September 3
ရန်ကုန်(မဇ္ဈိမ)။ ။ ရန်ကုန်တိုင်း၊ ကမာရွတ်မြို့နယ်၊ ပြည်လမ်း၊ အင်းယားကန်ဘောင်ရှေ့ရှိ ဧရာဝတီဘဏ်ခွဲ (၂၆) အား ဓားပြတိုက်ခဲ့သူကို အချိန်တိုအတွင်း ဖမ်းမိခဲ့ကြောင်း စစ်ကောင်စီက သတင်းထုတ်ပြန်သည်။
စက်တင်ဘာလ ၂ ရက် မွန်းလွဲ ၂ နာရီ ၃၀ မိနစ်ခန့်က ဧရာဝတီဘဏ်ကို ဓားပြတိုက်ခဲ့သူအား မြကန်သာ (၂) လမ်း၊ အမှတ် (၆၇၈) အနီး ညနေ ၄ နာရီ ၁၅ မိနစ်အချိန်၌ ဖမ်းဆီးရမိကြောင်းနှင့် လုယက်မှုကျူးလွန်သူမှာ လှိုင်မြို့နယ်၊ (၁၃) ရပ်ကွက်၊ သီရိမြိုင် (၈) လမ်း၊ တိုက် (၅၉၅) နေ ကိုစိုးသီဟ ၂၉ နှစ််ဆိုသူဖြစ်ကြောင်း ထုတ်ပြန်ထားသည်။
ထို့ပြင် ၎င်းအားဖမ်းဆီးရာတွင် လုံခြုံရေးတပ်ဖွဲ့ဝင်များနှင့် တာဝန်သိပြည်သူများက ပူးပေါင်းပိတ်ဆို့ ဖမ်းဆီးခဲ့ခြင်းဖြစ်ကြောင်း ထုတ်ပြန်ချက်တွင်ပါရှိသည်။
ဒေသခံများ၏ပြောကြားချက်အရ ၎င်းအားလာရောက်ဖမ်းဆီးချိန်တွင် စစ်ကားသုံးစီးဖြင့် လမ်းအတွင်းသို့ဝင်ရောက်လာသည့် စစ်ကောင်စီတပ်သားများကသာ ဖမ်းဆီးသွားကြောင်း သိရသည်။
ဓားပြတိုက်မှုကြောင့် ဘဏ်မှ ငွေကြေးတစ်စုံတစါရာ ပါသွားခြင်းမရှိသော်လည်း ဘဏ်ဝန်ထမ်းအမျိုးသမီးတစ်ဦး ဒဏ်ရာရရှိခဲ့ကြောင်း သိရသည်။
စာတည်း။ ။ ဖူးသိမ်ကျ
စာမူတည်းဖြတ်။ ။ အောင်ကျော်ဖြိုး
