ရန်ကုန်၊ ဖေဖော်ဝါရီ ၁ ။ ။ ရန်ကုန်တိုင်းဒေသကြီး ဗဟန်းမြို့နယ် တက္ကသိုလ်ရိပ်သာလမ်းရှိ နိုင်ငံတော်၏ အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၏ နေအိမ် ယနေ့ (ဖေဖော်ဝါရီ ၁ ရက်) နံနက်အစောပိုင်းက မီးရှို့ထားသော ဓာတ်ဆီပုလင်းဖြင့်အပစ်ခံရကြောင်း ဗဟန်းမြို့နယ် တိုင်းဒေသကြီး လွှတ်တော်မဲဆန္ဒနယ် (၂) လွှတ်တော်အမတ် ဦးသောင်းထွဋ်က မဇ္ဈိမသို့ အတည်ပြုသည်။
“ ၆နာရီနဲ့ ၆နာရီခွဲကြားလောက်ပေါ့။ ဝေလီဝေလင်းအချိန်မှာ ဟုတ်ပါတယ်ခင်ဗျ။ ဓာတ်ဆီပုလင်းက တစ်လုံးထဲ။ မီးရှို့ပြီးပစ်လိုက်တာပေါ့။ ဝါးရုံတောကိုနည်းနည်း စွဲလောင်သွားတာပေါ့ “ ဟု ၎င်းကဆိုသည်။
သို့သော် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်လည်း နေအိမ်တွင် မရှိသည့်အပြင် မည်သူမျှဒဏ်ရာရရှိမှုမရှိခဲ့ဟု ဦးသောင်းထွဋ်ကပြောသည်။
ခြံပြင်မှနေ၍ ဓာတ်ဆီပုလင်းကို မီးရှို့ကာ ထွက်ပြေးသွားခြင်းဖြစ်ပြီး CCTV မှတ်တမ်းထဲတွင်လည်း အဆိုပါ ဓာတ်ဆီပုလင်းပစ်၍ ထွက်ပြေးသူကို ရိုက်မိထား ကြောင်း ၎င်းကဆက်လက်ဆိုသည်။
ထို့ကြောင့် လတ်တလောတွင် ရဲတပ်ဖွဲ့ဝင်များလည်း ရောက်ရှိကာ စစ်ဆေးမှုများဆောင်ရွက်နေပြီး ပြစ်မှုကျူးလွန်သူကိုဖမ်းဆီးနိုင်ရန်ကြိုးပမ်း နေကြသည်ဟု သိရသည်။
