စက်တင်ဘာ ၂၅
မွန်ပြည်နယ်၊ မော်လမြိုင်မြို့တွင် ဆိုင်ကယ်လိုင်စင်လာလုပ်သူများ၏ အသက်အန္တရာယ်ကို တာဝန်ယူတော့မည် မဟုတ်ကြောင်း မွန်ပြည်နယ်ပြည်သူ့ကာကွယ်ရေးတပ်ဖွဲ့ (MPDF )က စက်တင်ဘာ ၂၄ရက်တွင် အသိပေးထုတ်ပြန် ကြေညာထားသည်။
အကြိမ်ကြိမ် သတိပေးထားသည့်ကြားမှ မော်လမြိုင်မြို့ရှိ ပြည်နယ် က.ည.န ရုံးတွင် လိုင်စင်လာလုပ်သူများကို စစ်ကောင်စီအား ကူညီထောက်ပံ့သူများအဖြစ် သတ်မှတ်မည်ဖြစ်ကြောင်း MPDFကဆိုသည်။
မော်လမြိုင် က. ည. န ရုံးတွင် လိုင်စင်လာမလုပ်ကြရန် ပြီးခဲ့သည့် စက်တင်ဘာ ၂၁ ရက် ကတစ်ကြိမ်၊ စက်တင်ဘာ ၂၃ ရက်တွင် တစ်ကြိမ် စုစုပေါင်း နှစ်ကြိမ်တိတိ MPDF က ဗုံးခွဲသတိပေးခဲ့သည် ဟုသိရသည်။
သတိပေးဗုံးဖောက်ခွဲပြီး နောက်တစ်နေ့ စက်တင်ဘာ ၂၄ ရက်တွင်လည်း အဆိုပါ က.ည.န ရုံးတွင် လိုင်စင်လုပ်သူများနှင့် စည်ကားနေဆဲဖြစ်ကြောင်း သိရသည်။
က.ည.နရုံး ဗုံးဖောက်ခွဲရခြင်းသည် စစ်ကောင်စီ၏ ဝင်ငွေရရှိနေမှုကို ဖြတ်တောက်ရန် လုပ်ဆောင်ခြင်းဖြစ်ကြောင်း MPDF က ထုတ်ပြန်ပြောဆိုထားသည်။
မွန်ပြည်နယ်အတွင်း စစ်အာဏာရှင်အမြစ်ပြတ်ရေးအတွက် MPDF နှင့်အတူ People's Defense Organization - Mawlamyine ကလည်းအတူပူးပေါင်း၍ ဆက်လက်တိုက်ပွဲဝင်သွားမည်ဖြစ်ကြောင်း ကြေညာထားသည်။