ဒီဇင်ဘာ ၂၇ ၊ ၂၀၂၀

တရုတ်နိုင်ငံ၏ စမ်းသပ်သည့် ကိုရိုနာဗိုင်းရပ်စ် ကာကွယ်ဆေးများ စတင်လုပ်ဆောင်နေပြီဖြစ်သည်။ ကမ္ဘာလုံးဆိုင်ရာ ဝယ်ယူမှုအချက်အလက်များအရ တရုတ်ကုမ္ပဏီ သုံးခုသည် အင်ဒိုနီးရှားနှင့်ဘရာဇီးတို့ကဲ့သို့သော နိုင်ငံများနှင့် နှစ်နိုင်ငံသဘောတူညီချက်များ၌ သန်းပေါင်းရာနှင့်ချီသော ဆေးပုလင်းများ ထောက်ပံ့ရန် သဘောတတူ စာချုပ်များချုပ်ဆိုခဲ့သည်။

Pfizer-BioNTech နှင့် Moderna တို့၏ သာလွန်ကောင်းမွန်သော mRNA ကာကွယ်ဆေးများသည် ပိုမို သင့်လျောပြီး အကျိုးသက်ရောက်မှုရှိသော ရလဒ်များထွက်ပေါ်စေခဲ့သော်လည်း သယ်ယူပို့ဆောင်ချိန်တွင် ၎င်းတို့၏ နူးညံ့သိမ်မွေ့သော မျိုးဗီဇပစ္စည်းများကို မပြိုကွဲစေရန်တားဆီးထားနိုင်လောက်အောင် အေးခဲထားရန်မှာ အဓိက စိန်ခေါ်မှု တစ်ရပ်ဖြစ်သည်။

တရုတ်ကာကွယ်ဆေးကုမ္ပဏီများသည် လက်‌တွေ့ ကူးစက်မှုအား တိုက်ခိုက်နိုင်ရန် ခုခံအားတုံ့ပြန်မှုအား အမြင့်ဆုံးရောက်စေရန် များသောအားဖြင့် ကိုရိုနာဗိုင်းရပ်စ် တစ်ခုလုံးကို ချေမှုန်းခြင်းနှင့် လူနာများအား ကူညီရာတွင် ပိုမိုရှေးရိုးဆန်ပြီး အချိန်ကုန်သောချဉ်းကပ်မှုကို အသုံးပြုကြသည်။

ဤကာကွယ်ဆေးများသည် သယ်ယူပို့ဆောင်ရေးအတွက် ပိုမိုလွယ်ကူပြီး ခေတ်မီနည်းပညာမရှိဘဲ ပင်လယ်ရပ်ခြားဒေသများတွင် ထုတ်လုပ်နိုင်သည်။ နိုင်ငံများစွာအတွက် ပိုမိုနှစ်သက်ဖွယ်ကောင်းသော်လည်း ကာကွယ်ဆေးထိုးသူများ၏ ပွင့်လင်းမြင်သာမှုနှင့် အသေးစိတ်စမ်းသပ်မှု အချက်အလက်များမပါဝင်မှုနှင့် ပတ်သတ်၍ စိုးရိမ်ပူပန်ခြင်းများသည် အချို့အတွက် အဟန့်အထား ဖြစ်စေသည်။

ဒေတာ အချက်အလက် မလုံလောက်ခြင်း

Pfizer, Moderna နှင့် AstraZeneca နှင့် Oxford တက္ကသိုလ်မှထုတ်လုပ်သော ကာကွယ်ဆေးတို့၏ နောက်ဆုံးအဆင့် စမ်းသပ်မှုများမှရလဒ်များအားလုံးအား ကမ္ဘာတစ်ဝှမ်းမှ စိစစ်နိုင်ရန်အတွက် ပြန်လည်သုံးသပ်သည့် ဂျာနယ်များတွင်ဖော်ပြခဲ့သည်။

သို့သော်တရုတ်ကာကွယ်ဆေးကုမ္ပဏီများသည် အစောပိုင်းနှင့် အလယ်အဆင့်စမ်းသပ်မှုများမှ ရလဒ်များကိုသာထုတ်ပြန်ခဲ့ရာ အဆိုပါရလာဒ်များမှာ ကာကွယ်ဆေးစမ်းသပ်ထိုးခံရသောသူများတွင် မည်ကဲ့သို့လက္ခဏများပြသည်၊ ရောဂါရ ဖျားနာခြင်း  အမှန်တကယ်တားဆီးခြင်းရှိမရှိ ဆန်းစစ်ရန်အတွက် ဒီဇိုင်းလုပ်ထားခြင်း မဟုတ်ပေ။ အချို့သော ထိပ်တန်း ရလဒ်များကို အရာရှိများနှင့် ကုမ္ပဏီအကြီးအကဲများက ဖော်ထုတ်ခဲ့ကြသော်လည်း အငြင်းပွားဖွယ် တိုးချဲ့အရေးပေါ်အစီအစဉ်ကလွဲလို့ တရုတ်ကာကွယ်ဆေးကို အတည်မပြုရသေးပါ။

မြောက်ကာရိုလိုင်းနားရှိ Duke တက္ကသိုလ်၏ ကမ္ဘာလုံးဆိုင်ရာ ကျန်းမာရေးဆန်းသစ်တီထွင်မှုစင်တာမှ သုတေသီများသည် ကမ္ဘာတွင် ဦးဆောင်လျက်ရှိသော ကာကွယ်ဆေးကုမ္ပဏီများ၏ ကိုဗစ်-၁၉ ကာကွယ်ဆေး၏ ကတိကဝတ်များကိုခြေရာခံလျှက်ရှိသည်။ ၎င်းတို့၏ကိန်းဂဏန်းများအရ ကုလသမဂ္ဂက ကျောထောက်နောက်ခံပြုထားသော ကာကွယ်ဆေး COVAX များအပြင်      စမ်းသပ်မှုနောက်ဆုံးအဆင့်တွင်ရောက်ရှိနေသော တရုတ်ကုမ္မဏီ လေးခု အနက်သုံးခုသည် လက်တင်အမေရိက၊ အရှေ့တောင်အာရှနှင့် အရှေ့အလယ်ပိုင်းရှိ နိုင်ငံများသို့ ဆေးပမာဏသန်း ၃၈၀ နီးပါး ပေးရန် ကတိပြုထားသည်ကိုတွေ့ရသည်။

 ၎င်းသည် ကမ္ဘာတစ်ဝှမ်းတွင်ကတိပြုထားပြီးသော ၁၁.၆ ဘီလီယံပမာဏ၏ အနည်းငယ်မျှသာဖြစ်ပြီး အများစုမှာ ယူအက်စ်၊ အီးယူ၊ အိန္ဒိယနှင့် ယူကေနိုင်ငံများဖြစ်သည်။ တစ်ချိန်တည်းမှာပင် ခန့်မှန်းတွက်ချက်မှုပုံစံတစ်ခုက တကမ္ဘာလုံးဆေးအလုံအလောက်ရရှိနိုင်ဖို့ ၂၀၂၃ ခုနှစ် စက်တင်ဘာလအထိလောက် အချိန်ယူရမည်ဟုဆိုသည်။

Duke မှ သုတေသီများက သတိပေးပြောကြားသည်မှာ တရုတ်နိုင်ငံသည် ရုရှားကဲ့သို့ပင် ကာကွယ်ဆေးဖွံ့ဖြိုးရေးနှင့် ထုတ်လုပ်မှုကွင်းဆက်များမှာ နိုင်ငံပိုင်ယန္တရားများဖြစ်ပြီး အကြီးအကျယ် ထိန်းချုပ်ထားသောကြောင့် ၎င်းတို့၏ ပြည်တွင်းသုံးစွဲမှုနှင့် နိုင်ငံခြားတင်ပို့မှုအတွက် ကြိုတင်ငွေချေထားမှုများနှင့် ပတ်သက်၍ ပွင့်လင်းမြင်သာမှုသည် အခြားနိုင်ငံများထက် သိသိသာသာနည်းပါးသည်ဟုဆိုသည်။
 
ဆိုလိုသည်မှာ တရုတ်ကုမ္ပဏီများက နိုင်ငံခြားတိုင်းပြည်များသို့ကတိကဝတ်ပြုထားမှုသည် လူအများသိသည်ထက် ပိုနိုင်သည်ဟု သူတို့က ဆိုသည်။
 
ပင်လယ်ရပ်ခြားစမ်းသပ်မှုများအား အနီးကပ်စောင့်ကြည့်ခြင်း
 
အစောပိုင်းအဆင့်စမ်းသပ်မှုများသည် ယေဘုယျအားဖြင့် ကာကွယ်ဆေးသည်လုံခြုံမှုရှိမရှိနှင့် ကိုယ်ခံအားတုံ့ပြန်မှုကို နှိုးဆွပေးသည်ကို စစ်ဆေးခြင်းဖြစ်ပြီး နေရာမရွေး ကျန်းမာသောလူပုဂ္ဂိုလ်တိုင်းနှင့် စမ်းသပ်နိုင်သည်။ သို့သော်မှန်ကန်သောစမ်းသပ်မှုမှာ ဗိုင်းရပ်စ်နှင့်ထိတွေ့မိသူများကို အမှန်တကယ် ကူးစက်မှုမှ တားဆီးနိုင်ခြင်း ရှိမရှိ ဖြစ်သည်။
 
၎င်းကို အဓိကနည်းလမ်းနှစ်မျိုးဖြင့်ဆုံးဖြတ်နိုင်သည် - သိပ္ပံပညာရှင်များသည် ကာကွယ်ဆေးထိုးထားသော လူများအား ဗိုင်းရပ်စ်ပိုးနှင့် တမင်တကာထိတွေ့စေသည့် ကျင့်ဝတ်ဆိုင်ရာမေးခွန်းထုတ်စရာ "စိန်ခေါ်မှုဆိုင်ရာစမ်းသပ်မှုများ" ကိုအသုံးပြုခြင်း၊ (သို့) ဗိုင်းရပ်စ်ပျံ့နှံ့နေသည့် ဒေသတွင် ၎င်းတို့ကိုကာကွယ်ဆေးထိုးခြင်းဖြင့် မည်မျှဖျားနာသည်ကို မှတ်တမ်းတင်ခြင်းအားဖြင့်ဖြစ်သည်။
   
ဆေးဖော်ပြိုင်ဆိုင်မှုတွင် ဦးဆောင်ကုမ္ပဏီဖြစ်သော ပုဂ္ဂလိကပိုင် Sinovac Biotech သည် အခြားကာကွယ်ဆေးခြောက်မျိုးကိုလည်း ဈေးကွက်တင်ထားသည်ဟု သူတို့၏ ဝက်ဘ်ဆိုက်အရ သိရသည်။ Sinovac ၏ အမှုဆောင်အရာရှိချုပ် ယင် ဝေဒေါင်က မီဒီယာများကို စက်တင်ဘာလတွင် ပြောကြားခဲ့သည့် သူ၏ ဝန်ထမ်း ၉၀% ကို အရေးပေါ်အစီအဉ်၏ တစ်စိတ်တစ်ပိုင်းအနေဖြင့် CoronaVac စမ်းသပ်ထိုးပေးခဲ့သည်ဆိုခြင်းက လူအများအာရုံကျစရာဖြစ်စေခဲ့သည်။  
 
အများပြည်သူလေ့လာကြည့်ရှုနိုင်သည့် မှတ်တမ်းများအရ Sinovac သည်တရုတ်နိုင်ငံပြင်ပသို့ CovonaVac ဆေးပမာဏအနည်းဆုံး ၂၈၉ သန်းအား ပေးပို့ရန် ကတိပြုထားပြီး အများစုမှာကာကွယ်ဆေးကိုစမ်းသပ်ရန် သဘောတူထားသောနိုင်ငံများသို့ဖြစ်သည်။ အင်ဒိုနီးရှားနိုင်ငံတွင် ဆေးပမာဏ ၁၂၅ သန်းကျော်ကိုသာ သုံးစွဲရန်ရည်ရွယ်ထားပြီး သမ္မတဂျိုကိုဝီဒိုဒိုက နိုင်ငံသားသန်း ၂၇၀ ကိုအခမဲ့ထိုးပေးမည်ဟု ကတိပေးခဲ့သည်။ ချီလီအတွက် သန်း ၆၀ ကျော်၊ တူရကီအတွက် သန်း ၅၀ နှင့် ဘရာဇီးအတွက် ၄၆ သန်းဖြစ်သည်။ နိုင်ငံ လေးခုစလုံးသည် CoronaVac နောက်ဆုံးအဆင့် စမ်းသပ်မှုများ လုပ်နေကြသည်။
ပြီးခဲ့သည့်လက Sinovac သည် အဆင့် (၁) နှင့် အဆင့် (၂ ) စမ်းသပ်မှုဆိုင်ရာ အချက်အလက်များကို CoronaVac သည် ကျန်းမာသောလူများအနေဖြင့် သုံးစွဲရန်နှင့် ကိုယ်ခံစွမ်းအား တုန့်ပြန်မှုအားတိုးပွားစေကြောင်း ဆေးဘက်ဆိုင်ရာဂျာနယ် The Lancet တွင်ထုတ်ဝေခဲ့သည်။ သို့သော် ၎င်းသည်ကာကွယ်ဆေးထိုးထားသူများအား  COVID-19 ကူးစက်မှုအား တားဆီးနိုင်ခြင်းရှိမရှိ အချက်အလက်အား ထုတ်ပြန်ထားခြင်း မရှိသေးပေ။
 
အင်ဒိုနီးရှားရှိနိုင်ငံပိုင် ကုမ္ပဏီဖြစ်သည့် Bio Farma ကဒီဇင်ဘာ ၈ ရက်တွင်ပြောကြားရာတွင် CoronaVac သည် ၉၇ ရာခိုင်နှုန်း ထိရောက်ကြောင်း ကြားဖြတ်အချက်အလက်များက ပြသနေသည်ဟု ဆိုလိုက်ရာ အကောင်းဆုံးဖြစ်နေသော Pfizer က ၉၅ ရာခိုင်နှုန်းပဲရှိသဖြင့် သာလွန်နေသော သဘောဖြစ်နေသည်။  သို့သော ်အဆိုပါမှတ်ချက်စကားကို ချက်ချင်းရုပ်သိမ်းခဲ့ပြီး ထိရောက်မှုကို မဆုံးဖြတ်နိုင်သေးဟုပြောကြားခဲ့ကြောင်း Bloomberg ၏ သတင်းပေးပို့ချက်တွင်ပါရှိသည်။ ထိုနေ့မှာပင်  Sinovac က Bloomberg သို့ပြောကြားရာတွင် ဆေးစွမ်းထိရောက်မှုဒေတာများ မရနိုင်သေးပါဟုပါရှိသည်။
 
အချို့က Bio Farma သည် အဆင့်ကျော်လုပ်ဆောင်လိုက်ရာ ကာကွယ်ဆေးသည် ရောဂါကူးစက်ခံရမှု  မည်မျှတားဆီးနိုင်သည်ကိုတိုင်းတာသော ဆေးစွမ်းပြမှုတိုင်းတာချက်များရောထွေးကုန်သည်ဟု ဆိုသည်။  CoronaVac ၏ အစောပိုင်း အစီရင်ခံစာတွင် ကာကွယ်ဆေးထိုးနှံပြီးနောက် ဗိုင်းရပ်စ်အား တိုက်ထုတ်နိုင်သော ပဋိဇီဝများ မည်မျှ ထုတ်လုပ်နိုင်ကြောင်း ပြသသည့် seroconversion နှုန်း ၉၇ ရာခိုင်နှုန်းရှိကြောင်း ဖော်ပြထားသည်။
 
Sinovac ကာကွယ်ဆေး၏ဆေးစွမ်းပြမှုထိရောက်ချက်ကို တရုတ်ကုမ္ပဏီနှင့် ပူးပေါင်းခဲ့သော ဘရာဇီးနိုင်ငံ ဆော်ပေါ်လို အခြေစိုက် ဘူတန်တန်အင်စတီကျုက ဗုဒ္ဓဟူးနေ့တွင် ထုတ်ပြန်မည်ဟု မျှော်လင့်ရသည်။ သို့သော် လာမည့်လအထိ တရုတ်နိုင်ငံတွင် ပြန်လည်သုံးသပ်မည့် အချိန်အထိ အသေးစိတ်အချက်အလက်များကို ထိန်းထားရလိမ့်ဦးမည်ဟု Sinovac က ပြောထားပြန်သဖြင့် သံသယများပေါ်ပေါက်ခဲ့သည်။ ဘူတန်တန်အင်စတီကျူကတေ့ ကာကွယ်ဆေးသည် ဘရာဇီး၏ကျန်းမာရေးစည်းမျဉ်း Anvisa အရ အတည်ပြုရန် ခွင့်ပြုသည့် အနိမ့်ဆုံးထိရောက်မှုပမာဏ  ၅၀ရာခိုင်နှုန်းကျော်သည်ဟုသာ ဖော်ပြခဲ့သည်။
 
အင်စတီကျု၏အကြီးအကဲ ဒီမက်စ် ကိုဗက်စ်က Sinovac နှင့် စာချုပ်ချုပ်ဆိုထားသည့် စာချုပ်အရ ကုမ္ပဏီ၏ တစ်ခြားသော လက်ရှိလုပ်ကိုင်နေဆဲဖြစ်သော စမ်းသပ်မှုများထဲမှ " ဒေတာများ တစ်သတ်မတ်တည်း" ဖြစ်စေရေးအတွက် စေတနာ့ဝန်ထမ်း ၁၃၀၀၀ ကို စမ်းသပ်မှု၏ နောက်ဆုံးရလာဒ်ကို ထိန်းသိမ်းထားရလိမ့်ဦးမည်ဟုဆိုသည်။
 
Sinovac ၏ပြောရေးဆိုခွင့်ရှိသူက ကုမ္ပဏီသည် တရုတ်စည်းမျဉ်းစည်းကမ်းထိန်းကွပ်သူများက ပြန်လည်သုံးသပ်ပြီးနောက်တွင်သာ ဆေးစွမ်းထိရောက်မှုအချက်အလက်များကို ထုတ်ဖော်နိုင်မည်ဖြစ်ကြောင်း Bloomberg သို့ ပြောကြားခဲ့သည်။
 
ဘရာဇီး၏ ဘူတန်တန်သည် အိမ်တွင်းရေခဲသေတ္တာအပူချိန်တွင် သိုလှောင်ထားနိုင်သည့် ကာကွယ်ဆေးကို အာဂျင်တီးနား၊ ဥရုဂွေး၊ ပီရူး၊ အီကွေဒေါနှင့် ဟွန်ဒူးရပ်စ်နိုင်ငံများအပါအဝင် ဒေသတွင်းရှိ အခြားနိုင်ငံများသို့ရောင်းချရန် လုပ်ဆောင်နေသည်ဟု သိရသည်။
 
ပြီးခဲ့သည့်လက Anvisa သည်“ ပြင်းထန်သောဆိုးရွားသောအဖြစ်အပျက်” ဖြစ်ပြီးနောက် ဘူတန်တန် အင်စတီကျူ့နှင့် ပြဿနာတက်ကာ ဘရာဇီးတွင် စမ်းသပ်ခြင်းကိုရပ်ဆိုင်းခဲ့သည်။ ထိုအချိန်က Covas က ဖြစ်ပျက်ခဲ့ခြင်းသည် ကာကွယ်ဆေးနှင့်ဆက်နွှယ်မှု မရှိနိုင်ကြောင်း မဖြစ်နိုင်ကြောင်းပြောကြားခဲ့ကာ Sinovac သည်လာမည့်သမ္မတရွေးကောက်ပွဲအတွက် ရှေ့တန်းပြေးသမားနှစ်ဦး အကြားနိုင်ငံရေးအငြင်းပွားမှု၏ ကြားညပ်သွားခဲ့သည်ဆိုသော ကောလဟလများ ထွက်ပေါ်ခဲ့သည်။

တရုတ်ကာကွယ်ဆေးများသည် အခြားနေရာများတွင်လည်း အခြားဆုတ်ယုတ်မှုများကိုကြုံတွေ့နေရသည်။ ပြီးခဲ့သည့်အပတ်က ဝင်ငွေနည်းပါးသော နိုင်ငံပေါင်း ၁၀၀ နီးပါးအတွက် ကိုရိုနာဗိုင်းရပ်စ် ကာကွယ်ဆေးများကိုထောက်ပံ့ရန်ရည်ရွယ်ထားသော COVAX အစီအစဉ်အောက်မှ ဆေးတစ်သန်းကိုဝယ်ယူရန်  ကမ္ဘောဒီးယားက ဆုံးဖြတ်လိုက်ခြင်းသည် အချို့သောတရုတ်ကာကွယ်ဆေးထုတ်လုပ်သူများအတွက်
စော်ကားခံလိုက်ရသလိုဖြစ်စေသည်။

သြဂုတ်လတွင် တရုတ်ဝန်ကြီးချုပ် လီကာရှန် က ကမ္ဘောဒီးယားအပါအဝင် မဲခေါင်နိုင်ငံများသို့ တရုတ်တီထွင်ထားသော ကာကွယ်ဆေးအဆင်သင့်ဖြစ်ပြီဆိုပါက ၎င်းတို့ကို ဦး စားပေးလိမ့်မည်ဖြစ်ကြောင်း ပြောကြားခဲ့သည်။ အောက်တိုဘာလက နိုင်ငံခြားရေးဝန်ကြီး ဝန်ယီ က ကမ္ဘောဒီးယားသို့အလည်အပတ်ခရီးစဉ်တွင် ဤအချက်ကို ထပ်မံ ပြောကြားခဲ့သည်။

သို့သော်ကမ္ဘောဒီးယားဝန်ကြီးချုပ် ဟွန်ဆန်က ကမ္ဘာ့ကျန်းမာရေးအဖွဲ့မှ အတည်ပြုထားခြင်းမရှိသော ကာကွယ်ဆေးများကို သူ့နိုင်ငံကလက်ခံလိမ့်မည်မဟုတ်ကြောင်း ပြီးခဲ့သည့်အပတ်ကပြောကြားခဲ့သည်။ “ကမ္ဘောဒီးယားဟာအမှိုကပုံးမဟုတ်ဘူး၊ ကာကွယ်ဆေးစမ်းသပ်ဖို့နေရာလည်းမဟုတ်ဘူး။”ဟု သူက ဆိုခဲ့သည်။ ဤမှတ်ချက်သည် ကမ္ဘောဒီးယားအား အင်ဒိုနီးရှားနှင့်ဘရာဇီးတို့ကဲ့သို့ စမ်းသပ်မှုများမှပယ်ဖျက်နိုင်သော်လည်း COVAX မှ အသိအမှတ်ပြုပါက နိုင်ငံအနေဖြင့် ကာကွယ်ဆေးထိုးနိုင်မည်ဖြစ်သည်။ အောက်တိုဘာလတွင် တရုတ်နိုင်ငံသည် အမေရိကန်ဒေါ်လာ ၁၈ ဘီလီယံစီမံကိန်းကိုတွင် ပါဝင်ခဲ့သည်။

နိုင်ငံပိုင် ကုမ္ပဏီကြီး Sinopharm သည် ဈေးကွက်တွင် ပေကျင်းရှိကုမ္မဏီခွဲနှင့် ဝူဟန်ဌာနခွဲတွင် ထုတ်လုပ်သည့် အသက်မဝင်သေးသည့် ကာကွယ်ဆေး နှစ်ခု ပိုင်ဆိုင်ပြီး ပြည်ပသို့ဦးတည်သည့် ဆေးပမာဏသန်း ၇၀ ရှိသည်။ သို့ရာတွင် ထိုဆေးများတွင် အဆင့်မြင့် ကျောထောက်နောက်ခံရှိပြီး ဒူဘိုင်းအုပ်ချုပ်သူ Sheikh Mohammed bin Rashid Al Maktoum သည် Sinopharm ၏ ပေကျင်းဇီဝထုတ်ကုန်ဆိုင်ရာအင်စတီကျုမှ ဆေးအား နိုဝင်ဘာ ၃ ရက်က ထိုးနှံခဲ့ကြောင်း သူ၏တွစ်တာတွင်ဖော်ပြထားသည်။ ဒေသသတင်းမီဒီယာများအရ ထိုဒေသရှိ အခြားအဆင့်မြင့်အရာရှိကြီးများလည်း ဆေးထိုးခဲ့ကြောင်း သိရသည်။

ကာကွယ်ဆေးနှင့် ပတ်သက်သောအချက်အလက်များကို အာရပ်စော်ဘွားများပြည်ထောင်စုတွင် ပြုလုပ်ခဲ့သော လူ ၃၁၀၀၀ ကိုအဆင့်မြင့်စမ်းသပ်မှုများမှ ရရှိခဲ့ခြင်းဖြစ်ကာ နိုင်ငံပိုင်မီဒီယာများက ကာကွယ်ဆေးထိုးခံထားရသူ ၈၆ ရာခိုင်နှုန်းအား ကာကွယ်ထားပြီး ဆိုးဝါးသော လုံခြုံရေး စိုးရိမ်ပူပန်ဖွယ်မရှိကြောင်း ဖော်ပြထားသည်။ အသေးစိတ်အချက်အလက်များအာ ဖော်ပြခြင်း မရှိပေ။

ကြေညာချက်အပြီးတွင် အဘူဒါဘီမှ တာဝန်ရှိသူများက စီးပွားရေး၊ ခရီးသွားလုပ်ငန်းနှင့် ယဉ်ကျေးမှုဆိုင်ရာ လုပ်ငန်းများအပါအဝင် " နှစ်ပတ်အတွင်း လုပ်ဆောင်မှုများအားလုံးကို ပြန်လည်စတင်ရန်" အတွက် ဒေသခံအာဏာပိုင်များနှင့် စတင်လုပ်ကိုင်မည်ဟုပြောကြားခဲ့သည်။

Sinopharm ဆေးများသည် စက်တင်ဘာလတွင် ယူအေအီးတွင် နှင့် နိုဝင်ဘာလတွင်ဘာရိန်းတို့တွင် အရေးပေါ် ခွင့်ပြုချက်ရရှိခဲ့သည်။ အောက်တိုဘာလတွင် Sinopharm Group မှအကြီးအကဲ Liu Jingzhen က ၎င်း၏ဆေးများသည် ဂျော်ဒန်၊ ပီရူး၊ အာဂျင်တီးနားနှင့်အီဂျစ်တို့ အပါအဝင် နိုင်ငံ ၁၀ နိုင်ငံ၌ အဆင့် (၃)  စစ်ဆေးမှုများပြုလုပ်နေကြောင်း သတင်းစာရှင်းလင်းပွဲတစ်ခုတွင် ပြောကြားခဲ့သည်။

 ဤအတောအတွင်း ၎င်း၏ ကိုယ်ခံစွမ်းအားစနစ်အား ပိုမိုဖြစ်ပေါ်စေရန်  ဒုတိယမျိုးဆက် adenovirus vector အား အသုံးပြုသည့် CanSino Biologics သည် နိုင်ငံရပ်ခြားရှိကတိကဝတ်အားလုံးဖြစ်သည့်  သန်း ၂၀ ကို အင်ဒိုနီးရှားသို့ပေးပို့ရန် ကတိပေးခဲ့သည်ဟု Duke ၏အချက်အလက်များအရ သိရသည်။

AstraZeneca / Oxford တက္ကသိုလ် ကာကွယ်ဆေးကဲ့သို့ အလားတူချဉ်းကပ်မှုကို အသုံးပြုသော CanSino သည် ကာကွယ်ဆေးထိုးခြင်းခံရသူသည် ကမ္ဘာပေါ်တွင်ပထမဆုံးလူသားအနေဖြင့် လူအပေါ် စမ်းသပ်ခဲ့အချိန်တွင် အလွန်ပင် နာမည်ကြီးသွားသည်။