ဩဂုတ်၊ ၁၅
ဗီယက်နမ်နိုင်ငံသည် ဆေးဝါးပစ္စည်းနှင့် ဆေးဝါးထုတ်လုပ်မှု၌ နိုင်ငံခြားရင်းနှီးမြုပ်နှံမှုများကို တိုးချဲ့နိုင်ရေးအတွက် ဥရောပသမဂ္ဂ အီးယူနှင့် လွဝ်လပ်သော ကုန်သွယ်ရေးသဘောတူညီမှုသစ်ရရန် ကြိုးပမ်းလျက် ရှိသည်။
တရုတ်အပေါ် အမှီပြုနေရသော ထုတ်လုပ်မှုအား ပုံစံပြောင်းခြင်းအဖြစ် အစိုးရက နိုင်ငံအား ဖော်ဆောင်နေခြင်းနှင့်အတူ ယခုကဲ့သို့ ကြိုးပမ်းလာခြင်းလည်း ဖြစ်သည်။
နိုင်ငံ၏ အကြီးဆုံး ကုမ္ပဏီပေါင်းစုကြီးဖြစ်သည့် Vingroup က ဗီယက်နမ်နိုင်ငံအတွင်း ဆေးဖက်ဆိုင်ရာ ဆက်စပ်ပစ္စည်းများ ထုတ်လုပ်ရန် အိုင်ယာလန်အခြေစိုက် ဆေးဖက်ဆိုင်ရာအကြံပေး Medtronic နှင့် မိတ်ဖက်ပြုကြောင်း ဗုဒ္ဓဟူးနေ့တွင် ကြေညာသည်။
ကိုရိုနာဗိုင်းရပ်စ် ကပ်ဘေးကို ဗီယက်နမ်စီးပွားရေးက ခါးစည်းခံနေရချိန် ပြည်တွင်း ကုန်ထုတ်လုပ်သူများအား ဆေးဝါးထုတ်ကုန်များ ထုတ်လုပ်ရေးသို့ ချဲ့ထွင်ကြရန် အစိုးရ၏ တွန်းအားပေးခြင်းနှင့်အတူ ယခု သဘောတူညီချက် ထွက်ပေါ်လာခြင်းပဲ ဖြစ်သည်။
ပို့ကုန်ဦးဆောင်သော ဗီယက်နမ်စီးပွားရေးသည် ဒုတိယသုံးလပတ်၌ ဂျီဒီပီဖွံ့ဖြိုးနှုန်း ၀ ဒသမ ၃၆ ရာခိုင်နှုန်းသာ ရှိခဲ့ရာ ဇန်နဝါရီမှ မတ်လအထိ ကာလအတွင်း ၃ ဒသမ ၈ ရာခိုင်နှုန်း ရှိခဲ့ရာမှ သိသိသာသာ ကျဆင်းခြင်း ဖြစ်သည်။
ဗီယက်နမ်နိုင်ငံ၏ ဂျီဒီပီ ဖွံ့ဖြိုးနှုန်းသည် ၂၀၁၉ က ၇ ရာခိုင်နှုန်း ရှိခဲ့ရာမှ ၂၀၂၀ တွင် ၂ ဒသမ ၇ ရာခိုင်နှုန်းသို့ ကျဆင်းမည်ဟု နိုင်ငံတကာငွေကြေးရန်ပုံငွေအဖွဲ့က ခန့်မှန်းထားသည်။
