စက်တင်ဘာ ၁၁
မန္တလေးတိုင်းဒေသကြီး၊ ကျောက်ဆည်ခရိုင် ၊ကျောက်ဆည်မြို့ အရှေ့ဘက် ရှိ အကြမ်းဖက်စစ်ကောင်စီ၏ လုပ်ငန်းများကိုကူညီဆောင်ရွက်ပေးနေသည်ဟု ဒေသခံများကသတ်မှတ်ထားသည့် သာစည်လေး ကျေးရွာ၏ အုပ်ချုပ်ရေးမှူး ခင်မောင်တင်တင့် အပါအဝင်အမျိုးသားသုံးဦး၏ အသက်ကို အာမ မခံဟု Dragon Kyaukse Defence Force- DKDF အဖွဲ့က ဆိုသည်။
"မင်းတို့အသက်ကိုနှမြောရင် စစ်ကောင်စီခိုင်းတဲ့ကိစ္စတွေကို ရွာတွင်း အဓမ္မလုပ်ခိုင်းတာကိုချက်ချင်းရပ်တန်းကရပ်ပါ။ အဲလိုမှမဟုတ်ဘူးဆို မင်းတို့အသက်ကို ရက်တိုတိုနဲ့လာနှုတ်ပေးရလိမ့်မယ် " ဟု Dragon Kyaukse Defence Force- DKDF အဖွဲ့က ဆိုသည်။
အကြမ်းဖက် စစ်ကောင်စီတပ်ဖွဲ့ဝင်များသည် ကျေးရွာအတွင်းရှိ အိမ်ထောင်စုဇယားများနှင့် မှတ်ပုံတင်များကို အုပ်ချုပ်ရေးမှူး ခင်မောင်တင်တင့် ၊ ထွန်းဦး နှင့် မြင့်နိုင်မင်း တို့အဖွဲ့အား ကောက်ခိုင်းစေခဲ့ပြီး ခင်မောင်တင်တင့်တို့အဖွဲ့အနေဖြင့် ရွာအတွင်းသို့ လော်စပီကာကို အသုံးပြုကာ ခြိမ်းခြောက်စကားများဆိုကာ အတင်းအကျပ် စေခိုင်းမှုများ လုပ်ဆောင်နေကြောင်း ဒေသခံများက ဆိုသည်။
" သူတို့က ရွာထဲမှာ လော်စပီကာ နဲ့ခြိမ်းခြောက်မှုတွေလုပ်တယ်။ ရွာထဲမှာ နိုင်ငံရေး လုပ်တဲ့သူတွေကို သူက စစ်ကောင်စီကို ဖုန်းနဲ့ သတင်းပေးပြီး ဖမ်းခိုင်းမယ် ဆိုတာတွေ လော်စပီကာနဲ့ ပြောနေကြ။ စစ်ကောင်စီက ရွာတွေဘက်မှာ တစ်ရွာကို လူ အယောက်သုံးဆယ်လောက် တောင်းခိုင်းနေတာ အဲဒါကြောင့် ဒီလိုစာရင်းတွေအတင်းအကြပ် ကောက်နေတာ " ဟု Dragon Kyaukse Defence Force- DKDF က မြေပြင်အခြေအနေကို ရှင်းပြသည်။
ယနေ့ စက်တင်ဘာ ၁၁ ရက်နေ့ နံနက် ၁၀ နာရီဝန်းကျင် အချိန်ခန့်က ကျောက်ဆည်မြို့လယ်၊ ဆူးကုန်းရပ်ကွက်ရှိ ယခင်စစ်ခေါင်းဆောင် ဗိုလ်ချုပ်မှူးကြီး သန်းရွှေ ၏ အိမ် မျက်နှာစာအရှေ့ ကို Dragon Kyaukse Defence Force- DKDF က ဗုံးေဖာက်ခွဲမှု လုပ်ဆောင်ခဲ့သေးသည်။