဖြင့် သားမိသားဖ သုံးယောက်လုံးကို အဆိုပါနေ့မှာ ဖမ်းဆီးခဲ့ခြင်းဖြစ်ကြောင်း ဒေသခံတစ်ဦးက မဇ္ဈိမကိုပြောသည်။
"ယာဉ်ထိန်းရဲသေပြီးမကြာသေးဘူး သူနဲ့အရင်ရက်ကရန်ဖြစ်ဖူးတဲ့ မိသားစု၀င် ၃ ဦးရှိတယ်။ အမျိူးသားနဲ့သားအမိနှစ်ယောက်ပါ။ အဲ့ဒီတော့သူတို့ကို သံသယဖြစ်ပြီး ရဲမိန်းမကလှမ်းတိုင်လို့ ဖမ်းသွားတယ်"ဟု၎င်းကပြောသည်။
ထို့အပြင် အဆိုပါယာဉ်ထိန်းရဲ အသတ်ခံရသည့်ကိစ္စနှင့်ဆက်စပ်၍ မြင်းခြံမြို့က အိမ်အချို့ကို စစ်ကောင်စီမှ ဝင်ရောက်စစ်ဆေးမှုများရှိခဲ့ကြောင်းသိရသည်။
ဇွန်လ ၁၈ရက် နေ့လည် ၁၂နာရီ ဝန်းကျင်က ဗိုလ်ချုပ်လမ်းလို့ခေါ်တဲ့ မြင်းခြံ-မိတ္ထီလာလမ်းမကြီးပေါ် အမှတ် ၁၉ စွန်းလွန်းရပ်ကွက် ရွှေရည်ဟိန်း ချည်ထိုင်ဆိုင်အနီးမှာ ဆိုင်ကယ်မောင်းနေရင်း သေနတ်နဲ့ ပစ်ခံခဲ့ရတာဖြစ်ပါတယ်။
မြင်းခြံမြို့ပေါ်မှာ အကြမ်းဖက်စစ်ကောင်စီတပ်ဖွဲ့ဝင်တွေ သေဆုံးမှုနဲ့ ထိခိုက်ဒဏ်ရာ ရမှုတွေ ဖြစ်ပေါ်နေပြီး ဒေသခံ ပြည်သူတွေကိုလည်း စစ်ကောင်စီက ဖမ်းဆီးနှိပ်စက် သက်ဖြတ်တာတွေ ရှိနေပါတယ်။