စစ်ဒဏ်ကြောင့် ထိခိုက်ပျက်စီးနေသည့် အာဖဂန်နစ္စတန်နိုင်ငံသို့ ဆေးဘက်ဆိုင်ရာ အကူအညီ တစိတ်တဒေသပေးပို့မှုအဖြစ် အိန္ဒိယသည် အာဖဂန်နစ္စတန်အတွက် မရှိမဖြစ် လိုအပ်သော အသက်ကယ်ဆေးဝါး ၂ တန်ကို ဇန်နဝါရီ ၇ ရက်က ပေးပို့လိုက်သည်။
"အာဖဂန်ပြည်သူတွေအတွက် ကျွန်တော်တို့ရဲ့ လုပ်ဆောင်ဆဲ လူသားချင်းစာနာမှုအကူအညီ ပေးအပ်မှု တစိတ်တဒေသအဖြစ် မရှိမဖြစ် လိုအပ်တဲ့ အသက်ကယ်ဆေးဝါး တန်ချိန် ၂ တန်ပါတဲ့ ဆေးဝါးအကူအညီ တတိယအသုတ်ကို ဒီနေ့မှာပဲ အာဖဂန်နစ္စတန်ကို ပေးပို့ပေးခဲ့ပါတယ်" ဟု အိန္ဒိယ နိုင်ငံခြားရေးဝန်ကြီးဌာနက သတင်းထုတ်ပြန်သည်။
အဆိုပါ ဆေးဘက်ဆိုင်ရာ အကူအညီများကို ကဘူးလ်မြို့ရှိ အင်ဒီရာ ဂန္ဒီ ဆေးရုံသို့ လွှဲပြောင်း ပေးအပ်ခဲ့ခြင်းဖြစ်သည်။
"ဒီ ကြိုးပမ်းအားထုတ်မှုအဖြစ် ကျွန်တော်တို့ဟာ မကြာသေးခင်ကလည်း ကမ္ဘာ့ကျန်းမာရေးအဖွဲ့ကနေတဆင့် ကိုဗစ်-၁၉ ကာကွယ်ဆေးအလုံးရေ ၅သိန်း နဲ့ ဆေးဝါးအကူအညီ ၁ ဒသမ ၆ တန်ကိုလည်း အာဖဂန်နစ္စတန်ကို ပေးအပ်ထားခဲ့ပါသေးတယ်" ဟု အိန္ဒိယ နိုင်ငံခြားရေးဝန်ကြီးဌာနက ပြောသည်။
အိန္ဒိယသည် အာဖဂန်နစ္စတန် ပြည်သူများနှင့်အကြား အထူးဆက်ဆံရေး တစ်ရပ် ဆက်လက် ထိန်းသိမ်းထားရန်နှင့် လူသားချင်းစာနာမှုအကူအညီများ ထောက်ပံ့ပေးရန် စိတ်ပိုင်းဖြတ်ထားသည်။
ထို့ပြင် အိန္ဒိယသည် အာဖဂန်နစ္စတန်အတွက် ဆေးဝါးများနှင့် ဂျုံကဲ့သို့ အစားအစာတို့ ပါဝင်သည့် လူသားချင်းစာနာမှု အကူအညီများကို ဆက်လက်ထောက်ပံ့ပေးအပ်မည်ဟု ကတိပြုထားသည်။