ဒီဇင်ဘာ ၂၃ ။      ။ တားမြစ်ထားသော ကုန်များ တင်ဆောင်ထားပြီး အမှုထမ်း ခြောက်ဦး လိုက်ပါလာသော မြန်မာ ရေယာဉ်သင်္ဘောတစ်စင်းကို အိန္ဒိယ ကမ်းခြေစောင့်တပ်ဖွဲ့က ဖမ်းဆီးခဲ့ကြောင်း သိရသည်။

Little Andaman ကျွန်းအနီး တားမြစ် ကုန်စည် ၃၀၀ ကီလိုဂရမ် တင်လာသည့် မြန်မာသင်္ဘောကို အိန္ဒိယက ဖမ်းဆီးခဲ့ခြင်းဖြစ်သည်။

ဒီဇင်ဘာ ၂၀ ရက် နေ့လည်ပိုင်းက Little Andaman ကျွန်း၏ အရှေ့ဘက်တွင် ခုတ်မောင်းသွားလာခဲ့သည့် မြန်မာရေယာဉ် ‘CG Dornier’ ကို အိန္ဒိယ ကမ်းခြေစောင့်တပ်ဖွဲ့၏ ‘Aruna Asaf Ali’ သင်္ဘောက တွေ့ရှိခဲ့ခြင်းဖြစ်သည်ဟု အဆိုပါ အိန္ဒိယ ကမ်းခြေစောင့်တပ်ဖွဲ့က ထုတ်ပြန်သည်။

“ဒီရေယာဉ်က ကျွန်တော်တို့ဘက်က ရေဒီယိုနဲ့ ဆက်သွယ်တာကို အကြောင်းမပြန်ခဲ့ပါဘူး။ ဒါကြောင့် စုံစမ်းစစ်ဆေးဖို့ တားဆီးခဲ့ရပါတယ်။” ဟု အိန္ဒိယ ကမ်းခြေစောင့်တပ်က ထုတ်ပြန်သည်။

အိန္ဒိယ ကမ်းခြေစောင့်တပ်က သတိပေးသည့်အနေဖြင့် လေထဲသို့ သုံးချက် ပစ်ခတ်ခဲ့ပြီးနောက် မြန်မာ ရေယာဉ် ရပ်တန့်ပေးခဲ့သည်ဟု သိရသည်။

ယင်းနောက် အိန္ဒိယကမ်းခြေစောင့်တပ်ဖွဲ့က အဆိုပါ ဖမ်းဆီးထားသည့် မြန်မာသင်္ဘောကို ပေါ့ဘလဲ ဆိပ်ကမ်းသို့ လွှဲပြောင်းပို့ဆောင်ပေးထားခဲ့သည်ဟု သိရသည်။

လက်ရှိအချိန်တွင် ကနဦးစုံစမ်းစစ်ဆေးမှု ပြုလုပ်ထားပြီး ဖမ်းဆီးခံ မြန်မာရေယာဉ်ပေါ်ပါ ပစ္စည်းများသည် တားမြစ် မူးယစ်ဆေးများ ဖြစ်ဖွယ် ရှိသည်ဟု သိရသည်။