ဇွန် ၂၄
ရန်ကုန်တိုင်းဒေသကြီး မရမ်းကုန်းမြို့နယ်ရှိ မုဒိတာအိမ်ရာကို ရဲတပ်ဖွဲ့နှင့် ပူးပေါင်းအဖွဲ့တို့က ယနေ့ (ဇွန်လ ၂၄ ရက်) ညနေပိုင်းက ဝင်ရောက်စစ်ဆေးပြီးနောက် အထောက်အထားမဲ့နေထိုင်သည့် နိုင်ငံခြားသား ၂၇ ဦးကို ဖမ်းဆီးသွားကြောင်း (A) ဆောင်သာယာရေးကော်မတီဥက္ကဋ္ဌ ဒေါ်ဥမ္မာကြည်က အတည်ပြုပြောသည်။
မရမ်းကုန်းမြို့နယ် ရဲတပ်ဖွဲ့၊လူဝင်မှုကြီးကြပ်ရေးဦးစီးဌာနနှင့် သက်ဆိုင်ရာအုပ်ချုပ်ရေးမှုးအဖွဲ့များက ရှောင်တခင်ဝင်ရောက်စစ်ဆေးခဲ့ခြင်း ဖြစ်ပြီး မုဒိတာအိမ်ရာရှိ (A) ဆောင်မှ ခုနှစ်ဦး၊ (B) အဆောင်မှ ၁၀ ဦးနှင့် (D) အဆောင်မှ ၁၀ ဦး ကိုဖမ်းဆီးခဲ့ခြင်း ဖြစ်သည်။
မုဒိတာအိမ်ရာ (A) ဆောင်သာယာရေးကော်မတီ ဥက္ကဌ ဒေါ်ဥမ္မာကြည်က "အဲဒီအခန်းတွေကို ရိုက်ဖွင့်နေရတာ တော်တော်အချိန်ကြာတာ။ သူတို့က မဖွင့်ပေးဘူးလေ။ လူရှိတဲ့ပုံစံလဲမနေဘူး။ အိမ်သာထဲတို့ကုတင်အောက်တို့ အဲလိုရှာပြီးတွေ့တာပါ၊ သူတို့ကို" ဟု ပြောသည်။
ယခုဖမ်းဆီးခဲ့ရာတွင် တိုက်ခန်းအပြင်ကခတ်ထားသည့်တံခါးသော့များကို ဖျက်စီးကာ ဖမ်းဆီးခဲ့ရခြင်းဖြစ်ပြီး နိုင်ဂျီးရီးယားနိုင်ငံသားအများစုပါဝင်ကြောင်း တိုက်နေပြည်သူများထံမှ သိရသည်။
ထိုသို့ အထောက်အထားမဲ့ ဖမ်းဆီးခံရသော နိုင်ငံခြားသားများကို ဘုရင့်နောင်ရဲစခန်းသို့ ခေါ်ဆောင်သွားခြင်းဖြစ်နိုင်ကြောင်း ဒေါ်ဥမ္မာကြည်က ပြောသည်။
ယခုဖမ်းဆီးရမိသော မုဒိတာအိမ်ရာရှိ တိုက်ခန်းများကို ပြီးခဲ့သည့် ဇွန်လ ၄ ရက်နေ့ကလည်း ရဲတပ်ဖွဲ့နှင့် သက်ဆိုင်ရာ အုပ်ချုပ်ရေး တာဝန်ရှိသူများက ဝင်ရောက်စစ်ဆေးခဲ့ရာ နိုင်ဂျီးရီးယား နိုင်ငံသား အမျိုးသားတစ်ဦးနှင့် မြန်မာနိုင်ငံသား အမျိုးသမီးတစ်ဦးကို မူးယစ်ဆေးဝါးများနှင့်အတူ ဖမ်းဆီးရမိခဲ့သည်။
