အိန္ဒိယနိုင်ငံ အနောက်ပိုင်း မဟာရက်ရှ်ထရာ ပြည်နယ် ပူနေးမြို့အခြေစိုက် Gennova Biopharmaceuticals ကုမ္ပဏီက Omicron ဗိုင်းရပ်စ်မျိုးကွဲအတွက် ထုတ်လုပ်ထားသည့် mRNA ကာကွယ်ဆေးကို အဆင့်၂ စမ်းသပ်မှု၏ အချက်အလက်များကို တင်ပြပြီး ဖြစ်ကာ အဆင့် ၃ စမ်းသပ်မှု၏ အချက်အလက်များကိုလည်း ပြုစုပြီး ဖြစ်သည်။
ယင်းတွေ့ရှိချက်များကို အိန္ဒိယ ဆေးဝါးထိန်းချုပ်ရေးအဖွဲ့၏ ကာကွယ်ဆေးဆိုင်ရာ ကျွမ်းကျင်သူများကော်မတီ (SEC) က နောက်ထပ် အချက်အလက်များမကြာမီ ပြန်လည်စစ်ဆေးသွားနိုင်သည်ဟု တာဝန်ရှိသူများက ပြောကြားသည်။
၂၀၂၁ ခုနှစ် စက်တင်ဘာလအတွင်းက Gennova က ကာကွယ်ဆေး စမ်းသပ်ချက်နှင့် ပတ်သက်သည့် ထုတ်ပြန်ချက်တွင် “အိန္ဒိယ ဆေးဝါးထိန်းချုပ်ရေးအဖွဲ့က mRNA အခြေခံ ကိုဗစ်-၁၉ ကာကွယ်ဆေး၏ အဆင့် ၂ နှင့် ၃ စမ်းသပ်သည့် နည်းလမ်းများကို အတည်ပြု သဘောတူညီထားသည်” ဟု ထုတ်ပြန်ခဲ့သည်။
“ကြားဖြတ် စမ်းသပ်မှု အဆင့် ၁ ရဲ့ လေ့လာတွေ့ရှိချက်တွေကို Gennova က အိန္ဒိယရဲ့ နိုင်ငံတော်အဆင့် စည်းကမ်းသတ်မှတ်ရေး အာဏာပိုင်အဖွဲ့ (NRA) လက်အောက်ရှိ ဆေးဝါးစံနှုန်းထိန်းချုပ်ရေး ဗဟိုအဖွဲ့ (CDSCO) သို့ တင်ပြထားပြီး ဖြစ်သည်။
ကာကွယ်ဆေးဆိုင်ရာ ကျွမ်းကျင်သူများကော်မတီ (SEC) သည် အဆင့် ၁ ကြားကာလ အချက်အလက်များကို ပြန်လည်သုံးသပ်ပြီး ဖြစ်သလို စမ်းသပ်စစ်ဆေးမှုအဆင့်သည် ဘေးကင်းလုံခြုံမှုရှိကြောင်း တွေ့ရှိထားကြောင်း ထုတ်ပြန်ထားသည်။
ယင်းကာကွယ်ဆေးကို အဆင့် ၂ စမ်းသပ်မှုအား ၁၀ မှ ၁၅ နေရာအထိ ပြုလုပ်ခဲ့ပြီး အဆင့် ၃ ကို ၂၂ မှ ၂၇ နေရာအထိ လုပ်ဆောင်ခဲ့သည်။
