ဇွန် ၆
နေအိမ်ဖယ်ရှားရှင်းလင်းခံနေရသည့် မန္တလေးတိုင်း ပြည်ကြီးတံခွန်မြို့နယ် ရဲဘော်ကွက်သစ်မှ ရာအိမ်မှူးတစ်ဦး၊ ယနေ့နံနက်ပိုင်းက အသတ်ခံလိုက်ရကြောင်း သတင်းရရှိသည်။
“စကစ ဘောမ သိန်းစိုးတဲ့၊ သူက စကစက ကျူးတွေဆိုပြီးတင်းကြမ်းဖျက်နေတဲ့ ရဲဘော်ကွက်သစ်ထဲမှာ လူကြီးလုပ်နေတဲ့သူပါ၊ မနက်ကတော့ ကျည်သုံးချက်စားပြီး ငရဲရောက်သွားပြီ” ဟု ပြည်သူ့ကာကွယ်ရေးမြို့ပြပြောက်ကျားတပ်ဖွဲ့ တစ်ခုနှင့် နီးစပ်သူက အတည်ပြုပြောသည်။
အသတ်ခံရသူသည် ရဲဘော်ကွက်သစ် မင်္ဂလာလမ်းနှင့် ၇၈ လမ်းထောင့်နေထိုင်သူ ရာအိမ်မှူးဦးသိန်းစိုး(ခ)ဦးလှအောင် ဆိုသူဖြစ်ပြီး၊ ၄င်း၏ အကြော်တဲအတွင်း၊ သားဖြစ်သူနှင့်အတူရှိနေချိန် ယနေ့နံနက် ၆ နာရီခန့်က အသတ်ခံလိုက်ရခြင်းဖြစ်ကြောင်း၊ စစ်ကောင်စီ ရဲတပ်ဖွဲ့နှင့် နီးစပ်သည့် သတင်းရင်းမြစ်ထံမှသိရ သည်။
ရာအိမ်မှူး ဦးသိန်းစိုး(ခ)ဦးလှအောင်ကို ဆိုင်ကယ်စီးသေနတ်သမားနှစ်ဦးက သေနတ်ဖြင့် အနီးကပ်သုံးချက်ဆင့် ပစ်ခတ်သွားခြင်းဖြစ်ပြီး၊ ခန္ဓာကိုယ်အလယ်ပိုင်းကျည်ဖောက်၀င် ဒဏ်ရာသုံးချက်ဖြင့် နေရာမှာတင် ပွဲချင်းပြီးသေဆုံးသွားခြင်းဖြစ်ကြောင်း အဆိုပါသတင်းရင်းမြစ်ကပြောသည်။
၄င်းအား မည်သည့်အဖွဲ့အစည်းက ပစ်သတ်သွားကြောင်းတော့လတ်တလော မသိရသေးပေ။ ပြည်ကြီးတံခွန်မြို့နယ်တွင် ဇွန်လ ၄ ရက်နေ့ကလည်း၊ ၇၃ လမ်းနှင့် ၁၁၆ လမ်းထောင့် နေအိမ်များကို ဖျက်ဆီးနေသည့် စစ်ကောင်စီ၏ ကျူးရှင်းလင်းရေးအဖွဲ့ တိုက်ခိုက်ခံခဲ့ရပြီး၊ စစ်သားတချို့ထိခိုက်ဒဏ်ရာ ရခဲ့သည့်ဖြစ်စဉ်တစ်ခု ဖြစ်ခဲ့ဖူးသည်။