နေပြည်တော်(ဇန်နဝါရီ ၂၅ရက်၊ ၂၀၁၉ခုနှစ်)။ ။ မြန်မာ-ဘင်္ဂလားဒေ့ရှ် နှစ်နိုင်ငံအကြား နေထိုင်သူများကို ‘နိုင်ငံတကာနယ်နိမိတ်တွင် နေထိုင်သူများ’ ဟု သုံးနှုန်းခြင်းသည် တိုင်းပြည်အတွက် အန္တရာယ်ကို ဖိတ်ခေါ် သလို ဖြစ်နေသည်ဟုဆိုကာ ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ မင်းကင်းမြို့နယ်မှ ပြည်သူ့ လွှတ်တော်အမတ် ဦးမောင်မြင့်က ကန့်ကွက်လိုက်သည်။
ပြီးခဲ့သည့်နှစ် ဩဂုတ်လအတွင်းက နေပြည်တော်တွင် ပြုလုပ်သည့် မြန်မာ-ဘင်္ဂလားဒေ့ရှ် နှစ်နိုင်ငံ ဝန်ကြီး အဆင့်အစည်းအဝေး သဘောတူညီချက်တွင် “မြန်မာ-ဘင်္ဂလားဒေ့ရှ် နှစ်နိုင်ငံအကြား နိုင်ငံတကာ နယ်နိမိတ် တွင် နေထိုင်လျက်ရှိသူများ၊ အထူးသဖြင့် နိုင်ငံတကာနယ်နိမိတ်နှင့် မြန်မာပိုင်နက်မြေပေါ်တွင် တည်ဆောက် ထားသည့် ခြံစည်းရိုးအကြား နေထိုင်သူများ” ဟု သုံးစွဲမှုအပေါ် ဦးမောင်မြင့်က ကန့်ကွက်ခဲ့ခြင်း ဖြစ်သည်။
နှစ်နိုင်ငံနယ်နိမိတ်ဟု သုံးနှုန်းသင့်ပါသော်လည်း “နိုင်ငံတကာ နယ်နိမိတ်” ဟု သုံးစွဲမှုအပေါ် ဦးမောင်မြင့်က ဝေဖန်ကာ မည်သည့် အတွက်ကြောင့် သုံးစွဲခဲ့ရသည်။ အကယ်၍ မှားယွင်း သုံးနှုန်းခဲ့သည် ဆိုပါက ပြန်လည်ပြင်ဆင်ပေးရန် ဇန်နဝါရီ ၂၅ရက်၊ ပြည်သူ့လွှတ်တော်အစည်းအဝေးတွင် ၎င်းက မေးခွန်းထုတ်ခဲ့သည်။
“နှစ်နိုင်ငံ နယ်ခြား ဆိုရင် မြန်မာ-ဘင်္ဂလားဒေ့ရှ် နှစ်နိုင်ငံနဲ့ပဲ သက်ဆိုင်တဲ့ နယ်နိမိတ်လို့ အဓိပ္ပာယ်ထွက်ပြီး နိုင်ငံတကာနယ်နိမိတ်ဆိုရင်တော့ နိုင်ငံများနဲ့ သက်ဆိုင်တဲ့ နယ်နိမိတ်လို့ အဓိပ္ပာယ် ရပါတယ်။ နှစ်နိုင်ငံနဲ့ပဲ သက်ဆိုင်တဲ့ ကိစ္စကို နိုင်ငံတကာနဲ့ သက်ဆိုင်သယောင် သွပ်သွင်းပြီး သဘောတူညီချက် ထုတ်ပြန်တာကို လုံးဝကန့်ကွက်ပါတယ်” ဟု တပ်မတော်အစိုးရလက်ထက်က ဝန်ကြီးတစ်ဦးလည်းဖြစ်ခဲ့သူ ဦးမောင်မြင့်က လွှတ်တော်တွင် ပြောသည်။
ပြီးခဲ့သည့် ၁၉၆၆ခုနှစ်က မြန်မာနှင့် ပါကစ္စတန်(ထိုစဉ်က ဘင်္ဂလားဒေ့ရှ်ဟူ၍ ဖြစ်မလာသေး) ချုပ်ဆိုခဲ့သည့် နယ်နိမိတ်စာချုပ်နှင့် ၁၉၈ဝခုနှစ်က လက်မှတ်ရေးထိုးခဲ့သည့် Protocol နှစ်ခုစလုံးတွင် International Boundary(နိုင်ငံတကာနယ်နိမိတ်)ဟု သုံးနှုန်းခဲ့သည်ကို မတွေ့ရဟု ၎င်းက ဆိုသည်။
ထို့ပြင် ၁၉၈ဝခုနှစ် ဒီဇင်ဘာ ၁၉ရက်က ဒက္ကာတွင် ချုပ်ဆိုခဲ့သည့် နယ်နိမိတ်ပူးပေါင်းဆောင်ရွက်ရေး သဘောတူစာချုပ်တွင်လည်း အင်္ဂလိပ်လို ‘Common Border’ ၊ မြန်မာလို ‘နှစ်နိုင်ငံနယ်ခြား’ ဟုသာ အတိအလင်း ဖော်ပြထားကြောင်းလည်း ဦးမောင်မြင့်က ထောက်ပြခဲ့သေးသည်။
အပြည်ပြည်ဆိုင်ရာပူးပေါင်းဆောင်ရွက်ရေးဝန်ကြီး၊ ဦးကျော်တင်ကမူ မြန်မာ-ဘင်္ဂလားဒေ့ရှ် နှစ်နိုင်ငံအကြား နိုင်ငံတကာနယ်နိမိတ် ဟူသော အသုံးအနှုန်းသည် မှားယွင်းသုံးစွဲခဲ့ခြင်း လုံးဝ မဟုတ်ကြောင်း လွှတ်တော်တွင် ရှင်းလင်းပြောကြားသည်။
နယ်နိမိတ်သတ်မှတ်ချက်များတွင် ပြည်တွင်းနယ်နိမိတ်နှင့် နိုင်ငံတကာနယ်နိမိတ်ဟူ၍ နှစ်မျိုးရှိကြောင်း၊ ပြည်တွင်းရှိ ပြည်နယ်နှင့်တိုင်း တစ်ခုနှင့်တစ်ခု ခွဲခြားသတ်မှတ်သည့်မျဉ်းကို ပြည်တွင်းနယ်နိမိတ်ဟု ခေါ်ဆိုပြီး နိုင်ငံနှစ်ခုကို ခွဲခြားသတ်မှတ်သည့်အခါ နိုင်ငံတကာနယ်နိမိတ်ဟူ၍ နိုင်ငံတကာကျင့်ထုံးအရ တိကျ၊ မှန်ကန်စွာ သုံးစွဲခြင်းဖြစ်သည်ဟု ဦးကျော်တင်က လွှတ်တော်တွင် ပြောသည်။
“နိုင်ငံတကာနဲ့ ဆက်ဆံတဲ့အခါမှာ နိုင်ငံတကာကျင့်ထုံး၊ အသုံးအနှုန်းနဲ့အညီ အသုံးပြုရပါတယ်။ ဒါကြောင့် နိုင်ငံတကာ သဘောတူညီချက်တို့၊ ကြော်ငြာချက်တို့မှာ သုံးတဲ့အခါမှာတော့ နိုင်ငံတကာ အသုံးအနှုန်းအတိုင်း သုံးနှုန်းခြင်း ဖြစ်ပါတယ်” ဟု ၎င်းက ဆိုသည်။
၁၉၆၆ခုနှစ်က မြန်မာ-ပါကစ္စတန် ချုပ်ဆိုခဲ့သည့် နတ်မြစ် ပုံသေနယ်နိမိတ် သတ်မှတ်ခြင်းဆိုင်ရာ သဘောတူ စာချုပ်အပြင် ၁၉၈၈ခုနှစ်က မြန်မာ-ဘင်္ဂလားဒေ့ရှ် နှစ်နိုင်ငံအကြား ချုပ်ဆိုထားသည့် နတ်မြစ် မြောက်ဘက် ကုန်းပိုင်း နယ်နိမိတ်စာချုပ်နှင့် ၂၀၁၄ခုနှစ်၊ မြန်မာ-အိန္ဒိယ နှစ်နိုင်ငံနယ်စပ်ဒေသ ပူးပေါင်းဆောင်ရွက်မှုဆိုင်ရာ နားလည်မှုစာချုပ်လွှာတို့တွင်လည်း နိုင်ငံတကာ နယ်နိမိတ်(International Boundary) ဟု သုံးစွဲခဲ့သည် ဟုလည်း ဝန်ကြီးက ပါဝါပွိုင့်ဖြင့် လွှတ်တော်တွင် ရှင်းလင်းခဲ့သည်။
အဆိုပါကိစ္စအတွက် ဦးမောင်မြင့်က သူ့အနေဖြင့် အမျိုးသားအကျိုးစီးပွားအတွက် ရည်တည်ပြီး ထိုမေးခွန်းကို မေးခဲ့ခြင်းဖြစ်သည်ဟု လွှတ်တော်အစည်းအဝေးအပြီးတွင် သတင်းထောက်များကို ပြောသည်။
“နှစ်နိုင်ငံနယ်နိမိတ်(Common Border)ဆိုရင် နှစ်နိုင်ငံပဲဆိုင်တယ်။ ဘယ်သူမှ လာစွက်လို့မရဘူး။ ဒါပေမယ့် နိုင်ငံတကာနယ်နိမိတ် ဆိုလို့ရှိရင်တော့ဖြင့် တို့အတွက် ကောင်းလား၊ မကောင်းဘူးလား စဉ်းစားရမှာပေါ့” ဟု ၎င်းက ဆိုသည်။
မောင်တောမြို့နယ်၊ မှတ်တိုင်(၄၁) ရဲကင်းစခန်းအနီးတွင် နယ်စပ်ခြံစည်းရိုး အဆင့်မြှင့်တင်ခြင်းလုပ်ငန်း အတွက် လုံခြုံရေးဆောင်ရွက်နေသည့် မှတ်တိုင်(၄၁)ရဲကင်းစခန်းအား ဘင်္ဂလားဒေ့ရှ်နိုင်ငံဘက်ခြမ်း နယ်စပ် ခြံစည်းရိုးနှင့် မီတာ ၂၀၀ ခန့်အကွာ နေရာ ၃ နေရာတို့မှ လက်နက်ကြီး၊ လက်နက်ငယ်များဖြင့် အဖွဲ့တစ်ခု (စိစစ်ဆဲ)က ဇန်နဝါရီ ၂၄ရက်၊ နံနက်ပိုင်းတွင် လာရောက်ပစ်ခတ်ခဲ့သည်ဟု အစိုးရက သတင်းထုတ်ပြန် ထားသည်။
