ရန်ကုန်၊ ဧပြီ ၁ ။ ။ ရန်ကုန်မြို့တော်စည်ပင်သာယာရွေးကောက်ပွဲမှာ ယှဉ်ပြိုင်မှု ပြင်းထန်ခဲ့တဲ့ မြို့တော်ကော်မတီဝင်နေရာ ၆ နေရာလုံးမှာ NLD မှ ကိုယ်စားလှယ်လောင်းတွေ အနိုင်ရရှိခဲ့ပါတယ်။
ရန်ကုန်မြို့တော်စည်ပင်သာယာရွေးကောက်ပွဲရဲ့ ရလဒ်အားလုံးကို ရွေးကောက်ပွဲကော်မရှင်က ဧပြီလ ၁ ရက် နေ့ ညနေပိုင်းမှာ အပြီးသတ် ထုတ်ပြန်ပေးလိုက်ပြီဖြစ်ပါတယ်။
မြို့တော်ကော်မတီဝင်နေရာ ၆ နေရာအတွက် မဲဆန္ဒနယ်အမှတ် ၁ မှာတော့ NLD မှ ဦးဝင်းမြင့်သန်းက ဆန္ဒမဲ ၄၈၁၃၈ နဲ့ အနိုင်ရခဲ့ပြီး မဲဆန္ဒနယ်အမှတ် ၂ မှာ NLD မှ ဦးသူရအောင်က ဆန္ဒမဲ ၅၈၁၈၇ နဲ့ အနိုင်ရရှိခဲ့ပါတယ်။
မဲဆန္ဒနယ် အမှတ် ၃ မှာတော့ NLD က ဦးစိုးလွင်က ဆန္ဒမဲ ၂၈၇၈၀ နဲ့ အနိုင်ရခဲ့ပြီး အမှတ် ၄ မှာတော့ NLD က ဦးစိန်အုန်းက ဆန္ဒမဲ ၅၃၈၇၆ နဲ့ အနိုင်ရခဲ့ပါတယ်။
မဲဆန္ဒနယ် အမှတ် ၅ မှာတော့ NLD က နန့်စုရွှေစင် ခေါ် မဝိုင်းက ၃၂၇၂၆ အနိုင်ရခဲ့ပြီး အမှတ် ၆ မှာတော့ NLD မှ ဦးမင်းဟန်က ဆန္ဒမဲ ၅၉၂၁၇ အနိုင်ရရှိခဲ့တာဖြစ်ပါတယ်။
စည်ပင်သာယာရွေးကောက်ပွဲမှာ ဆိပ်ကမ်းမြို့နယ် ကော်မတီဥက္ကဋ္ဌ နေရာက လွဲရင် မြို့တော်အဆင့် ၆ ဦးနဲ့ မြို့နယ်အဆင့် ကော်မတီဝင် ၈၄ ဦးအနိုင်ရရှိခဲ့ပါတယ်။
ဒီရလဒ်ဟာ NLD ပါတီအနေနဲ့ ၉၁ ဦးဝင်ရောက်ယှဉ်ပြိုင်ခဲ့ရာမှာ ၉ဝ ဦးအနိုင်ရရှိခဲ့တာဖြစ်ပါတယ်။
မတ်လ ၃၁ ရက်နေ့မှာ ကျင်းပခဲ့တဲ့ ရန်ကုန်မြို့တော်စည်ပင်သာယာရွေးကောက်ပွဲမှာတော့ နေရာ ၁ဝ၅ နေရာ မှာ ကိုယ်စားလှယ်လောင်း ၂၇၂ ဦးဝင်ရောက်ယှဉ်ပြိုင်ခဲ့ကြတာဖြစ်ပါတယ်။
ဒီရွေးကောက်ပွဲအတွက် ရန်ကုန်မြို့က မဲပေးခွင့်ရှိသူ ၃ သန်းကျော်ရှိပေမယ့် ရွေးကောက်ပွဲဆိုင်ရာ ပြည်သူ့ လှုပ်ရှားမှုအဖွဲ့ရဲ့ စောင့်ကြည့်သတင်းထုတ်ပြန်ချက်အရတော့ အမှန်တကယ်မဲပေးခဲ့တဲ့ ဦးရေက ၁ဝ ရာခိုင်နှုန်း သာ ရှိတယ်လို့ သိရပါတယ်။
