ဇန်နဝါရီ ၃ 

အက်စ်ထရာဇနက်ကာ (AstraZeneca) နှင့် အောက်စ်ဖို့ဒ် (Oxford) တက္ကသိုလ်တို့ ထုတ်လုပ်သည့် ကိုဗစ်-၁၉ ကာကွယ်ဆေးတစ်မျိုးနှင့် အိန္ဒိယပြည်တွင်းရှိ နိုင်ငံပိုင် အင်စတီကျူ့တစ်ခုက ကျောထောက်နောက်ခံပြုသည့် ကိုဗစ်-၁၉ ကာကွယ်ဆေးတစ်မျိုးတို့ကို အရေးပေါ်အသုံးပြုနိုင်သည့် ကိုရိုနာဗိုင်းရပ်စ် ကာကွယ်ဆေး နှစ်မျိုးအဖြစ် အိန္ဒိယ ဆေးဝါးစည်းမျဉ်းအုပ်ချုပ်ရေးအဖွဲ့မှ ပညာရှင်များက ထောက်ခံပေးထားကြောင်း အစိုးရက ဇန်နဝါရီ ၂ ရက်တွင် ပြောသည်။ 

အက်စ်ထရာဇနက်ကာနှင့် အောက်စ်ဖို့ဒ်၏ ကာကွယ်ဆေးကို ပြီးခဲ့သည့် သောကြာနေ့က မီးစိမ်းပြလိုက်ပြီဖြစ်သည့်အတွက် ကမ္ဘာ့ ဒုတိယမြောက် လူဦးရေအများဆုံး နိုင်ငံတွင် ကြီးမားသည့် ကာကွယ်ဆေးထိုးနှံမှု ကမ်ပိန်းတစ်ခုအတွက် လမ်းဖွင့်ပေးလိုက်ပြီဖြစ်ကြောင်း အစောပိုင်းတုန်းက အစိုးရဝန်ကြီးတစ်ဦးက ပြောခဲ့သည်။ 

ကာကွယ်ဆေး နှစ်မျိုးအတွက် အပြီးသတ် ဆုံးဖြတ်ချက်ကို ဗဟို ဆေးဝါး စံနှုန်းများ ထိန်းချုပ်ရေးအဖွဲ့အစည်း (CDSCO) အကြီးအကဲက လုပ်ဆောင်မည်ဖြစ်ကြောင်းနှင့် ၎င်းသည် ဇန်နဝါရီ ၃ ရက်တွင် သတင်းစာရှင်းလင်းပွဲတစ်ခု ခေါ်ယူထားကြောင်း အစိုးရက ပြောသည်။ 

ကမ္ဘာပေါ်တွင် အမေရိကန်၏နောက် ကိုဗစ်-၁၉ ရောဂါပိုး ကူးစက်ခံရသူအရေအတွက် ဒုတိယအမြင့်ဆုံး ရှိနေသည့် နိုင်ငံတွင် ကာကွယ်ဆေးတစ်ခုအတွက် အရေးတကြီး လိုအပ်နေသည်ကို ထောက်ဆလျင် အပြီးသတ်နောက်ဆုံး အတည်ပြုချက် လုပ်ငန်းစဉ်က လုပ်ရိုးလုပ်စဉ်တစ်ခု ဖြစ်လာဖွယ် ရှိနေသည်။ 

COVAXIN ဟု သိကြသော အခြား ကာကွယ်ဆေးတစ်မျိုးကို ဘာရတ် ဘိုင်အိုတက် (Bharat Biotech) နှင့် အစိုးရ ဦးစီးသော အိန္ဒိယ ဆေးဝါး သုတေသနကောင်စီတို့က ပြည်တွင်း၌ပင် ထုတ်လုပ်ထားခြင်း ဖြစ်သည်။ ထို ကာကွယ်ဆေးကိုလည်း အတည်ပြုနိုင်ကြောင်း သတင်းရင်းမြစ်များကို ကိုးကားပြီး ရိုက်တာက ပြီးခဲ့သည့် သောကြာနေ့က ဖော်ပြသည်။ သို့သော် ထို ကာကွယ်ဆေး၏ လက်တွေ့စမ်းသပ်ချက် ရလဒ်များနှင့်ပတ်သက်၍ များများစားစား မသိရသေးပေ။ 

“အထူးသဖြင့် သန္ဓေပြောင်း ဗိုင်းရပ်စ်မျိုးကွဲတွေ ကူးစက်မှုတွေ ဖြစ်နေတဲ့အချိန် လက်တွေ့စမ်းသပ်တဲ့ နည်းလမ်းနဲ့အတူ ကြိုတင်ကာကွယ်မှုတွေ ကောင်းကောင်းလုပ်ရင်းနဲ့ အများပြည်သူ အကျိုးအတွက် အရေးပေါ် အခြေအနေမှာ ကာကွယ်ဆေးကို အကန့်အသတ်နဲ့ အသုံးပြုဖို့အတွက် ခွင့်ပြုချက် ခွင့်ပြုသွားသင့်ပါတယ်” ဟု ဗြိတိန်တွင် ပထမဆုံး တွေ့ရှိခဲ့သည့် ပိုမိုကူးစက်မြန်သော ဗိုင်းရပ်စ်မျိုးစိတ်သစ်ကို ရည်ညွန်းရင်း COVAXIN အတွက် ပညာရှင်များ၏ ထောက်ခံချက်ပေးမှုကို အစိုးရက ကိုးကားပြောခဲ့သည်။ 

အက်စ်ထရာဇနက်ကာနှင့် အောက်စ်ဖို့ဒ်၏ ကာကွယ်ဆေးအတွက် အတည်ပြုချက်သည် စည်းမျဉ်းဆိုင်ရာ သတ်မှတ်ချက် အဆင့်ဆင့်ကို ကျော်ဖြတ်ရင်ဆိုင်ထားခဲ့ကြောင်း ယင်းက ပြောခဲ့ပြီး အသေးစိတ်အချက်အလက်များကို ထုတ်ပြန်ခဲ့ခြင်း မရှိပေ။ 

အိန္ဒိယ ဆေးဝါးစည်းမျဉ်းအုပ်ချုပ်ရေးအဖွဲ့အနေဖြင့် အထက်ပါ ကာကွယ်ဆေးနှစ်မျိုးစလုံးအတွက် တစ်ခုလျင် လေးပတ်ခြားလျက် နှစ်လုံးစီ ထိုးနှံမှုကို အတည်ပြုပေးသွားဖွယ်ရှိနေကြောင်း ယင်းကိစ္စနှင့်ပတ်သက်၍ သိရှိထားသည့် သတင်းရင်းမြစ်နှစ်ဦးက ဇန်နဝါရီ ၂ ရက်တွင် ရိုက်တာကို ပြောသွားခဲ့သည်။