ကရင်အမျိုးသားအစည်းအရုံး( KNU) ဥက္ကဌ ဗိုလ်ချုပ်ကြီး စောမူတူးစေးဖိုးသည် ယမန်နေ့ညက သွေးတိုးပြီး သတိလစ်သွားသဖြင့် ထိုင်းနိုင်ငံ၊ မဲဆောက်မြို့ရှိ ဆေးရုံတစ်ခုတွင် ဆေးကုသမှုခံယူနေရကြောင်း သတင်းရရှိသည်။
စောမူတူးစေးဖိုးသည် ယမန်နေ့ ဧပြီလ ၁၈ ရက်နေ့ ညနေ ၆ နာရီဝန်းကျင်တွင် ရာသီဥတုအပူရှိန်ပြင်းလွန်း၍ သွေးတိုးပြီး အော့အန်ကာ သတိလစ်သွားခဲ့သည်ဟုKNU နှင့် နီးစပ်သော သတင်းအရင်းအမြစ်တစ်ဦးက မဇ္ဈိမကိုပြောသည်။
ထို့ကြောင့် မဲဆောက်မြို့ရှိ Maesotram Hospital သို့ ပို့ဆောင်ကုသခဲ့ရပြီး ယနေ့ဧပြီလ၁၉ရက်တွင် ကျန်းမာရေးအခြေအနေတိုးတက်ကောင်းမွန်လာပြီဟု ၎င်းက ဆိုသည်။ စိုးရိမ်စရာမရှိတော့သော်လည်း ဆက်လက်စောင့်ကြည့်ရန်အတွက် ဆေးရုံတွင် ထားရှိဦးမည်ဖြစ်ကြောင်း သိရသည်။
" သူနေကောင်းပါပြီ။ ဆေးရုံမှာပဲ ထားထားတယ်။ မဆင်းရသေးဘူး" ဟု အထက်ပါ KNU သတင်းရင်းမြစ်က မဇ္ဈိမကိုပြောသည်။
KNU ဥက္ကဌ ဗိုလ်ချုပ်ကြီး စောမူတူးစေးဖိုးသည် ပြီးခဲ့သည့် ၂၀၂၃ ခုနှစ်၊ ဧပြီလ ၁၃ ရက်နေ့တွင် အသက် (၉၀) ပြည့်ခဲ့သည်။ ၎င်း၏ လတ်တလောကျန်းမာရေးအခြေအနေကို အသေးစိတ်မေးမြန်းရန် ကရင်အမျိုးသားအစည်းအရုံး (KNU) ပြောရေးဆိုခွင့်ရှိသူ ပဒိုစောတောနီးထံသို့ ယနေ့ ဧပြီလ ၁၉ရက် နေ့လည် ၁၂နာရီ ၁၅ မိနစ်ခန့်တွင် မဇ္ဈိမမှ ဖုန်းဖြင့် သုံးကြိမ်ဆက်သွယ်ခဲ့သော်လည်း အဆက်အသွယ်မရရှိသေးပေ။
စာတည်း - မောင်ကြီး
