ဗြိတိန်အကြံပေးအဖွဲ့တစ်ဖွဲ့ဖြစ်သည့် Global Britain Center ဖွင့်ပွဲ၌ အိန္ဒိယနိုင်ငံ၏ နိုင်ငံခြားရေးရာ ထိပ်တန်းအာဏာပိုင်တစ်ဦးက ဗြိတိန်နိုင်ငံသည် အန္တရာယ်ရှိသော တရုတ်နိုင်ငံ၏ ခြိမ်းခြောက်မှုကို တိုက်ဖျက်ရန် ဥရောပပြင်ပကို ကျော်လွန်စဉ်းစားရန်လိုအပ်ကြောင်း ပြောကြားသည်။
လန်ဒန်မြို့ရှိ Carlton Club ၌ ဖေဖော်ဝါရီ ၁ ရက်က ပြုလုပ်သော အဆိုပါ စင်တာဖွင့်ပွဲတွင် နယူးဒေလီရှိ မူဝါဒသုတေသနစင်တာမှ မဟာဗျူဟာလေ့လာရေး ပါမောက္ခ ဘရာမာချယ်လန်နီက တရုတ်နိုင်ငံ၏ အန္တရာယ်ရှိသော အာဏာရှင်အရင်းရှင်စနစ်ကို တန်ပြန်နိုင်ရေးအတွက် ပိုမိုထိရောက်သော အခန်းကဏ္ဍမှ ပါဝင်ရန် ဗြိတိန်အား တိုက်တွန်းခဲ့ကြောင်း စင်တာ၏သတင်းထုတ်ပြန်ချက်တွင် ဖော်ပြထားသည်။
ပါမောက္ခ ချယ်လန်နီက "ဗြိတိန်ဟာ မိတ်ဆွေတွေနဲ့ ပိုမို အကျိုးဖြစ်ထွန်းအောင် ဆောင်ရွက်နိုင်ဖို့ အင်ဒို-ပစိဖိတ်ဒေသမှ ယုံကြည်မှုရှိရှိနဲ့ ဆက်လှမ်းဖို့ လိုပါတယ်။ ဗြိတိန်ဟာ အရေးပါတဲ့ဒေသမှာ ပိုမိုကျယ်ပြန့်တဲ့အခန်းကဏ္ဍကနေ ပါဝင်နိုင်ဖို့ အင်ဒို-ပစိဖိတ်ဒေသမှာ မိတ်ဖက်ဆက်ဆံရေးတွေ တည်မြှင့် တည်ဆောက်ဖို့လိုအပ်ပါတယ်” ဟု ပြောခဲ့သည်။
အိန္ဒိယနယ်စပ်တွင် တပ်စွဲထားသည့် ထောင်နှင့်ချီသော တရုတ်တပ်ဖွဲ့ဝင်များကို ထောက်ပြကာ တရုတ်အစိုးရ၏ အာဏာရှင်ဆန်သော အရင်းရှင်စနစ်နှင့်ပတ်သက်၍ စိုးရိမ်ကြောင်းလည်း ချယ်လန်နီက ပြောခဲ့သည်။
“တရုတ်ဟာ သူ့ရဲ့ လူ့အခွင့်အရေး ချိုးဖောက်မှုတွေ ဒါမှမဟုတ် ရှင်ကျန်းလူမျိုးတုံးသတ်ဖြတ်မှုတွေ အတွက် ရှုတ်ချခံရလောက်အောင် ဆိုးရွားလှပါတယ်။ ဒါဟာ တရုတ်မှာ မွတ်စလင် ၁ သန်းကျော်ကို ထိန်းသိမ်း ထားတဲ့အပေါ် နိုင်ငံတကာက နှုတ်ဆိတ်နေတာကြောင့်ပါ” ဟု ချယ်လန်နီက ထပ်လောင်းပြောကြားခဲ့သည်။
အဆိုပါ အခမ်းအနားကို ပါတီစုံမှ လွှတ်တော်ကိုယ်စားလှယ် ၃၀ ကျော်နှင့် သံအမတ်ကြီး ၁ ဒါဇင်ခန့် တက်ရောက်ခဲ့ကြောင်း သတင်းထုတ်ပြန်ချက်တွင် ဖော်ပြထားသည်။
သတင်းထုတ်ပြန်ချက်အရ စင်တာ၏ရည်ရွယ်ချက်သည် ကျန်ကမ္ဘာ့နိုင်ငံများနှင့်ဆက်ဆံရာတွင် ဗြိတိန်၏ အပြုသဘောဆောင်သောအမြင်ကို မြှင့်တင်ရန် ကမ္ဘာတစ်ဝှမ်းလုံးရှိ ဗြိတိန်နိုင်ငံသားများ ပါဝင်ပူးပေါင်း ဆောင်ရွက်စေရန်ဖြစ်သည်။
ဝန်ကြီးချုပ်ဘောရစ်ဂျွန်ဆင်ကလည်း စင်တာဖွင့်ပွဲအတွက် ဆုတောင်းပေးခဲ့သည်။
