တရုတ်တင်းနစ်ကစားသမား ဖန်းရွှေ လူမြင်ကွင်း၌ပြန်လည်ထွက်ပေါ်လာမှုသည် စိုးရိမ်ပန်မှုလျော့စေရန် အနည်းငယ်မျှလုပ်ဆောင်ခြင်းဖြစ်သောကြောင့် သူမအမှုနှင့်ပတ်သက်၍ ပွင့်လင်းမြင်သာစွာ စုံစမ်း စစ်ဆေးမှုပြုလုပ်ရန်နှင့် ဘေးကင်းကြောင်း သက်သေအထောက်အထားများ တင်ပြရန် ဥရောပသမဂ္ဂ (EU) က တရုတ်အာဏာပိုင်များအား တိုက်တွန်းလိုက်ကြောင်း ရုရှားမီဒီယာကနိုဝင်ဘာ ၂၈ ရက်တွင် ဖော်ပြခဲ့သည်။
“ဖန်းရွှေအနေဖြင့် လွတ်လပ်ပြီး ခြိမ်းခြောက်မှုအောက်တွင် မရှိကြောင်း သေချာစေရန် အားကစား ကျွမ်းကျင်သူများနှင့် နိုင်ငံတကာတောင်းဆိုမှုများ မြင့်တက်လာချိန်တွင် အီးယူက လည်း တောင်းဆိုလိုက်သည်။ လိင်ပိုင်းဆိုင်ရာနှောင့်ယှက်ခံရမှုစွပ်စွဲချက်များနှင့်ပတ်သက်ပြီး တရားမျှတပြီး ပွင့်လင်းမြင်သာသော စုံစမ်းစစ်ဆေးမှုများပြုလုပ်ရန် တရုတ်အာဏာပိုင်များအား အီးယူက တိုက်တွန်းပါသည်” ဟု ပြင်ပလှုပ်ရှားမှုဆိုင်ရာဌာန ပြောရေးဆိုခွင့်ရှိသူ၏ ထုတ်ပြန်ချက်ကို ကိုးကား၍ Sputnik သတင်းဌာနက ဖော်ပြသည်။
နိုင်ငံတကာအိုလံပစ်ကော်မတီ (IOC)ဥက္ကဋ္ဌ သောမတ်စ်ဘာ့ခ်ျသည် တရုတ်အားကစားအရာရှိတစ်ဦးနှင့် IOC အရာရှိတစ်ဦးတို့အပါအဝင် အိုလံပစ်ချန်ပီယံ ၃ ကြိမ်ဆွတ်ခူးခဲ့သူ ဖန်းရွှေနှင့် မိနစ် ၃၀ ကြာ video call ခေါ်ဆိုမှု ပြုလုပ်ခဲ့ကြောင်း IOC မှ ပြီးခဲ့သည့်သီတင်းပတ်က ထုတ်ပြန်ခဲ့သည်။
ဖုန်းခေါ်ဆိုမှုအတွင်း ဖန်းသည် ကျန်းမာရေးကောင်းပြီး စိတ်အေးလက်အေးရှိပုံရကြောင်းနှင့် ဖန်းရွှေက သူမ၏ ကိုယ်ရေးကိုယ်တာကိစ္စကို လေးစားစေချင်ကြောင်း ထုတ်ပြန်ချက်တွင်ဖော်ပြထားသည်။
ဖန်းနှင့် ဗီဒီယိုခေါ်ဆိုမှုအား မည်သို့စီစဉ်ကြောင်း IOC က ရှင်းပြခြင်းမရှိသော်လည်း အခြားသက်ဆိုင်ရာအဖွဲ့အစည်းများသည် သူမနှင့် ဆက်သွယ်ရန် အခက်အခဲများရှိနေသည်။
နေအိမ်၊ စားသောက်ဆိုင်တစ်ဆိုင်နှင့် ပေကျင်းရှိ လူငယ်တင်းနစ်ပွဲသို့ သွားရောက်ခဲ့သော ဖန်း၏ဓာတ်ပုံနှင့် ဗီဒီယိုများသည် အစိုးရပိုင်မီဒီယာနှင့်ဆက်စပ်နေသည့် တွစ်တာအကောင့်များတွင် နိုဝင်ဘာ ၁၉ နှင့် ၂၀ ရက်များတွင် ထွက်ပေါ်လာခဲ့သည်။
