ပွင့်ဖြူ၊ ဇွန် ၅ ရက် ။ ။ အသက် ၁၅ နှစ်အရွယ် မိန်းကလေးတစ်ဦးအား အဓမ္မပြုကျင့်ပြီး သတ်ခဲ့သူဟု ယူဆရသူအား ၁၄ နာရီအတွင်း ဖမ်းဆီးရမိခဲ့ ကြောင်း မင်းဘူးခရိုင်ရဲတပ်ဖွဲ့မှ သိရသည်။
ဖြစ်စဉ်မှာ မကွေးတိုင်းဒေသကြီး၊ ပွင့်ဖြူမြို့နယ်၊ ….ကျေးရွာတွင် ဖြစ်ပွားခဲ့ခြင်းဖြစ်ပြီး ဇွန် ၂ ရက်နေ့တွင် ရွာတောင်ဘက်ရေမြောင်းအတွင်း အဝတ်မပါသော မိန်းကလေးအလောင်းတွေ့ရှိရာမှ စစ်ဆေးစုံစမ်းခဲ့ပြီး ဖမ်းဆီးရမိခဲ့ခြင်း ဖြစ်သည်။
အဆိုပါရွာနေ ဒေါ်ဇင်မာဦး၏ သမီးဖြစ်သူ မ………မှာ ဇွန် ၂ ရက်နေ့ ည ၈ နာရီခန့်တွင် ရွာစျေးဆိုင်တွင် TV သွားကြည့်ရန် မိခင်အား ခွင့်တောင်းခဲ့ကြောင်း၊ ည ၁၁ နာရီခန့်ထိ နေအိမ်ပြန်ရောက်မလာသဖြင့် စျေေးဆိုင်အား သွားရောက်မေးမြန်းရာ ရောက်ရှိမလာကြောင်း မိဘများမှ သိခဲ့ရသည်။
“ ဇွန်လ ၂ ရက်နေ့၊ ၉ နာရီလောက်မှာ ကျေးရွာတောင်ဘက် တောင်မုန်းမြောင်းမကြီးအတွင့်းမှာ မိန်းကလေးအလောင်းတွေ့တယ်လို့ လူတစ်ယောက်က လာရောက်သတင်းပေးတဲ့အတွက် ရဲတပ်ဖွဲ့က သွားရောက်စစ်ဆေးခဲ့တဲ့အခါကျမှ မိဘတွေက သူ့သမီးဖြစ်နေတာကို သိခဲ့ရတယ်” ဟု မင်းဘူးခရိုင်ရဲတပ်ဖွဲ့မှူး ဒုရဲမှူးကြီး ညီညီဝင်းက ပြောသည်။
သေသူ၏ လည်ပင်းတွင် ဒဏ်ရာတွေ့ရှိသောကြောင့် ပ ၅၁/၂၀၁၉ဖြင့် အမှုဖွင့်လှစ်ခဲ့ပြီး စစ်ဆေးရာ အဓမ္မပြုကျင့်ခံရသော လက္ခဏာများ တွေ့ရှိခဲ့သည်ဟု ရဲတပ်ဖွဲ့မှ သိရသည်။
“ ရဲတပ်ဖွဲ့က သွားရောက်စစ်ဆေးခဲ့တဲ့အခါ ပွင့်ဖြူဆေးရုံကို ပို့တယ်။ ကလေးမလည်ပင်းမှာ ညိုမည်းဒဏ်ရာ၊ နှာခေါင်းက အမြှုပ်ထွက်နေတယ်။ မအင်္ဂါမှာလည်း ဒဏ်ရာတွေ့နေတဲ့အတွက် ကျွန်တော်တို့က ဆရာဝန်ကြီးကို ထပ်မံစစ်ဆေးစေခဲ့တဲ့အခါမှာ Rape လုပ်ထားတဲ့လက္ခဏာကို ထပ်မံစစ်ဆေးတွေ့ရှိခဲ့ရတယ်၊ တွေ့ခဲ့ရတဲ့အတွက် ပုဒ်မ ၃၀၂ ကနေ ပုဒ်မ ၃၀၂/၃၇၆ ကို ပြောင်းလဲစစ်ဆေးခဲ့တာပါ” ဟု မင်းဘူးခရိုင်၊ ရဲတပ်ဖွဲ့မှူး ဒုရဲမှူးကြီး ညီညီဝင်းက ပြောသည်။
လက်ရှိတွင် ကျူးလွန်သူကို ဖမ်းဆီးစစ်ဆေးနေပြီး တစ်ရွာတည်းနေ ညီညီ ဆိုသူ ဖြစ်ကြောင်း ထပ်မံသိရသည်။
“ လတ်တလော တရားခံကို ဖမ်းဆီးစစ်ဆေးနေပါတယ်၊ တရားခံကတော့ ဇီးကိုင်းတစ်ရွာတည်းနေ ဦးသောင်းထွန်းရဲ့သား ညီညီ ၃၃ နှစ်ဖြစ်ပါတယ်၊ ပြစ်မှုကျုးလွန်ကြောင်း စစ်ဆေးပေါ်ပေါက်လို့ ဖမ်းဆီးပြီး တရားစွဲဆိုနိင်ရန် ဆောင်ရွက်လျှက်ရှိပါတယ်” ဟု ဒုရဲမှူးကြီးညီညီဝင်းက ဆိုသည်။
အဆိုပါအမှုကို အားလုံးပူးပေါင်းဆောင်ရွက်ခဲ့သောကြောင့် ၁၄ နာရီအတွင်း ကျူးလွန်သူကို ဖော်ထုတ်ဖမ်းဆီးနိုင်ခဲ့ကြောင်း ရဲတပ်ဖွဲ့ဘက်မှ ဆိုသည်။
