နိုဝင်ဘာ ၂

ကယားပြည်နယ်၊ ဖားဆောင်းမြို့နယ်၊မော်ချီးကျေးရွာအုပ်စု၊လိုခါးလိုကျေးရွာတွင် အောက်တိုဘာလ ၃၀ ရက် နေ့ ညပိုင်းက ပြည်ထောင်စု ကြံခိုင်ရေးနှင့် ဖွံ့ဖြိုးရေးပါတီ ( USDP ) ကိုယ်စားလှယ်လောင်းဆိုင်းဘုတ် နှစ်ခု ဖျက်ဆီးခံရကြောင်း သိရသည်။

လိုခါးလိုကျေးရွာ၊ရပ်ကွက်သစ် ( အောင်ချမ်းသာရပ်ကွက် ) နှင့် အောက်ရွာတို့တွင် စိုက်ထူးထားသည့် USDP ပါတီမှ ကိုယ်စားလှယ်လောင်း ဒေါ်ခင်နှင်းရယ်၊ဦးစောသီဟဲနှင့်ဦးစောမြရွှေတို့ ပါဝင်သည့် ဆိုင်းဘုတ် နှစ်ခုကျိုးချေဖျက်ဆီးခံရခြင်းဖြစ်ကြောင်း ပါတီပြောရေးဆိုခွင့်ရှိသူ ဦးမော်ရယ်က ပြောသည်။

“အခုလို ဖြစ်သွားတာ ကျနော်တို့ စိတ်မကောင်းဘူး။ကျနော်တို့ ပြည်နယ်သေးသေးလေးမှာ ဘယ်သူဘာ ဖြစ်လဲဆိုတာ သိနေတာပဲလေ။ မြို့ကြီးနဲ့မတူဘူးပေါ့လေနော်။ဒီလိုပဲပြောချင်ပါတယ်”ဟု ကယား ပြည်နယ် ကြံ့ခိုင်ရေး ပါတီ ပြောရေး ဆိုခွင့်ရှိသူ ဦးမော်ရယ်က မဇ္ဈိမကို ပြောသည်။

ယခုကဲ့သို့ ကိုယ်စားလှယ်လောင်းမဲဆွယ်ဆိုင်းဘုတ်ဖျက်ဆီးခံရမှုသည် ကယားပြည်နယ်အတွင်း ပထမဆုံး အကြိမ်ဖျက်ဆီးခံရခြင်းဖြစ်ကြောင်း ဦးမော်ရယ်က ဆိုသည်။

ထိုသို့ ကိုယ်စားလှယ်လောင်းများ၏ ဆိုင်းဘုတ်ဖျက်ဆီးခံရခြင်းနှင့် ပတ်သက်၍ USDPပါတီအနေဖြင့် ရွေးကောက်ပွဲကော်မရှင်သို့ တိုင်းကြားသွားမည်မဟုတ်သည့်အပြင် ဆိုင်းဘုတ်များကိုလည်း အသစ်ပြန်လည် စိုက်ထူမည်မဟုတ်ကြောင်း ဦးမော်ရယ်က ဆိုသည်။

ကယားပြည်နယ်၊ဖားဆောင်းမြို့နယ်တွင် USDPပါတီမှ ဒေါ်ခင်နှင်းရင်က ပြည်နယ်လွှတ်တော်ကိုယ် စားလှယ်လောင်းနေရာ၊ဦးစောသီဟဲမှ ပြည်သူ့ လွှတ်တော်ကိုယ်စားလှယ်လောင်း နေရာနှင့် ဦးစောမြရွှေမှ အမျိုးသားလွှတ်တော်ကိုယ်စားလှယ်လောင်းနေရာအသီးသီးတို့မှ ဝင်ရောက်ယှဉ်ပြိုင်သွားမည်ဖြစ်သည်။

ဖားဆောင်းမြို့ထဲတွင် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေး ပါတီ ကိုယ်စားလှယ်လောင်းများ၏ ဆိုင်းဘုတ်အား တွေ့ရစဉ် ( ဓာတ်ပုံ - စောသန်းထိုက်ဦး )

၎င်းကိုယ်စားလှယ်လောင်းများ၏ ဆိုင်းဘုတ်များပျက်စီးနေမှုပုံစံသည် သွေးရိုးသားရိုးပျက်စီးခြင်းမဟုတ်ဘဲ တမင်ဖျက်ဆီးခြင်းဖြစ်နိုင်ကြောင်း ခေတ္တမော်ချီးကျေးရွာအုပ်ချုပ်ရေးမှူး ဦးဝင်းချို ( ခ ) ဦးညီညီက ပြောသည်။

“ နွားတွေ ချည်တဲ့နားမှာ တစ်ခုဖြစ်လို့ မဟုတ်ပဲနဲ့ အောက်ရွာ ကျေးလက်ကျန်းမာရေးရှေ့က ဆိုင်းဘုတ် တစ် ခုပါဖြစ်တာဆိုတော့ ဒါသွေးရိုးသားရိုးမဟုတ်ဘူးလို့ ယူဆရတာ ဖြစ်တယ်”ဟု ဦးဝင်းချို ( ခ ) ဦးညီညီက ပြော သည်။

ဖားဆောင်မြို့နယ်တွင် မဲဆန္နနယ်အမှတ်( ၁ ) နှင့် အမှတ်( ၂ ) တို့အတွက်  မဲရုံ ၁၇ ရုံထားရှိထားသွား မည်ဖြစ်ပြီး မဲပေးခွင့်ရှိသူ ဦးရေစုစုပေါင်းမှာ ၁၄၉၆၄ ဦး ရှိကြောင်း သိရသည်။

အဆိုပါ မဲဆန္ဒနယ်အမှတ်(၁)နှင့်မဲဆန္ဒနယ်အမှတ်(၂)နေရာတို့တွင် အမျိုးသားဒီမိုကရေစီအဖွဲ့ချုပ် (NLD) ပါတီ၊ ကရင်အမျိုးသားပါတီ၊ ကယားပြည်နယ် ဒီမိုကရက်တစ်ပါတီ၊ အမျိုးသားဒီမိုကရေစီအင်အားစုပါတီ၊ ပြည်ထောင်စုကောင်းကျိုးဆောင်ပါတီ၊ ပြည်ထောင် စုကြံ့ခိုင်ရေးနှင့်ဖွံ့ဖြိုးရေးပါတီနှင့် တသီးပုဂ္ဂလကိုယ်စားလှယ်လောင်းများက ဝင်ရောက်ယှဉ်ပြိုင်သွားမည် ဖြစ်ကြောင်း သိရသည်။