ရန်ကုန်၊ ဇန်နဝါရီ ၂၃ ။            ။ Sexy မော်ဒယ်ဟုလူသိများသည့် သရုပ်ဆောင်၊ အဆိုတော် ဇွန်သဉ္ဇာက သူ့အနေဖြင့် Sexy ဓာတ်ပုံများကို ဆက်လက်ရိုက်ကူးခြင်း   ပြုလုပ်တော့မည် မဟုတ်ဟု ပြောဆိုလိုက်သည်။

" စိတ်ထဲမှာကို မရိုက်ချင်တော့တာ ၁ နှစ်လောက်ရှိပြီ။ မရိုက်တော့တာ " ဟု ဇွန်သဉ္ဇာက ဇန်န်ဝါရီလ ၂၃ ရက်တွင် ပြောသည်။

ယနေ့ ဇန်နဝါရီ ၂၃ ရက် ရန်ကုန်မြို့ရှိ Orchid ဟိုတယ်တွင် " Zune Thinzar Forward To Art Show " ခေါင်းစဉ်ဖြင့် ပြုလုပ်ခဲ့သည့် သူ၏ သတင်းစာရှင်းလင်းပွဲတွင်ပြောဆိုခဲ့ခြင်း ဖြစ်သည်။

" ဒါပေမယ့် ပရိသတ်တွေရဲ့တောင်းဆိုချက်အရ အရင်ကရိုက်ထားတဲ့ တစ်ပုံစ နှစ်ပုံစ ပြန်တင်တာတော့ ရှိတာပေါ့ " ဟု ဇွန်သဉ္ဇာက ဆိုသည်။

လက်ရှိတွင် ရှိုးပွဲများတွင်လည်း သီချင်းများဆိုနေရသောကြောင့် အဆိုဘက်ကို အားပိုထည့်ပြီး ကြိုးစားသွားမည်ဟု သူက ပြောခဲ့ပြီး အခြားအနုပညာလုပ်ငန်းများဖြစ်သည့် အဆို၊ အက၊ သရုပ်ဆောင်ဘက်များတွင် ပိုမိုကြိုးစားအား ထုတ်သွားမည်ဟု ပြောဆိုခဲ့သေးသည်။

ဇွန်သဉ္ဇာသည် လူမှုကွန်ယက်စာမျက်နှာတစ်ခုဖြစ်သည့် Facebook ပေါ်တွင် Sexy ဓာတ်ပုံများဖြင့် နာမည်ရလာသူတစ်ဦး ဖြစ်ပြီး အမျိုးသားပရိသတ်အများစု၏ အားပေးမှု ရရှိထားသူတစ်ဦး ဖြစ်သည်။