ရခိုင်ပြည်နယ်၌ ၄ လတာကာလအတွင်း နိုင်ငံသားဖြစ်ခွင့်ရှိသူ ၃၀၀ ကျော်ကို နိုင်ငံသားစိစစ်ရေးကတ်ပြား ထုတ်ပေးခဲ့

.

 စစ်တွေမြို့နယ်၊ သက္ကယ်ပြင် ကယ်ဆယ်ရေးစခန်းရှိ  Save the Children မူလတန်းကျောင်းဆောင် (ယာယီ)အား ဇန်န၀ါရီလဆန်းက တွေ့မြင်ရစဉ်။ ဓာတ်ပုံ - အေးချမ်းခိုင်

ရန်ကုန် ၊ ဇွန် ၁၂ ။            ။ ရခိုင်ပြည်နယ်အတွင်း၌ နိုင်ငံသားပြုခွင့်ရရန် လျှောက်ထားသူများအနက် နိုင်ငံသားဖြစ်ခွင့်ရှိသူ ၃၃၉ ဦးကို နိုင်ငံသားစိစစ်ရေးကတ်ပြားထုတ်ပေးခဲ့သည်ဟု အစိုးရဘက်က  ဇွန်လ ၁၂ ရက်နေ့တွင် သတင်းထုတ်ပြန်လိုက်သည်။

ယင်းသတင်းထုတ်ပြန်သည့်ကာလသည်  ၂၀၁၈ ခုနှစ် ဇန်နဝါရီ ၁ ရက်နေ့မှ ဧပြီလ ၃၀ ရက်နေ့ အထိလည်း ဖြစ်သည်။

၁၉၈၂ ခုနှစ် မြန်မာနိုင်ငံသား ဥပဒေအရ နိုင်ငံသားပြုခွင့်ရရန် လျှောက်ထားသူများထဲကမှ အသက်(၁၀) နှစ်ပြည့်သူ ၈၇ ဦး နှင့် အသက်(၁၈) နှစ်ပြည့်သူ ၂၅၂ ဦးကို နိုင်ငံသားစိစစ်ရေး(ပန်းရောင်)ကတ်ပြားများ ထုတ်ပေးခဲ့ခြင်းလည်းဖြစ်သည်။

အစိုးရထံတွင် နိုင်ငံသားပြုခွင့်ရရသူ ဟုတ်/မဟုတ် စိစစ်ခံရန် မည်မျှလျှောက်ထားခဲ့သည်ဆိုသည့် ကိန်းဂဏန်း အချက်အလက်ကိုမူ အစိုးရဘက်က ထုတ်ပြန်ခြင်းမရှိပေ။

မောင်တောမြို့နယ် ရွှေဇားကျေးရွာအုပ်စုအတွင်း၌ NV Card ထုတ်ပေးခဲ့သည့် ဦးရေ (၃၇၉) ဦး ၊ စစ်တွေမြို့နယ် အောင်မင်္ဂလာရပ်ကွက်၊ သက္ကယ်ပြင်ကျေးရွာနှင့် သဲချောင်းကျေးရွာတို့တွင် NV Card ထုတ်ပေးခဲ့သည့် ဦးရေ (၁၉၀၇) ဦး ထုတ်ပေးပြီး ဖြစ်သည်ဟု အစိုးရဘက်က ဆိုသည်။

စစ်တွေမြို့ သက္ကယ်ပြင် IDP စခန်း၊ စစ်တွေမြို့ ခေါင်းဒုက္ကာ IDP စခန်း၊ ကျောက်တော်မြို့ နိဒင် IDP စခန်းတို့ကို NV Card လုပ်ငန်းစဉ်အတွက် ရှေ့ပြေးဧရိယာ(Pilot Area) အဖြစ် သတ်မှတ်ဆောင်ရွက်နေသည် ဟုလည်း အစိုးရထုတ်ပြန်ချက်တွင် ပါရှိသည်။

မြန်မာနိုင်ငံအတွင်းနိုင်ငံသားမဟုတ်ဘဲ နေထိုင်ပါက NV Card များ ကိုင်ဆောင်ပြီး စည်းမျဉ်း/စည်းကမ်း များနှင့်အညီ နေထိုင်ရမည်ဟု အစိုးရဘက်မှ ရေးသားထုတ်ပြန်ထားသည်။

နိုင်ငံသားစိစစ်ရေး လုပ်ငန်များနှင့် ပတ်သက်ပြီး တိုင်တန်းမှုများကို ဌာနအတွင်း စုံစမ်းစစ်ဆေးပြီး မှန်ကန်မှု မရှိပါက အရေးယူဆောင်ရွက်နေကြောင်း မြန်မာနိုင်ငံ လူ့အခွင့်အရေးကော်မရှင်နှင့် အဂတိလိုက်စားမှု တိုက်ဖျက်ရေး ကော်မရှင်တို့မှလည်း တိုင်ကြားချက်များနှင့် ပတ်သက်ပြီး စုံစမ်းစစ်ဆေးတွေ့ရှိပါက ဥပဒေလုပ်ထုံးလုပ်နည်းများ နှင့်အညီ အရေးယူ ဆောင်ရွက်နေသည်ဟု အစိုးရထုတ်ပြန်ချက်တွင် ပါရှိသည်။