ကိုခင်မောင်
မဇ္ဈိမ။ ။ချင်းပြည်နယ်၊ မင်းတပ်မြို့နယ်ရှိ CDM ကျောင်းတွင် ယမန်နေ့ အောက်တိုဘာလ ၅ ရက်နေ့က ကမ္ဘာ့ဆရာများနေ့ အထိမ်းအမှတ် စာစီစာကုံးပြိုင်ပွဲ နှင့် အားကစားပြိုင်ပွဲများကို ကျင်းပခဲ့ကြောင်း မင်းတပ်မြို့နယ်ပြည်သူ့အုပ်ချုပ်ရေးအဖွဲ့ထံက သိရသည်။
အဆိုပါ ကမ္ဘာ့ဆရာများနေ့ (World Teacher's Day) အခမ်းအနားကို မင်းတပ် မြို့နယ်ပြည်သူ့အုပ်ချုပ်ရေးအဖွဲ့၊ မြို့နယ်ပညာရေး ဘုတ်အဖွဲ့၏ ဦးဆောင်မှုဖြင့် ဖွင့်လှစ်သည့် အခြေခံပညာ အထက်တန်းကျောင်း တစ်ကျောင်း တွင်ကျင်းပခဲ့ခြင်းဖြစ် ကြောင်းသိရသည်။
အခမ်းအနားသို့ မင်းတပ် မြို့နယ်ပြည်သူ့အုပ်ချုပ်ရေးအဖွဲ့၏ အတွင်းရေးမှူး (၁)၊ မြို့နယ် ပညာရေးဌာနတာဝန်ခံအကြီးအကဲ၊ တပ်မဟာမှူး - ချင်းကာကွယ်ရေးတပ်ဖွဲ့ (CDF-MINDAT) နှင့် တိုက်နယ် (၁) တိုက်နယ်ပြည်သူ့အုပ်ချုပ်ရေးမှူးတို့ တက်ရောက်၍ အမှာစကား ပြောကြားခဲ့ကြပြီး ကျောင်းသူ၊ကျောင်းသားများနှင့် ဆရာ၊ဆရာမ များမှ ချင်းရိုးရာ အကတို့ဖြင့် ဖျော်ဖြေတင်ဆက်ခဲ့ကြသည်။
စာတည်း။ ။မောင်ကောင်း