မေ ၁၆
ကလေးမြို့အတွင်းရှိ ပြည်သူတွေအနေနဲ့ ည ၇ နာရီနောက်ပိုင်း ကျန်းမာရေးကိစ္စကလွဲပြီး ပြင်ပသို့ သွားလာခြင်း မပြုလုပ်ဘဲ အိမ်တွင်းမှာပဲ နေထိုင်ပေးကြဖို့ ကလေးဒေသကာကွယ်ရေးအဖွဲ့က မေလ ၁၆ ရက်နေ့မှာ ထုတ်ပြန် ထားတာပါ။
ကလေးမြို့နယ်အတွင်းရှိ ကိုယ်ပိုင်စီးပွားရေး လုပ်ငန်းရှင်တွေအနေနဲ့ မော်တော်ယာဉ်တွေနဲ့ ကုန်ပစ္စည်းတွေ သယ်ယူပို့ဆောင်တာ၊ ခရီးသွားလာမှုကို ည ၁၀ နာရီနောက်ပိုင်း လုံးဝရပ်တန့်ထားရန်နဲ့ တစုံတရာ ဖြစ်ပွားခဲ့ရင် အကြမ်းဖက် စစ်တပ်ရဲ့ လုပ်ရာသာ ဖြစ်ကြောင်းလည်း အသိပေးထားပါတယ်။
အာဏာသိမ်းစစ်ကောင်စီရဲ့ အကြမ်းဖက်လုပ်ရပ်တွေကို ခုခံကာကွယ်ဖို့၊ ဖက်ဒရယ်ဒီမိုကရေစီစနစ် ပေါ်ပေါက်ရေးလမ်းစဉ်မှာ ပါဝင်အားဖြည့်နိုင်ဖို့ ရည်ရွယ်ပြီး ကလေးဒေသခုခံကာကွယ်ရေးအဖွဲ့ကို လူငယ်တွေ ဦးဆောင်ပြီး ပြီးခဲ့တဲ့ ဧပြီလကုန်ပိုင်းက ဖွဲ့စည်းခဲ့တာ ဖြစ်ပါတယ်။