ဇွန် ၁၉
ဧရာဝတီတိုင်း ဒေသကြီး ဖျာပုံမြို့မှာ ဒီကနေ့ ဇွန်လ ၁၉ ရက် မနက်ပိုင်းက ဗုံးသုံးလုံး ရှေ့ဆင့်နောက်ဆင့်ပေါက်ကွဲခဲ့တယ်လို့သိရပါတယ်။
ဒီကနေ့ မနက် ၇ နာရီ ၄၅ မိနစ်လောက်က ရွှေရတုအရာရှိရိပ်သာအရှေ့လမ်းမပေါ်မှာဗုံးတစ်လုံး စတင်ပေါက်ကွဲခဲ့ပြီး ၈နာရီ အချိန်လောက်မှာ အခွန်ဦးစီး ရုံးဝင်းအတွင်းမှာ တစ်လုံးနဲ့ ၈နာရီ ၂၅မိနစ်မှာတော့ အမှတ် (၄) ရပ်ကွက် ဒုတိယလမ်းမှာရှိတဲ့ ရပ်ကွက်အုပ်ချုပ်ရေးမှူးအိမ်ရှေ့မှာ ဗုံးတစ်လုံးထပ်မံပေါက်ကွဲခဲ့တယ်လို့သိရပါတယ်။
ပေါက်ကွဲမှုတွေဖြစ်ပေါ်ပြီး မနက် ၉ နာရီအချိန်မှာတော့ ချောင်းတွင်းလမ်းမကြီးဘေး ဗိုလ်ချုပ်ကြေးရုပ်အနီးက သစ်ပင်တစ်ပင်မှာ ဗုံးလို့ယူဆရတဲ့ အထုတ်တစ်ထုတ် ချိတ်ဆွဲထားတာကိုထပ်မံတွေ့ရှိတာကြောင့် အကြမ်းဖက်စစ်ကောင်စီလက်အောက်ခံတွေက ဖြုတ်သိမ်းသွားတယ်လို့ လည်းသိရပါတယ်။
ဗုံးပေါက်ခဲ့တဲ့နေရာတွေကို စစ်အုပ်စုနဲ့ရဲတွေက စစ်ဆေးမှုတွေပြုလုပ်ခဲ့ပြီး အခွန်ဦးစီးရုံးအနီးက အသက် ၂၀ ဝန်းကျင် အမျိုးသမီးနှစ်ဦးကို ဖမ်းဆီးခေါ်ဆောင်သွားတယ်လို့ ဒေသခံတွေကပြောပါတယ်။
"အခွန်ရုံးနားက ကောင်မလေးနှစ်ယောက်ကို ဝင်ပြီးစစ်နေတာ၊ သေနတ်တွေနဲ့လည်းချိန်ထားတယ်။ စစ်တဲ့အချိန်မှာ စစ်နေတဲ့လူဆီကို ဖုန်းတစ်လုံးက ဝင်လာပြီးတာနဲ့ တခါတည်းဖမ်းခေါ်သွားတာပါ"လို့ဒေသခံက ပြောပါတယ်။
ဖျာပုံမြို့က ဗုံး ၃ ပေါက်ကွဲခဲ့တဲ့ နေရာသုံးနေရာလုံးမှာ ထိခိုက်ဒဏ်ရာရရှိမှုမရှိဘူးလို့လည်း သိရပါတယ်။
