ဖေဖော်ဝါရီ ၁၄
ဧရာဝတီတိုင်း၊ ဘိုကလေးမြို့၊ အောက်ပိုင်း ဘောလုံးကွင်းတွင် ဖေဖော်ဝါရီလ ၁၂ ရက်နေ့က စစ်ကောင်စီ ဦးစီးသည့် ပြည်ထောင်စုနေ့ အခမ်းအနား တက်ရောက်သည့် လူစုလူဝေးတွင် COVID-19 အတည်ပြု လူနာများ တွေ့ရှိခဲ့ကြောင်း ဒေသခံများထံက သိရသည်။
အခမ်းအနား ပြုလုပ်စဉ် ဗျောက်အိုး ဖောက်သံကြောင့် မူးလဲခဲ့သည့် ဘိုကလေး ပညာရေး ကောလိပ်မှ ကျောင်းသူအား ဆေးရုံသို့ ပို့ဆောင်ရာ ဆေးရုံ စည်းကမ်းအရ Test Kit ဖြင့် ရောဂါပိုး ရှိ မရှိ စစ်ဆေးခဲ့ရာမှ အဆိုပါ ကျောင်းသူ အပါအဝင် ပို့ဆောင်သူများတွင် COVID-19 ရောဂါပိုး တွေ့ရှိခဲ့ကြောင်း ဒေသခံက ပြောသည်။
"ပညာရေး ကောလိပ်က ကျောင်းသူ မူးလဲသွားတော့ ပါမောက္ခတွေနဲ့ ကြက်ခြေနီတွေက ဆေးရုံကို လိုက်ပို့ကြတယ်၊ ဆေးရုံရောက်လို့ COVID -19 ရှိ မရှိ စစ်လည်းစစ်ရော အဲ့ဒီကျောင်းသူနဲ့ ပါမောက္ခ တစ်ယောက်နဲ့ ကြက်ခြေနီ နှစ်ယောက်ပါ COVID-19 Positive ဖြစ်နေတာပါ။ ရောဂါတွေ ဖြစ်နေတာကို လူစုလူဝေးတွေ လုပ်ပြီး ရောဂါပိုး ဖြန့်နေတာလား မသိဘူး၊ မြို့ပေါ်က လူတွေကတော့ စိုးရိမ်နေကြတယ်" ဟု ၎င်းကဆိုသည်။
ယင်းဖြစ်စဉ်ကို မြို့ နယ် စစ်ကောင်စီက ဒေသခံ ပြည်သူများ မသိရှိစေရန် သတင်း အမှောင်ချထားကြောင်း ဒေသခံက ဆက်ပြောသည်။
ဘိုကလေးတွင် ဖေဖော်ဝါရီလ ၇ ရက်နေ့မှ ၁၃ ရက်နေ့အထိ အားကစားပွဲများ၊ ပြည်ထောင်စုနေ့ ပွဲဈေးတန်းများနှင့် ဘုန်းကြီးပျံ ပွဲဈေးတန်းများကို စစ်ကောင်စီ လက်ပါးစေ မြို့နယ်အုပ်ချုပ်ရေးမှူး ဦးသိန်းဇော်ဦး ဦးဆောင် ကျင်းပခဲ့ကြောင်း သိရသည်။
ဘိုကလေးမြို့တွင် ဇန်နဝါရီလ နောက်ဆုံး အပတ်မှ စတင်ကာ ဖေဖော်ဝါရီလ ၁၃ ရက်နေ့ ညပိုင်းအထိ COVID-19 အတည်ပြုလူနာ ၇၄ ဦးနှင့် သေဆုံးသူ နှစ်ဦးရှိကြောင်း မြို့နယ် ဆေးဝန်ထမ်း တစ်ဦးထံက သိရသည်။
