ကာရာကတ်စ်၊ ဗင်နီဇွဲလား၊ ဇန်နဝါရီ ၂၄ ။ ။ ဗင်နဲဇွဲလားသမ္မတ နစ်ကိုးလပ်စ်မာဒူယိုက အကယ်၍သူ၏ ဆိုရှယ်လစ်ပါတီက သူ့ကိုသမ္မတလောင်းအဖြစ် ထပ်မံရွေးချယ်ပါက ရွေးကောက်ပွဲ၌ ဒုတိယအကြိမ်ဝင်ရောက်ယှဉ်ပြိုင်သွားရန် အသင့်ဖြစ်နေပြီဖြစ်ကြောင်း အင်္ဂါနေ့က ကြွေးကြော်ခဲ့သည်။
“ကျနော်ဟာ ထောင်လွှားမရှိပဲ နှိမ့်ချတတ်တဲ့ အလုပ်တကယ်လုပ်တတ်တဲ့သူတစ်ဦး ဖြစ်ပါတယ်။ တကယ်လို့ ဗင်နီဇွဲလားနိုင်ငံရဲ့ ညီညွတ်သောဆိုရှယ်လစ်ပါတီအနေနဲ့ ကျနော်ဟာ သမ္မတလောင်းဖြစ်သင့်တယ်လို့ ယုံကြည်ထားမယ်ဆိုရင် ကျနော့်ဘက်က တာဝန်ထမ်းဆောင်ဖို့အသင့်ပါပဲ” ဟု အသက် ၅၅ နှစ်အရွယ် မာဒူယို က ကာရာကတ်စ်မြို့မှ သူ့ကိုထောက်ခံသူလူအုပ်ကြီးအား မိန့်ခွန်းမပြောမီတွင် သတင်းထောက်များကို ယခုလို ပြောဆိုခဲ့ခြင်းဖြစ်သည်။
ပြီးခဲ့သောနှစ်ကဖြစ်ပွားခဲ့သော နိုင်ငံအတွင်းရှိဆန္ဒပြပွဲများ၌ ဆန္ဒပြသူများကို အကြမ်းဖက်နှိမ်နင်းခဲ့သောကြောင့် ကုလသမဂ္ဂ၊ ဥရောပသမဂ္ဂနှင့် အမေရိကန်နိုင်ငံတို့၏ အရေးယူဒဏ်ခတ်ခြင်းကို ခံနေရသည့် ဗင်နီဇွဲလားနိုင်ငံ၌ လာမည့် ဧပြီလအကုန်တွင် သမ္မတရွေးကောက်ပွဲ ကျင်းပသွားရန် စီစဉ်ထားကြောင်း တိုင်းပြုပြည်ပြုလွှတ်တော် က အင်္ဂါနေ့၌ ကြေညာခဲ့သည်။
အတိုက်အခံပါတီများ၏ ဝေဖန်မှုနှင့်ကြုံတွေ့နေရသော်လည်း ဆိုရှယ်လစ်ပါတီ၏ ထိပ်သီးခေါင်းဆောင်တစ်ဦး ဖြစ်သူ ဒီယိုဒါဒိုကာဘယ်လိုက လက်ရှိသမ္မတမာဒူယိုသည် ၎င်းတို့ပါတီ၏ တစ်ဦးတည်းသော သမ္မတလောင်း အဖြစ် ဝင်ရောက်ယှဉ်ပြိုင်မည်ဟု လွှတ်တော်ထဲ၌ အတည်ပြုပြောဆိုထားခဲ့သည်။
“ကျနော်တို့ဘက်က ဘာပြသနာမှမရှိပါဘူး။ ဒီတော်လှန်ရေးကြီးကို ဆက်လက်ဖော်ဆောင်သွားဖို့အတွက် ကျနော်တို့ဘက်က သမ္မတလောင်းအဖြစ်ဝင်ပြိုင်မယ့်သူတစ်ဦးပဲရှိပါတယ်” ဟု သူက ပြောကြားခဲ့ပြီး အခြား ကိုယ်စားလှယ်များက “နစ်ကိုးလပ်စ်၊ နစ်ကိုးလပ်စ်” ဟု ကြွေးကြော်ခဲ့ကြသည်။
