တိုင်းရင်းသားစည်းလုံးညီညွတ်ရေးကို စစ်ရေးအရ ဖိအားပေး၍ အတင်းအကျပ်တည်ဆောက်မရဟုဆို

11 July 2018

တိုင်းရင်းသားစည်းလုံးညီညွတ်ရေးကို စစ်ရေးအရ ဖိအားပေး၍ အတင်းအကျပ်တည်ဆောက်မရဟုဆို

နေပြည်တော်၊ ဇူလိုင်၁၁ ။ ။ တိုင်းရင်းသား စည်းလုံးညီညွတ်ရေးသည်သာ ပြည်ထောင်စု မပြိုကွဲရေးနှင့် အချုပ်အခြာ အာဏာတည်တံ့ခိုင်မြဲရေးတို့အတွက် ထိန်းသိမ်းကာကွယ်နိုင်မည်ဖြစ်သောကြောင့် တိုင်းရင်းသားစည်းလုံးညီညွတ်ရေးကို စစ်ရေးအရ ဖိအားပေးခြင်းဖြင့် အတင်းအကျပ် တည်ဆောက်၍မရကြောင်း ကေအဲန်ယူ- ကရင်အမျိုးသားအစည်းအရုံး ဥက္ကဋ္ဌ ဗိုလ်ချုပ်ကြီး စောမူတူးစေးဖိုးက ပြောကြားသည်။

"တိုင်းရင်းသားစည်းလုံးညီညွတ်ရေးကို တိုင်းရင်းသားလူမျိုးများအကြား လွတ်လပ်မှု တန်းတူညီမျှမှု ၊ တရားမျှတမှု အခြေခံတရားများဖြင့်သာ တည်ဆောက်ရမည် ဖြစ်သည်။ လက်တွေ့လုပ်ငန်းဖြင့်သာ တည်ဆောက်ရမည်ဖြစ်သည်။ ထို့အတူပြည်ထောင်စုမပြိုကွဲရေး ၊ အချုပ်ခြာအာဏာ တည်တံ့ခိုင်မြဲ ရေးတို့ကို တိုင်းရင်းသားတို့၏ စည်းလုံး ညီညွတ်မှု အားဖြင့်သာ ကာကွယ် ထိန်းသိမ်းနိုင်မှာဖြစ်သည်"ဟု စောမူတူးစေးဖိုးကပြောကြားသည်။

ယနေ့ဇူလိုင်လ ၁၁ရက်နေ့က နေပြည်တော်ရှိ အပြည်ပြည်ဆိုင်ရာ ကွန်ဗန်းရှင်းဗဟိုဌာန (၂)တွင် ကျင်းပပြုလုပ်သော ၂၁ရာစုပင်လုံ တတိယအစည်းအဝေးဖွင့်ပွဲတွင် တိုင်းရင်းသားလက်နက်ကိုင် အဖွဲ့အစည်းများ၏ ကိုယ်စား အဖွင့်မိန့်ခွန်းတွင် ထည့်သွင်းပြောကြားခဲ့ခြင်းဖြစ်သည်။

အလားတူ တိုင်းရင်းသား လူမျိုးများ၏ နောက်ခံသမိုင်း၊ ရိုးရာယဉ်ကျေးမှု၊ စာပေ၊ ဘာသာစကားများနှင့် အမျိုးသားလက္ခဏာများတို့ရဲ့ မတူကွဲပြားမုှများကို လက်ခံအသိအမှတ်ပြုပြီး လူမျိုးပေါင်းစုံ ၊ ဘာသာပေါင်းစုံတို့်ဖြင့် ပြည်ထောင်စု လက္ခဏာတစ်ရပ်အဖြစ် နိုင်ငံသားအားလုံး ဖော်ဆောင်ကြရန်ဆက်လက် ပြောကြားခဲ့သည်။

"ဖော်ဆောင်ရာမှာလည်း ပင်လုံစိတ်ဓာတ်နဲ့အညီ ဒိိမိုကရေစီရေး၊ အမျိုးသားတန်းတူရေးနှင့် ကိုယ်ပိုင်ပြဋ္ဌာန်းခွင့်ကို အာမခံချက် အပြည့်အဝရှိသော ဒီမိုကရေစီနှင့် ဖက်ဒရယ်စနစ်တို့ကို အခြေခံသည် ပြည်ထောင်စုနိုင်ငံရေး ဆွေးနွေးပွဲရလဒ်များနှင့် အညီတည်ဆောက်ရန် ဖြစ်တယ်"ဟု ၎င်းက ဆက်လက်ပြောကြားသည်။

၂၁ရာစု တတိယအကြိမ် ပင်လုံညီလာခံသည် နိုင်ငံ၏ အနာဂတ်ရေးအတွက် ဆွေးနွေးမှုများဖြစ်သည့်အတွက်ကြောင့် ဆွေးနွေးမှု၊ ဆုံးဖြတ်မှုများသည် နိုင်ငံအနာဂတ်အတွက် အရေးကြီးသလို ဆွေးနွေးဆုံးဖြတ်ချက်များအားလုံးသည် တိုင်းရင်းသား စည်းစလုံးညီညွတ်ရေး၊ ပြည်ထောင်စုမပြိုကွဲရေး၊ပြည်ထောင်စု အချုပ်ခြာအာဏာ တည်တံ့ခိုင်မြဲ ရေးတို့အတွက် ပိုမိုကောင်းမွန်သည့်ဆုံးဖြတ်ချက်များ ရရှိစေဖို့ ကေအဲန်ယူ ကရင်အမျိုးးသားအစည်းအရုံး ဥက္ကဋ္ဌ ဗိုလ်ချုပ်ကြီး စောမူတူးစေးဖိုးက တိုက်တွန်းပြောကြားခဲ့သည်။

ယနေ့ ညီလာခံသို့ နိုင်ငံတော်သမ္မတ ဦးဝင်းမြင့်၊ နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ ပြည်ထောင်စုလွဋ္ဌ်တော်နာယက မန်းဝင်းခိုင်သန်း၊ တပ်မတော်ကာကွယ်ရေးဦးစီးချုပ် ဗိုလ်ချုပ်ကြီးမင်းအောင်လှိုင် ၊ ပြည်ထောင်စုဝန်ကြီးများ၊ တိုင်းရင်းသားလက်နက်ကိုင် အဖွဲ့အစည်းများမှ ခေါင်းဆောင်များ၊ နိုင်ငံရေးပါတီများ၊ သံရုံးတာဝန်ရှိသူများနှင့် လူမှုအဖွဲ့အစည်းများမှ ကိုယ်စားလှယ်များတက်ရောက်ခဲ့ကြသည်။