ဖေဖော်ဝါရီ ၅ ။ ။ ရုရှနိုင်ငံ မော်စကိုမြို့မှာ မကြုံစဖူး စံချိန်တင် ဆီးနှင်းကျဆင်းမှုနှင့် ကြုံတွေ့နေခဲ့ရပြီး လူ ၁ ဦး သေဆုံးသွားခဲ့ကြောင်း မြို့တော်ဝန်နှင့် ကယ်ဆယ်ရေး အေဂျင်စီများက ပြောသည်။
မြို့တော်၌ ၂၄ နာရီအတွင်း ဆီးနှင်းကျဆင်းမှု အတိုင်းအတာပမာဏမှာ တစ်လတာ ပျမ်းမျှ ကျဆင်းမှု၏ ထက်ဝက်ကျော်ပမာဏထိ ရှိနေခဲ့သည်ကို မြင်တွေ့ခဲ့ရသည်။ ဖေဖော်ဝါရီ ၄ ရက် မနက်ပိုင်းက မြို့တွင်း၌ ကျဆင်းထားသည့် နှင်းထု ဖုံးလွှမ်းမှုမှာ ၄၃ စင်တီမီတာအထိ ရှိခဲ့ကြောင်း သိရသည်။
" လောလောဆယ်ထိ တစ်ဦး သေဆုံးသွားပါတယ်" ဟု မော်စကို မြို့တော်ဝန် ဆာဂျီ ဆိုဗြန်နင်က ပြောသည်။ ပြင်းထန်တဲ့ ရာသီဥတုကြောင့် သစ်ပင်ပေါင်း ၂,၀၀၀ ကျော် လဲကျသွားခဲ့သည်ဟုလည်း သိရသည်။
" ခုနောက်ဆုံးရတဲ့ အချက်အလက်တွေရ ငါးယောက် ဒဏ်ရာ ရထားပါတယ်၊ ဂရုစိုက်ကြပါ၊ ရာသီဥတုက ခုထက် ပိုဆိုးလာဖို့ ရှိတယ်လို့ ခန့်မှန်းရပါတယ်" ဆိုပြီး ၎င်းက တွစ်တာကနေတဆင့် ထုတ်ပြန်သတိပေးထားသည်။
ပြင်းထန်ဆိုးရွားတဲ့ ရာသီဥတုကြောင့် လေယာဉ်ခရီးစဉ်ပေါင်း ၁၅၀ နီးပါးထိ နှောင့်နှေးကြန့်ကြာနေခဲ့ရပြီး ယင်းတို့အနက် ခရီးစဉ် ဒါဇင်များစွာကိုလည်း ဖျက်သိမ်းခဲ့ရသည်ဟု သိရသည်။
