လာဘ်ပေးလာဘ်ယူမှုစွပ်စွဲချက်များဖြင့် တရုတ်ဘဏ်လုပ်ငန်းစည်းကမ်းကြီးကြပ်ရေးအဖွဲ့မှ အကြီးတန်း အရာရှိဟောင်းတစ်ဦးကို ဖမ်းဆီးလိုက်ခြင်းကြောင့် အမှုဆောင်အရာရှိများနှင့် မူဝါဒချမှတ်သူများကို အစိုးရက အဂတိလိုက်စားမှုတိုက်ဖျက်ရေးနှိမ်နင်းရေး လုပ်ငန်းစဉ်တွင် ထပ်မံ အရေးယူ ဆောင်ရွက်လိုက်သည်။
၂၀၁၃ ခုနှစ်တွင် အငြိမ်းစားယူခဲ့သော ဘဏ်လုပ်ငန်းစောင့်ကြည့်ရေးအဖွဲ့မှ ဒုတိယဥက္ကဌဖြစ်သူ ချိုင်းအာရှန်သည် အာဏာအလွဲသုံးစားလုပ်မှုဖြင့် စွဲချက်တင်ခံခဲ့ရသည်ဟု တရုတ်နိုင်ငံ ထိပ်တန်းပြည်သူ့စုံစမ်းရေးမှူးရုံးက ဖေဖော်ဝါရီလ ၁၀ရက်တွင် ပြောကြားခဲ့သည်။
ဇူလိုင်လတွင် စုံစမ်းစစ်ဆေးမှုများပြုလုပ်ပြီးနောက် ဇန်နဝါရီလတွင် ကွန်မြူနစ်ပါတီမှ အထုတ်ခံခဲ့ရသော ချိုင်းသည် သမ္မတ ရှီကျင့်ဖျင်၏ နှစ်ရှည်အကျင့်ပျက်ခြစားမှု တိုက်ဖျက်ရေး တွန်းအားပေးမှုဖြင့် ဖမ်းဆီးခံထားရသော အဆင့်အမြင့်ဆုံး ဘဏ္ဍာရေးကဏ္ဍမှ အရာရှိများထဲမှ တစ်ဦးဖြစ်သည်။
ချိုင်းသည် ၁၉၅၁ခုနှစ်တွင်မွေးဖွားခဲ့ပြီး၊ ၂၀၂၁ခုနှစ်တွင် ဒေါ်လာ ၆ ဒသမ ၆ ဘီလီယံကယ်တင်ရေးရန်ပုံငွေ ရရှိခဲ့သော တရုတ် Huarong Asset Management Co. ကဲ့သို့သော ယုံကြည်မှုရန်ပုံငွေ ကုမ္ပဏီများနှင့် ကြွေးဆုံးမန်နေဂျာများလုပ်ငန်းများ အပါအဝင် ဘဏ်မဟုတ်သော ဘဏ္ဍာရေးအဖွဲ့ အစည်းများကို ကြီးကြပ် ကွပ်ကဲရန် တာဝန်ယူခဲ့သည်။
အငြိမ်းစားယူပြီးနောက် တက်ကြွစွာ ဆက်လက်လှုပ်ရှားခဲ့ပြီး ဘဏ္ဍာရေးဖိုရမ်များတွင် မကြာခဏ ဟောပြောသူအဖြစ် ပါဝင်ခဲ့သည်။
ဟွားရုန်ပိုင်ဆိုင်မှု စီမံခန့်ခွဲရေးကုမ္ပဏီ ဥက္ကဌဟောင်း လိုင်ရှောင်မင်းသည် လာဘ်ပေးလာဘ်ယူမှုအပါအဝင် ရာဇဝတ်မှုများဖြင့် ၂၀၂၁ခုနှစ် ဇန်နဝါရီလတွင် ကွပ်မျက်ခံခဲ့ရသည်။
ဘဏ္ဍာရေးဆိုင်ရာ အဖွဲ့အစည်းများနှင့် စည်းကမ်းထိန်းသိမ်းရေးအဖွဲ့များကို အဓိကထားသည့် တရုတ်နိုင်ငံ တစ်ဝန်း အကျင့်ပျက်ခြစားမှု တိုက်ဖျက်ရေးကို အောက်တိုဘာလတွင် စတင်ခဲ့ရာ တရုတ်နိုင်ငံ၏ ဒေါ်လာ ၅၄ ထရီလီယံ ဘဏ္ဍာရေးစနစ်အား အရှိန်မြှင့် စိစစ်ရာတွင် အရာရှိ ၂၀ ကျော်ကို အရေးယူခဲ့သည်။
ထိပ်တန်း အသက်အာမခံလုပ်ငန်း China Life Insurance Co. ၏ ဥက္ကဌ ဝမ်ဘင်းသည် ကြီးလေးသော ပြစ်မှုကျူးလွန်ခဲ့သည်ဟု သံသယရှိသည့်အတွက် ဇန်နဝါရီလက စုံစမ်းစစ်ဆေးခံခဲ့ရသည်။
