စက်တင်ဘာ ၂၅
စစ်ကိုင်းတိုင်းဒေသကြီး၊ ကလေးခရိုင်၊ မင်းကင်းမြို့နယ်အတွင်း တောင်တွင်းပြည်သူ့ကာကွယ်ရေးတပ်ဖွဲ့နှင့် အကြမ်းဖက်စစ်တပ်တို့ တိုက်ပွဲဖြစ်ပွားရာ စစ်ကောင်စီတပ်ဘက်မှ လေးဦးထက်မနည်းသေဆုံးပြီး ထိခိုက်ဒဏ်ရာရသူများရှိကြောင်း သိရသည်။
မင်းကင်းမြို့နယ်အတွင်းရှိ ကလေးဝ-မုံရွာ အာရှကားလမ်းမဘေး ဂုံညင်းကျေးရွာအနီးတွင် စက်တင်ဘာ၂၅ရက် နံနက်ပိုင်း တိုက်ပွဲဖြစ်ပွားခြင်းဖြစ်သည်။
“သူတို့က မင်းကင်းမြို့နယ်ထဲက ရွာတွေကို တောက်လျှောက်ဝင်ပြီး ရှာဖွေတယ်ဆိုပြီးဖျက်ဆီးတယ်။ အခုလည်း ဒီကောင်တွေအင်အား၈၀လောက်က ခြေလျှင်တတ်လာတာ။ အဲဒါကို တောင်တွင်းPDFက ကြားဖြတ်ဝင်တိုက်တာ”ဟု မင်းကင်းPDF နှင့်နီးစပ်သူက ပြောသည်။
စစ်ကောင်စီတပ်မှ မင်းကင်းမြို့နယ်ရှိ ကျေးရွာများကို ဝင်ရောက်ဖျက်ဆီးနေခြင်းကြောင့် ကျေးရွာအချို့မှ လူဦးရေ ၁,၀၀၀ကျော် ထွက်ပြေးတိမ်းရှောင်နေရကြောင်း သိရသည်။
