နိုဝင်ဘာ ၆
စစ်ကိုင်းတိုင်းဒေသကြီး၊ ပင်လည်ဘူးမြို့နယ်ရှိ ကျေးရွာများတွင် ဖြစ်ပွားခဲ့သည့်တိုက်ပွဲများ၌ စစ်ကောင်စီဘက်မှ အယောက် ၄၀ ဝန်းကျင်သေဆုံးကာ ဒေသခံ PDF ပူးပေါင်းတပ်မှ ငါးဦးကျဆုံးခဲ့ကြောင်း Pinlebu-PDF ၏ တာဝန်ရှိသူတစ်ဦးက ပြောသည်။
ယမန်နေ့ နိုဝင်ဘာလ ၅ ရက် နံနက်ပိုင်းတွင် ပင်လယ်ဘူးမြို့နယ် အရှေ့ပိုင်းရှိ မလိမ်းတုံးရွာနှင့် ပင်တုံးကျေးရွာ အနီးတစ်ဝိုက်တွင် တိုက်ပွဲဖြစ်ပွားခဲ့ပြီး PDF တပ်ဖွဲ့ဝင် ငါးဦး ကျဆုံးခဲ့သည်ဟု ဆိုသည်။
အဆိုပါတိုက်ပွဲမှာ ယနေ့ နိုဝင်ဘာလ ၆ ရက် နံနက်ပိုင်းအထိ တိုက်ပွဲပြင်းထန်ခဲ့ပြီး စစ်ကောင်စီဘက်မှ စုစုပေါင်း အယောက် ၄၀ ၀န်းကျင် သေဆုံးမှုရှိခဲ့ကြောင်း ၎င်းက ပြောသည်။
“ ကျွန်တော်တို့က ကြိုစောင့်ပြီး တိုက်လိုက်တာ။ ကျွန်တော်တို့ဘက်က လက်နက်ငယ်နဲ့ အရင် ခြုံခိုတိုက်တဲ့သဘောမျိုး။ နောက်ပိုင်းကျ သူတို့ဘက်က အင်အားများနေတာနဲ့ နောက်ကိုပြန်ဆုတ်ပြီး တပ်ဖျောက်လိုက်ရတယ် ” ဟု Pinlebu-PDF၏ တာဝန်ရှိသူက ဆိုသည်။
စစ်ကောင်စီသည် ဖောင်းပြင်၊ ဝန်းသို၊ ကောလင်း၊ ကနီမြို့တို့ ဘက်မှ စစ်ကြောင်း လေးကြောင်း အင်အား ၇၀၀ ဝန်းကျင်ဖြင့် ဆက်လက်ထိုးစစ်ဆင်နေကြောင်း ၎င်းကဆိုသည်။
တိုက်ပွဲဖြစ်ရာ အနီးတစ်ဝိုက်ရှိ ကျေးရွာ ၁၀ ရွာခန့်မှ ပြည်သူများလည်း ထွက်ပြေးနေရပြီး စုစုပေါင်းတိမ်းရှောင်နေရသူ ဦးရေ ၅,၀၀၀ ကျော်ခန့်ရှိနေကြောင်း သိရသည်။
