ဧပြီ ၁၇
အာဏာသိမ်းစစ်ကောင်စီက အမိန့်ကြော်ငြာစာအမှတ်(၅၄/၂၀၂၂)ဖြင့် ၎င်းတို့ချီးမြှင့်သည့် ရုပ်ရှင်သရုပ်ဆောင် အကယ်ဒမီခိုင်သင်းကြည်၏ လူမှုထူးချွန်တံဆိပ်(ဒုတိယအဆင့်)အား ယနေ့ ဧပြီလ ၁၇ ရက်နေ့ တွင် ပြန်လည်ရုပ်သိမ်းကြောင်း သတင်းထုတ်ပြန်ခဲ့သည်။
ပြီးခဲ့သော မတ်လ ၂၇ နေ့က ရုပ်ရှင်သရုပ်ဆောင်ခိုင်သင်းကြည်အပါအဝင် အနုပညာရှင်အများအပြားကို အာဏာသိမ်းစစ်ကောင်စီက ဘွဲ့တံဆိပ်မျိုးစုံချီးမြင့်ခဲ့ခြင်းဖြစ်ပြီး ယနေ့ ဧပြီ ၁၇ ရက်နေ့တွင် နိုင်ငံတော်စီမံ အုပ် ချုပ်ရေးကောင်စီက ရုပ်ရှင်သရုပ်ဆောင် ခိုင်သင်းကြည်အား အမိန့်ကြော်ငြာစာ အမှတ် ၅၄/၂၀၂၂ ဖြင့် ချီးမြှင့်ပေးအပ်ခဲ့သည့် လူမှုထူးချွန်တံဆိပ်(ဒုတိယအဆင့်)အား ၂၀၀၉ ခုနှစ် ဂုဏ်ထူးဆောင်ဘွဲ့များ၊ ဂုဏ်ထူးဆောင်တံဆိပ်များဆိုင်ရာ ပြဋ္ဌာန်းချက် အပိုဒ် ၆၇ နှင့် ဖွဲ့စည်းပုံ အခြေခံဥပဒေပုဒ်မ ၄၁၉ တို့အရ ပြန်လည်ရုပ်သိမ်းလိုက်ကြောင်း သိရသည်ဟုဆိုကာ စစ်ကောင်စီ၏ ဝါဒဖြန့်သတင်းစာများတွင် ဖော်ပြခဲ့ ခြင်းဖြစ်သည်။
ထို့အပြင် ရုပ်ရှင်သရုပ်ဆောင် ခိုင်သင်းကြည်ကို လူမှုထူးချွန်တံဆိပ် ရုပ်သိမ်းခြင်းနှင့်အတူ မတ်လ ၂၇ ရက် တပ်မတော်နေ့က လူမှုထူးချွန်တံဆိပ်(တတိယအဆင့်) ပေးအပ်ခဲ့သည့် သရုပ်ဆောင် စိုးမြတ်သူဇာကို လူမှုထူးချွန်တံဆိပ်(ဒုတိယအဆင့်)ကို ထပ်မံတိုးမြှင့်ကြောင်း ယနေ့ထုတ် စစ်ကောင်စီ၏ဝါဒဖြန့်သတင်း စာများတွင် ဖော်ပြထားသည်။
