တရုတ်အစိုးရ၏ ပြင်းထန်သော ကိုဗစ်ဗိုင်းရပ်စ်မူဝါဒအရ ရောဂါကူးစက်မှုတားဆီးရေး ပိုမိုတင်းကြပ်သော အစီအမံများ၊ ကုန်ပစ္စည်းတင်သည့် လုပ်ငန်းစဉ်များ နှေးကွေးခြင်းနှင့် နန်ဘိုမြို့သို့ ဆင့်ခေါ်ထားသော သင်္ဘောများ လမ်းကြောင်းပြောင်းရသဖြင့် တရုတ်ဆိပ်ကမ်းများစွာတွင် ပိတ်ဆို့မှုများဖြစ်ပွားနေသည်။
သြဂုတ်လ ၁၇ရက်က တရုတ်၏ ဒုတိယအကြီးဆုံးဆိပ်ကမ်းဖြစ်သော နန်ဘိုဆိပ်ကမ်းတွင် ကွန်တိန်နာ သင်္ဘော ၅၀ ကျော်သည် တန်းစီစောင့်ဆိုင်းနေရသလို နန်ဘိုဆိပ်ကမ်း၏ သင်္ဘောဆိပ်တစ်ခုတွင် ကိုဗစ်-၁၉ ကူးစက်သူတစ်ဦး တွေ့ရှိပြီးနောက် သြဂုတ်လ ၁၀ ရက်တွင် ကူးစက်ခံရသူ ၂၈ ဦးရှိရာမှ များပြားလာနေကြောင်း Refinitiv၏ အချက်အလက်များက ဖော်ပြနေသည်။
နိုင်ငံတကာရေကြောင်းပို့ဆောင်ရေးအဖွဲ့များက ၎င်းတို့၏ဖောက်သည်များအား နှောင့်နှေးကြန့်ကြာမှုများနှင့် လမ်းကြောင်း ပြင်ဆင်မှုများအတွက် သတိပေးခဲ့သည်။
CMA CGM မှ ပြေးဆွဲနေသော အနည်းဆုံး သင်္ဘော ၁၄ စင်း၊ Maersk သင်္ဘော ၅ စင်းနှင့် Hapag-Lloyd သင်္ဘော ၄ စင်းတို့သည် နန်ဘိုဆိပ်ကမ်းတွင် ဆိုက်ကပ်ခြင်းမပြုရန် ဆုံးဖြတ်ခဲ့ပြီး ဒါဇင်နှင့် ချီသော သင်္ဘောများစွာ၏ အချိန်ဇယားများကို ပြန်ညှိနေရကြောင်း သင်္ဘောကုမ္ပဏီများက ဆိုသည်။
“ခြွင်းချက်မရှိတဲ့ တရုတ်ရဲ့ မူဝါဒက ကူးစက်ရောဂါအတွက် ကောင်းပေမယ့် ပစ္စည်းတင်ပို့မှု ကွင်းဆက် အတွက် ဆိုးပါတယ်” ဟု အမေရိကန်အခြေစိုက် Sourcing Industry Group ၏ အမှုဆောင်အရာရှိချုပ် ဒေါင်းသူရက ပြောကြားခဲ့သည်။
“လာမယ့်အားလပ်ရက် ဈေးဝယ်ရာသီအပြင် ကျောင်းပြန်တက်တာနဲ့ အလုပ်ပြန်တက်နှုန်းမြင့်လာကို ထည့်သွင်း စဉ်းစားရင် အချိန်ကိုက်ဖြစ်ဖို့ ခက်ခဲပါတယ်”
ပြီးခဲ့သည့် သီတင်းပတ်က ဆိပ်ကမ်းတစ်ခုတွင် ကိုဗစ် -၁၉ ရောဂါပိုးတွေ့ရှိခဲ့ပြီးနောက် နန်ဘိုဆိပ်ကမ်း၏ ကုန်သေတ္တာ ၂၀ ရာခိုင်နှုန်းခန့်ကို လုပ်ကိုင်နေရသော ယင်းသင်္ဘောဆိပ်ကို ရောဂါကူးစက်မှုတားဆီးရန် ပိတ်လိုက်သော်လည်း သက်ရောက်မှုလျှော့ချရန် အားထုတ်မှုများကြောင့် နန်ဘိုဆိပ်ကမ်း ၏ကွန်တိန်နာ ကိုင်တွယ်မှုစွမ်းရည်ပမာဏသည် ဇူလိုင်လနေ့စဉ် ပျမ်းမျှပမာဏ၏ ၉၀ ရာခိုင်နှုန်းခန့်သို့ ပြန်လည်
ရောက်ရှိနေပြီဖြစ်ကြောင်း Ningbo Zhoushan Port Co က သြဂုတ်လ ၁၆ ရက် ညနေပိုင်းတွင် ထုတ်ပြန်ခဲ့သော ကြေညာချက်တစ်ခုတွင် ဖော်ပြခဲ့သည်။
"တရုတ်က ကမ္ဘာပေါ်မှာ ကုန်ပစ္စည်းတင်ပို့မှု လုပ်ငန်းစဉ်ရဲ့ အရေးကြီးတဲ့ အစိတ်အပိုင်းတစ်ခုဖြစ်ပါတယ်။ တရုတ်ကနေ ပိတ်တာဖြစ်ဖြစ်၊ နောက်ကျတာဖြစ်ဖြစ် ဖြစ်သွားတာနဲ့ ကုန်ချောပစ္စည်းထုတ်လုပ်ဖို့ ၂ ဆင့် ၃ ဆင့်လောက် နှောင့်နှေးစေနိုင်ပါတယ်" ဟု အမေရိကန်အခြေစိုက် LeanDNA၏ အမှုဆောင်အရာရှိချုပ် ရစ်ချက် လီဘိုဗစ်ဇ်က ပြောကြားခဲ့သည်။
လွန်ခဲ့သည့် ၂၁ ရက်အတွင်း ရောဂါကူးစက်မှုအန္တရာယ်များသည့် ဒေသများဖြစ်သော အိန္ဒိယ၊ လာအို သို့မဟုတ် ရုရှားကဲ့သို့သော ဆိပ်ကမ်းများတွင် ဆိုက်ကပ်ခဲ့သော သင်္ဘောများနှင့် ပတ်သက်ပြီး တရုတ်ဆိပ်ကမ်းများသည် ကြိုတင်တားဆီးရေးဆိုင်ရာ ကိုယ်ပိုင်စည်းမျဉ်းများချမှတ်ထားသည်။
