နိုဝင်ဘာ ၁၂

မင်းတပ်မြို့မှ ပခုက္ကူမြို့သို့ ယနေ့ နိုဝင်ဘာ ၁၁ ရက် နံနက်ပိုင်းတွင် ထွက်ခွာသွားသော စစ်ယာဉ်တန်းတွင် မင်းတပ်မြို့က မတရား ဖမ်းဆီးခံထားရသူများ ပါသွားကြောင်း ဒေသခံများထံမှ သတင်းရရှိသည်။

အဆိုပါယာဉ်တန်းတွင် သံချပ်ကာ ကားနှစ်စီး ပါဝင်ပြီး မင်းတပ်မြို့ပေါ်၌ အကြောင်းအမျိုးမျိုးဖြင့် မတရား ဖမ်းဆီးထားသူများကို ပခုက္ကူထောင်သို့ ပို့ဆောင်ရန် ခေါ်ဆောင်သွားကြခြင်း ဖြစ်သည် ဟု ဒေသခံများက ယူဆနေကြသည်။

''အရင်က မင်းတပ်မှာ ဖမ်းခံရတဲ့ သူတွေကို ကြုံတဲ့ကားနဲ့ပဲ ရဲအစောင့်အရှောက်နဲ့ ပခုက္ကူထောင်ကို ပို့ကြတာ။ ဘယ်သူမှတောင် မသိကြဘူး။ ကာယကံရှင် မိသားစုတွေတောင် မသိလိုက်ဘူး။ အခုကျတော့ စစ်ယာဉ်တန်းနဲ့ အဖမ်းဆီးခံလူတွေကို ခေါ်သွားမယ်ဆိုတဲ့ သတင်းက ထွက်နေတယ်။ ကျွန်တော်အထင် တမင်များ သတင်းလွှင့်တာလား မသိဘူး။ CDF မင်းတပ် အဖွဲ့တွေက လမ်းမှာ ကြားဖြတ်တိုက်မှာ ကြောက်လို့ ဖမ်းဆီးခံရတဲ့သူတွေကို လူသားဒိုင်း သဖွယ် ကာဗာလုပ်ပြီး ထွက်သွားကြတဲ့ သဘောပဲ ဖြစ်မယ်''ဟု မင်းတပ်ဒေသခံ တစ်ဦးက ပြောသည်။

မတူပီမြို့မှ ဆင်းလာသည့် အဆိုပါ စစ်ယာဉ်တန်းသည် မတူပီ-မင်းတပ် နေ့ဝက်ခရီးကို ၁၀ ရက် ကြာအောင်လာခဲ့ရကြောင်းနှင့် လမ်းခရီးတွင် CDF-မင်းတပ် အဖွဲ့၏ ကြားဖြတ် တိုက်ခိုက်မှုကြောင့် စစ်ကောင်စီ တပ်သား ၇၀ နီးပါး သေဆုံးခဲ့ပြီး အများအပြား ဒဏ်ရာ ရရှိခဲ့ကြောင်းလည်း ဒေသခံသတင်းရင်းမြစ်များထံမှ သိရသည်။

ပြီးခဲ့သည့် လပိုင်းကလည်း ဟားခါးမှ ထန်တလန်မြို့သို့ ထွက်ခွာသည့် စစ်ကြောင်းသည် ဒေသခံများကို ဖမ်းဆီးကြိုးတုပ်၍ စစ်ကားတစ်စီးနှင့် တစ်စီး အကြားတွင် လူသားဒိုင်သဖွယ် ခေါ်ဆောင်သွားခဲ့ပြီး လေးမိုင်ခရီး အရောက်တွင် ပြန်လည် လွှတ်ပေးခဲ့သည်။