အောက်တိုဘာ ၂၃

စစ်ကိုင်းတိုင်းဒေသကြီး၊ မုံရွာမြို့ရှိ နေရာ လေးခုကို ပြောက်ကျားစနစ်ဖြင့် တစ်ပြိုင်နက်တည်း တိုက်ခိုက်နိုင်ခဲ့ကြောင်း People’s Defence Force - South Monywa တာဝန်ရှိသူမှ ပြောသည်။

ယမန်နေ့ အောက်တိုဘာ ၂၂ ရက်နေ့ ညပိုင်း ၈နာရီ မိနစ် ၃၀ မှ ၉ နာရီ ဝန်းကျင်အတွင်း တိုက်ခိုက်မှုများကို အပြီးသတ်နိုင်ခဲ့ကာ Mytel ရုံးအစောင့် တစ်ဦး၊ စစ်ကောင်စီတပ်သား သုံးဦး၊ စစ်ကား တစ်စီး ထိခိုက်ခဲ့ကြောင်းသိရသည်။

"ကျွန်တော်တို့ ရဲဘော်တွေအားလုံး လူခွဲပြီး အချိန်တစ်ပြိုက်နက်ထဲ စခဲ့ကြတာ၊ ၆နာရီလောက်မှာ အစီစဉ်တွေဆွဲပြီး ၇ နာရီခွဲမှာ စပြီးအလုပ်လုပ်တယ်။ ၉နာရီလောက်မှာ မစ်ရှင်အောင်တယ်" ဟု People’s Defence Force - South Monywa တာဝန်ရှိသူမှ ပြောသည်။

တိုက်ခိုက်မှုဖြစ်စဉ်တစ်ခုမှာ မြဝတီရပ်ကွက်၊ ကျောက္ကာလမ်းတွင်ရှိသည့် စစ်တပ်ပိုင် Mytel ရုံးအတွင်းသို့ ဗုံးပစ်ထည့်ခဲ့ခြင်းဖြစ်ပြီး ရုံးအစောင့်ဝန်ထမ်းတစ်ဦးထိခိုက်သွားကြောင်း People’s Defence Force - South Monywa မှ ယမန်နေ့ ညပိုင်းအချိန်က ထုတ်ပြန်ထားသည်။

အဆိုပါဖြစ်စဉ်တွင် Mytel ရုံးအတွင်း၌ နိုင်ငံခြားသား နှစ်ဦးနှင့် မြန်မာ နှစ်ဦးရှိနေခဲ့၍ ၎င်းတို့ပါ ထိခိုက်နိုင်ကြောင်းနှင့် အမြန်ပြန်ဆုတ်လာရ၍ အခြေအနေ အသေးစိတ်ကို မသိခဲ့ရကြောင်းလည်း ဆိုသည်။

ဒုတိယတိုက်ခိုက်မှုမှာ သာစည်မီးပွိုင့်နှင့် ဘူတာအကြားတွင်ဖြစ်ပြီး စစ်ကောင်စီတပ်သားများရှိရာသို့ ဗုံးပစ်ထည့်ခြင်းဖြစ်ကာ အနည်းဆုံးတပ်သားနှစ်ဦး ထိခိုက်သွားကြောင်း People’s Defence Force - South Monywa ထံက သိရသည်။

တတိယ တိုက်ခိုက်မှုမှာ တရုတ်သုသာန်အနီးရှိ စစ်ကောင်စီစစ်ကြောင်းကို မိုင်းခွဲတိုက်ခိုက်ခဲ့ခြင်းဖြစ်ပြီး ကားတစ်စီး ထိခိုက်သွားကြောင်း ၎င်းက ဆိုသည်။

နောက်ဆုံးဖြစ်စဉ်မှာ မြို့တော်ခန်းမ ဗိုလ်ချုပ်ကြေးရုပ်အနီးရှိ ဓါတ်တိုင်အနား မိုင်းခွဲခဲ့ပြီး စစ်ကောင်စီတပ်သားတစ်ဦး ထိခိုက်ခဲ့ကြောင်း People’s Defence Force - South Monywa မှထုတ်ပြန်ထားသည်။

တိုက်ခိုက်မှုဖြစ်စဉ် အားလုံးအတွက် ထိခိုက်သေဆုံးမှုနှင့် ဒဏ်ရာရရှိမှု အသေးစိတ်ကို ရဲဘော်များ၏ လုံခြုံရေးအရ စောင့်ကြည့် မှတ်သားရန် မဖြစ်နိုင်သောကြောင့် အသေးစိတ် မဖော်ပြနိုင်ကြောင်းလည်း ထုတ်ပြန်ချက်တွင် ဖော်ပြထားသည်။

အဆိုပါ တစ်ပြိုင်နက် တိုက်ခိုက်မှုဖြစ်စဉ်တွင် ပြည်သူ့ကာကွယ်ရေး တပ်ဖွဲ့ဝင်တစ်ဦး ယမ်းစင်၍ လက်တွင်ထိခိုက်ဒဏ်ရာ (မစိုးရိမ်ရ) ရခဲ့ကြောင်းလည်း သိရသည်။