စက်တင်ဘာ ၇ ။           ။ ၁. ပြည်ထောင်စု သမ္မတ မြန်မာနိုင်ငံတော် နိုင်ငံတော်သမ္မတ ဦးထင်ကျော်၏ ဖိတ်ကြားချက်အရ အိန္ဒိယဝန်ကြီးချုပ် နာရင်ဒြာ မိုဒီသည် ၂၀၁၇ ခုနှစ် စက်တင်ဘာ ၅ ရက်ကနေ ၇ ရက်အထိ မြန်မာနိုင်ငံသို့ တရားဝင် အလည်အပတ်ခရီး ရောက်ရှိလာသည်။ ယခု ခရီးစဉ်မှာ နှစ်နိုင်ငံခေါင်းဆောင်များအကြား ဆက်လက်ရှိနေသည့် အဆင့်မြင့်လယ်ဗယ် ချိတ်ဆက် ဆက်ဆံမှုများ၏ တစ်စိတ်တစ်ဒေသလည်း ဖြစ်သည်။ ယခု မိုဒီ၏ မြန်မာနိုင်ငံခရီးစဉ်မတိုင်ခင် ယမန်နှစ်အတွင်းကလည်း နိုင်ငံတော်သမ္မတ ဦးထင်ကျော်နှင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့သည်လည်း အိန္ဒိယသို့ တရားဝင် အလည်အပတ်ခရီးများ ရောက်ရှိထားခဲ့ပြီးလည်း ဖြစ်သည်။

၂. ဝန်ကြီးချုပ် မိုဒီအား ၂၀၁၇ ခုနှစ် စက်တင်ဘာ စက်တင်ဘာ ၅ ရက်က နေပြည်တော်ရှိ နိုင်ငံတော် သမ္မတအိမ်တော်တွင် နိုင်ငံတော်အခမ်းအနားနှင့် ဧည့်ခံကြိုဆိုခဲ့သည်။ ၎င်းသည် နိုင်ငံတော်သမ္မတ ဦးထင်ကျော်နှင့် တွေ့ဆုံခဲ့သလို သမ္မတဦးထင်ကျော်ကလည်း ၎င်းကို နိုင်ငံတော်ညစာနှင့် တည်ခင်းဧည့်ခံခဲ့သည်။ ၂၀၁၇ ခုနှစ် စက်တင်ဘာ ၆ ရက်တွင် ဝန်ကြီးချုပ် မိုဒီ ဦးဆောင်သည့် အိန္ဒိယကိုယ်စားလှယ်အဖွဲ့ နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ဦးဆောင်သည့် မြန်မာကိုယ်စားလှယ်အဖွဲ့တို့အကြား ဆွေးနွေးပွဲများ ပြုလုပ်ခဲ့ကြသည်။

နှစ်နိုင်ငံအကြား နီးကပ်ပြီး ချစ်ကြည်ရင်းနှီးသည့် ဆက်ဆံရေးများဖြင့် အကျိုးဖြစ်ထွန်းမှုများ ရှိနေခဲ့ခြင်းနှင့်အတူ ယင်းဆွေးနွေးပွဲများတွင် အပြန်အလှန် နွေးထွေးပြီး လှိုက်လှိုက်လှဲလှဲ ရှိလှသကဲ့သို့ အပြုသဘောဆောင်သည့် သဘောများဖြင့် ကျင်းပပြုလုပ်ခဲ့သည်။ ယင်းနောက် နိုင်ငံတော်၏ အတိုင်ပင်ခံပုဂ္ဂိုလ်နှင့် အိန္ဒိယဝန်ကြီးချုပ်တို့၏ ရှေ့မှောက်တွင် နှစ်နိုင်ငံအကြား အပြန်အလှန်သဘောတူစာချုပ်များ လက်မှတ်ရေးထိုး ဖလှယ်ခြင်းများကို ဆောင်ရွက်ခဲ့သည်။ အိန္ဒိယ-မြန်မာနှစ်နိုင်ငံအကြား ကျန်းမာရေး၊ ယဉ်ကျေးမှု၊ လူသားအရင်းအမြစ်တည်ဆောက်မှု၊ ပင်လယ်ရေကြောင်း လုံခြုံရေး နှင့် အခြားသော အဓိကကိစ္စရပ်များအကြား ပူးပေါင်းဆောင်ရွက်မှုဆိုင်ရာ နယ်ပယ်များတွင် သဘောတူစာချုပ်များ လက်မှတ်ရေးထိုးခဲ့ခြင်း ဖြစ်သည်။ ယင်းနောက် နှစ်ဘက်ခေါင်းဆောင်များ ပူးတွဲသတင်းစာရှင်းလင်းပွဲတစ်ရပ် ကျင်းပခဲ့သည်။

၃.  နေပြည်တော်ရှိ တရားဝင်တွေ့ဆုံမှု အခမ်းအနားများအပြင် အိန္ဒိယဝန်ကြီးချုပ် မိုဒီသည် ရန်ကုန်မြို့နှင့် ပုဂံ တို့ရှိ သမိုင်းဝင် ယဉ်ကျေးမှု အမွေအနှစ်နေရာများကို သွားရောက်လည်ပတ်ကြည့်ရှုဦးမည် ဖြစ်သည်။ ပုဂံတွင် သမိုင်းဝင် တန်ခိုးကြီး အာနန္ဒာ ဘုရားသို့ သွားရောက်ဖူးမြှော်မည်ဖြစ်သည်။ အိန္ဒိယ ရှေ့ဟောင်းသုတေသန လေ့လာမှုဆိုင်ရာ လမ်းညွှန်မှုအောက်တွင် မြန်မာနှင့် အိန္ဒိယ ရှေ့ဟောင်းသုတေသနပညာရှင်များက အာနန္ဒာဘုရားတွင် ပြုပြင်ထိန်းသိမ်းရေးလုပ်ငန်းများကို ဆောင်ရွက်နေလျက်ရှိသည်။ ရန်ကုန်သို့ ရောက်ရှိစဉ် မိုဒီသည် အမျိုးသားခေါင်းဆောင်ကြီး ဗိုလ်ချုပ်အောင်ဆန်း၏ အာဇာနည်ဗိမ္ပာန်သို့ သွားရောက်ဂါရဝပြုမည် ဖြစ်သည်။

ယင်းအပြင် ဗိုလ်ချုပ်အောင်ဆန်း ပြတိုက်နှင့် အခြားသော အထင်ကရ နေရာများသို့လည်း သွားရောက်လည်ပတ်ဦးမည် ဖြစ်သည်။ မိုဒီအနေဖြင့် ရန်ကုန်မြို့သို့ ရောက်ရှိစဉ် ယင်းတွင် အခြေချရောက်ရှိနေသော အိန္ဒိယအသိုင်းအဝိုင်းနှင့်လည်း တွေ့ဆုံသွားမည်ဖြစ်သည်။

၄.  နိုင်ငံတော်သမ္မတ ဦးထင်ကျော်နှင့် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်တို့ ယမန်နှစ် ၂၀၁၆  သြဂုတ်နှင့် အောက်တိုဘာတို့တွင် အိန္ဒိယသို့ တရားဝင်ချစ်ကြည်ရေးခရီးစဉ်များ အောင်မြင်စွာ သွားရောက်ထားနိုင်ခဲ့ချိန်နောက်ပိုင်း နှစ်နိုင်ငံအကြား ဖြစ်ပေါ်ထားခဲ့သော တိုးတက်မှုများနှင့်ပတ်သက်၍ ယခု နှစ်ဘက်ခေါင်းဆောင်များအကြား ဆွေးနွေးခဲ့ကြသည်။ ယခုလက်ရှိ တရားဝင်အပြန်အလှန် ချိတ်ဆက်မှုများ၊ စီးပွားရေး၊ ကုန်သွယ်ရေးနှင့် ယဉ်ကျေးမှုချင်း ဆက်ဆံမှုများ၊ ပြည်သူအချင်းချင်း ဆက်ဆံမှု ဆိုင်ရာ ကိစ္စရပ်များနှင့်ပတ်သက်၍ ဆွေးနွေးသုံးသပ်ခဲ့ကြသည်။

ယင်းအပြင် မြန်မာနိုင်ငံ၏ လွတ်လပ်၍ တက်ကြွသည့် ဘက်မလိုက်နိုင်ငံခြားရေးဝါဒ နှင့် အိန္ဒိယ၏ အရှေ့မျှော်ဝါဒ ၊ အိမ်နီးချင်း ဦးစားပေး မူဝါဒတို့အကြား  သဟဇာတ ဖြစ်မှုတို့ကို ထင်ဟပ်နေသည့် ကိစ္စရပ်များနှင့်ပတ်သက်၍ ဆွေးနွေးခဲ့ကြသည်။ ယင်းအပြင် နှစ်ဘက်ပြည်သူများအတွက် အပြန်အလှန်အကျိုးဖြစ်ထွန်းစေမည့် နှစ်နိုင်ငံဆက်ဆံရေးပိုင်းကို ပိုမိုခိုင်မြဲစေနိုင်မည့် အခွင့်အလမ်းသစ်တွေကို ရှာဖွေသွားရေးကိုလည်း ခေါင်းဆောင်တွေအကြား ကတိပြုခဲ့ကြသည်။ ယင်းအပြင် ဒေသတွင်းနှင့် ဒေသပြင်ပ၏ ငြိမ်းချမ်းရေး၊ တစ်စုတစ်စည်းတည်း သာယာဝပြောရေးနှင့်ဖွံ့ဖြိုးရေးဆိုင်ရာ တို့အတွက် တူညီသည့် ဆန္ဒများ ရှိနေပါကြောင်းကိုလည်း ၎င်းတို့အကြား ထပ်လောင်းကတိပြုခဲ့ကြသည်။

၅. ငြိမ်းချမ်းရေးနှင့် အမျိုးသားပြန်လည်ရင်ကြားစေ့ရေးတို့အတွက်  မြန်မာအစိုးရ၏ ကြိုးပမ်းအားထုတ်ထားမှုများအပေါ်လည်း တန်ဖိုးထားအသိအမှတ်ပြုပါကြောင်း အိန္ဒိယဝန်ကြီးချုပ် မိုဒီက ဆိုခဲ့ပြီး လက်ရှိ မြန်မာ့ငြိမ်းချမ်းရေးလုပ်ငန်းစဉ်အပေါ်လည်း ထောက်ခံပြောဆိုခဲ့သည်။ မြန်မာနိုင်ငံ၏ ပြည်တွင်း တည်ငြိမ်အေးချမ်းရေးက အိန္ဒိယအတွက်လည်း များစွာ အရေးပါနေကြောင်း မိုဒီက မှတ်ချက်ပြုပြောကြားခဲ့ပြီး မြန်မာနိုင်ငံတွင် ဒီမိုကရေစီ ပိုမိုခိုင်မာရေး၊ ဖယ်ဒရယ်ပြည်ထောင်စု ပေါ်ထွက်လာရေးတို့အတွက် မြန်မာအစိုးရကိုအိန္ဒိယဘက်က ဆက်လက်ထောက်ခံအားပေးသွားမည်ဖြစ်ကြောင်း ဆိုခဲ့သည်။

၆.  နှစ်နိုင်ငံနယ်စပ်တစ်လျှောက် လုံခြုံရေး ကိစ္စရပ်များနှင့်ပတ်သက်၍လည်း နှစ်ဘက်ခေါင်းဆောင်များအကြား ဆွေးနွေးခဲ့သကဲ့သို့ သက်ဆိုင်ရာ နယ်မြေများတွင် အကြမ်းမှုဖြစ်စဉ်များ၊ အစွန်းရောက် တိုက်ခိုက်မှုဖြစ်စဉ်များ ပေါ်ပေါက်ထားခဲ့မှုနှင့်ပတ်သက်၍ စိုးရိမ်ကြောင်း ထုတ်ဖော်ခဲ့ကြသည်။ ဒေသတွင်း တည်ငြိမ်အေးချမ်းမှုအပေါ် အကြမ်းဖက်မှုက ထင်ထင်ရှားရှား ခြိမ်းခြောက်နေလျက်ရှိကြောင်း ခေါင်းဆောင်များက ပြောဆိုဆွေးနွေးခဲ့ပြီး  အကြမ်းဖက်မှုကို မည်သည့်ပုံစံနှင့်မဆို လက်မခံဘဲ ပြစ်တင်ကြောင်း ခေါင်းဆောင်များက ပြောကြားသွားကြသည်။

အကြမ်းဖက်မှုကို တိုက်ဖျက်ရာတွင်လည်း အကြမ်းသမားများ၊ အကြမ်းဖက်အဖွဲ့အစည်းများ နှင့် ကွန်ရက်များကို ပစ်မှတ်ထား နှိမ်နင်းရှင်းလင်းသွားရန်သာမကဘဲ အကြမ်းဖက်မှုကို နောက်ကွယ်ကနေ ငွေကြေးထောက်ပံ့နေသည့် နိုင်ငံအဖွဲ့အစည်းများကိုလည်း ဖော်ထုတ် ဖြေရှင်းသွားရန် အရေးကြီးကြောင်း ခေါင်းဆောင်များအကြား ဆွေးနွေးခဲ့ကြသည်။ မကြာသေးမီက ဖြစ်ပွားခဲ့သော အိန္ဒိယ ဟိန္ဒူဘုရားကျောင်း အကြမ်းဖက် တိုက်ခိုက်ခံရမှုဖြစ်စဉ်များနှင့် ယင်းနိုင်ငံ၏ နယ်စပ်များတစ်လျှောက် အကြမ်းဖက်သမားများ လုပ်ဆောင်ထားခဲ့သည့် လုပ်ရပ်များနှင့်ပတ်သက်၍ မြန်မာအစိုးရက ပြစ်တင်ရှုတ်ချခဲ့သည်။ အလားတူ မြန်မာနိုင်ငံ ရခိုင်ပြည်နယ် မြောက်ပိုင်းတွင် လုံခြုံရေးတပ်ဖွဲ့ဝင်များ သေဆုံးခဲ့ရသည့် အကြမ်းဖက်တိုက်ခိုက်မှုဖြစ်စဉ်များနှင့်ပတ်သက်၍လည်း အိန္ဒိယဘက်က ပြစ်တင်ရှုတ်ချထားသည်။

အကြမ်းဖက်မှုများမှာ လူသားအခွင့်အရေးများအပေါ် ချိုးဖောက်နေပြီး အကြမ်းဖက်သမားများကို အာဇာနည်များသဖွယ် ဂုဏ်မြှောက်နေခြင်းများ မရှိသင့်ကြောင်း နှစ်ဘက်စလုံးက သဘောတူခဲ့သည်။ အကြမ်းဖက်မှုတိုက်ဖျက်ရာတွင်လည်း နိုင်ငံတကာအသိုင်းအဝိုင်း၏ ဘက်လိုက်ပြီး ရွေးချယ်ပြုလုပ်သည့် ချဉ်းကပ်လုပ်ဆောင်မှုများ ရပ်ဆိုင်းရေး ခေါင်းဆောင်များက တောင်းဆိုခဲ့သလို ကုလ အထွေထွေညီလာခံတွင် နိုင်ငံတကာ အကြမ်းဖက်မှု ကွန်ဗန်းရှင်းတစ်ရပ်ကို အမြန်ဆုံး အပြီးသတ် ရေးဆွဲပြဌာန်းရေးကိုလည်း နှစ်ဘက်စလုံးက တောင်းဆိုခဲ့သည်။

၇. နှစ်နိုင်ငံ နယ်စပ် တစ်လျှောက် လုံခြုံရေးနှင့် တည်ငြိမ်အေးချမ်းမှုကို ဆက်လက်ထိန်းသိမ်းခြင်းက နှစ်ဘက်နယ်စပ်ဒေသများတွင် နေထိုင်သော ပြည်သူများ၏ လူမှု-စီးပွား ဖွံ့ဖြိုးမှုအတွက် လိုအပ်ကြောင်း ခေါင်းဆောင်များအကြား အသိအမှတ်ပြုပြောဆိုခဲ့သည်။ မြန်မာနိုင်ငံဘက်ကလည်း အိန္ဒိယ၏ အချုပ်အချာအာဏာနှင့် နယ်မြေစုစည်းတည်ရှိမှုအပေါ် အလေးထားကြောင်း၊ အိန္ဒိယအစိုးရကို ဆန့်ကျင်တိုက်ခိုက်မည့် အကြမ်းဖက်လုပ်ရပ်များ လုပ်ဆောင်မည့် မည်သည့်အကြမ်းဖက်အဖွဲ့အစည်းကိုမှ မြန်မာ့မြေပေါ်တွင် ခြေချခွင့် မပေးရေး မူဝါဒကို ဆက်လက်ထိန်းသိမ်းသွားမည်ဖြစ်ကြောင်း ပြောဆိုခဲ့သည်။  ယင်းအပြင် ယင်းတူညီသည့် မူဝါးကို အိန္ဒိယဘက်ကလည်း ထိန်းသိမ်းဆောင်ရွက်ပေးနေခြင်းအတွက် နယူးဒေလီအစိုးရကို ကျေးဇူးတင်ကြောင်း မြန်မာဘက်က ပြောကြားခဲ့သည်။

၈. နှစ်နိုင်ငံအကြား ပိုင်းခြားသတ်မှတ်ထားပြီးဖြစ်တဲ့ နယ်စပ်စည်းများအပေါ်လည်း အပြန်အလှန် လေးစားမှုရှိရေး နှစ်ဘက်ခေါင်းဆောင်များ သဘောတူညီခဲ့သကဲ့သို့ နယ်စပ် နယ်မြေသတ်မှတ်မှုဆိုင်ရာ ပေါ်ထွက်နေသည့် ကိစ္စရပ်များကိုလည်း ရှိပြီးသားဖြစ်သည့် နှစ်ဘက် ညှိနှိုင်းဖြေရှင်းရေးလမ်းကြောင်းမှတဆင့် ဖြေရှင်းသွားရေးလိုအပ်ကြောင်းကိုလည်း နှစ်ဘက်ခေါင်းဆောင်များ သဘောတူပြောဆိုခဲ့သည်။

၉. နှစ်ဘက်စလုံးအနေဖြင့် ယင်းတို့၏ အနီးအနားဝန်းကျင်ဒေသ လုံခြုံရေး အခြေအနေများနှင့်ပတ်သက်၍ သုံးသပ်ဆွေးနွေးခဲ့ကြသလို ပင်လယ်ရေကြောင်း လုံခြုံရေးတွင်လည်း ပိုမိုနီးနီးကပ်ကပ် ပူးပေါင်းဆောင်ရွက်သွားရန် လိုအပ်ကြောင်းကိုလည်း သဘောတူခဲ့ကြသည်။  နှစ်နိုင်ငံအကြား အပြန်အလှန် အကျိုးဖြစ်စေပြီး ပိုမိုခိုင်မြဲသည့် စစ်ရေးဆိုင်ရာ ပူးပေါင်းမှုများ တိုးမြင့်လုပ်ဆောင်ရေးအတွက်လည်း သဘောတူညီခဲ့သည်။ ပြီးခဲ့သည့်ကာလက မြန်မာ့တပ်မတော် ကာကွယ်ရေးဦးစီးချုပ် အိန္ဒိယသို့ ချစ်ကြည်ရေးခရီးသွားရောက်နိုင်ခဲ့မှုအပေါ်လည်း မှတ်ချက်ပြုပြောဆိုခဲ့သည်။

ပုံမှန်လုပ်ဆောင်နေမြဲ ပူးတွဲကင်းလှည့်စောင့်ကြည့်မှု များမှတဆင့် အဖွဲ့အစည်းဆိုင်ရာ ပူးပေါင်းဆောင်ရွက်ခြင်းများအပြင် ဘင်္ဂလားပင်လယ်အော် နှင့် အိန္ဒိယသမုဒ္ဓရာတို့၏ လုံခြုံရေးအတွက် အဓိကကျသည့် လူသားချင်းစာနာမှုအကူအညီများနှင့် သဘာဝဘေးဒုက္ခကြံရချိန် ကူညီကယ်ဆယ်ရေးကိစ္စရပ်များကဲ့သို့ အစဉ်အလာမဟုတ်သည့် လုံခြုံရေးကိစ္စရပ်များတွင်လည်း နှစ်ဘက်အကြား ပင်လယ်ရေကြောင်း ပူးပေါင်းဆောင်ရွက်မှုများ တိုးမြင့်လုပ်ဆောင်သွားရေး နှစ်ဘက်အကြား သဘောတူညီခဲ့သည်။

၁၀. လက်ရှိ ရှိထားနှင့်ပြီး ဖြစ်သည့် အပြန်အလှန် နားလည်မှု၊ တိုးမြင့်ဖြစ်ပေါ်နသည့် နှစ်နိုင်ငံဆက်ဆံရေးတို့ကိုလည်း နှစ်နိုင်ငံအကြား ဆက်လက်ထိန်းသိမ်းသွားရေး ကတိပြုခဲ့ကြသည်။  နှစ်နိုင်ငံပြည်သူများနှင့် ဒေသအတွက် လာမည့်နှစ်များတွင်လည်း နှစ်ဘက်အကြား အပြန်အလှန်ယုံကြည်ပြီး အပြန်အလှန် ဖေးမ ရပ်တည်သွားရေးကိုလည်း သဘောတူညီခဲ့ကြသည်။

၁၁. နှစ်နိုင်ငံကိစ္စရပ်များတွင် အပြန်အလှန် နားလည်မှုကို မြှင့်တင်ပေးနိုင်မည့် နှစ်ဘက် အဆင့်မြင့်လယ်ဗယ် ခရီးစဉ်များ ဆက်ရှိနေသည့်အတွက် ကျေနပ်ဝမ်းမြောက်မိကြောင်း နှစ်ဘက်စလုံးက မှတ်ချက်ပြုသည်။ လုံခြုံရေး၊ ကာကွယ်ရေး၊ ကုန်သွယ်မှု၊ စီးပွားရေး၊ လျှပ်စစ်၊ စွမ်းအင်၊ နယ်စပ်ဒေသထိန်းသိမ်းစီမံရေး၊ ချိတ်ဆက် ဆက်သွယ်ရေး နယ်ပယ်ဧရိယာများတွင် ကဏ္ဍအလိုက် အထူးအဖွဲ့အစည်းဆိုင်ရာ ပုံမှန်အစည်းအဝေးများ ပြုလုပ်သွားရေး အတွက်လည်း ၎င်းတို့အကြား အထူးအလေးပေးပြောဆိုခဲ့သည်။ အိန္ဒိယနှင့် မြန်မာ ပါလီမန်များအကြား အပြန်အလှန်ချိတ်ဆက်ဆောင်ရွက်မှုများ ရှိနေသည့်အပေါ် ဝမ်းမြောက်ကြောင်းလည်း ၎င်းတို့က ဆိုသည်။ နောက်ထပ်လည်း ထပ်မံပူးပေါင်းသွားရေးအတွက်လည်း ပြောဆိုခဲ့ကြသည်။

၁၂. နိုင်ငံတွင် လူမှု-စီးပွား ဖွံ့ဖြိုးတိုးတက်မှုများအတွက် မြန်မာအစိုးရ၏ ကြိုးပမ်းအားထုတ်မှုများအပေါ် ထောက်ခံပြီး အိန္ဒိယတို့ဘက်က အကူအညီများ ပေးအပ်ပေးခဲ့သည့် အပေါ်တွင်လည်း နယူးဒေလီအစိုးရအပေါ် လှိုက်လှိုက်လှဲလှဲ ကျေးဇူးတင်ကြောင်း မြန်မာအစိုးရဘက်က ထုတ်ပြန်ခဲ့သည်။အိန္ဒိယအစိုးရ၏ နည်းပညာနှင့် ဘဏ္ဍာရေးအကူအညီများဖြင့် ဆောင်ရွက်နေလျက်ရှိသည့် ပူးပေါင်းပရောဂျက်များနှင့်ပတ်သက်၍လည်း နှစ်ဘက်စလုံးက သုံးသပ်ပြောဆိုခဲ့ပြီး ယင်းပရောဂျက်များမှာ မြန်မာပြည်သူများ၏ အကျိုးစီးပွားနှင့်တိုက်ရိုက်သက်ဆိုင်နေပြီး ယင်းတို့ကို အဟန့်အတားအချုပ်အနှောင်များမှ ကင်းလွတ်စေရေး နှစ်ဘက်ခေါင်းဆောင်များ သဘောတူညီခဲ့ကြသည်။

မြန်မာအစိုးရဘက်က နိုင်ငံတွင် အခြေခံအဆောက်အအုံနှင့် လူသားအရင်းအမြစ်များ တည်ဆောက်နိုင်ရေး ကြိုးပမ်းအားထုတ်ချက်များကို အိန္ဒိယဘက်က ဆက်လက်အားပေး   ထောက်ခံပေးသွားမည်ဖြစ်ကြောင်း ဝန်ကြီးချုပ် မိုဒီက အခိုင်အမာ ပြောဆိုခဲ့သည်။ ပခုက္ကူနှင့် မြင်းခြံတို့တွင် အိန္ဒိယ အကူအညီဖြင့် ထူထောင်ထားသည့် စက်မှုလုပ်ငန်းလေ့ကျင့်သင်ကြားရေးစင်တာများကို ရည်ညွှန်း၍ မြန်မာအစိုးရဘက်ကလည်း မုံရွာနှင့် သထုံတို့တွင် နောက်ထပ်စင်တာနှစ်ခု ထူထောင်ရာတွင် အိန္ဒိယဘက်က ဆက်လက်အကူအညီပေးထားမှု၊ မြင်းခြံ အိုင်တီစီအတွက် ငါးနှစ် ပြုပြင်ထိန်းသိမ်းရေး အစီအစဉ်တစ်ရပ်အတွက် အကူအညီပေးထားမှုတို့အတွက် အိန္ဒိယအပေါ် ကျေးဇူးတင်ကြောင်း မြန်မာအစိုးရက ပြောသည်။

မြန်မာ-အိန္ဒိယ စွန့်ဦးလုပ်ငန်းရှင်များ ဖွံ့ဖြိုးရေးစင်တာ၊ ရန်ကုန်မြို့ရှိ အင်္ဂလိပ်ဘာသာစကားသင်ကြားရေး စင်တာ တို့ကိုအဆင့်မြှင့်တင်ရာတွင် အိန္ဒိယဘက်က အကူအညီပေးထားမှုအပေါ်တွင်လည်း နှစ်ဘက်စလုံးက အသိအမှတ်ပြုအလေးပေးပြောဆိုခဲ့သည်။ ယင်းအပြင် မြန်မာလူငယ်ထုအကြား သိပ္ပံဆိုင်ရာ စူးစမ်းလေ့လာလိုစိတ်တွေကို ပျိုးထောင်ပေးနိုင်မည့် တန်ဖိုးရှိသည့် အရာတစ်ခုဖြစ်သော နက္ခတ်တာရာပြခန်း တစ်ခုကို နိုင်ငံတွင် သင့်တော်သည့် နေရာတစ်ခု၌ ထူထောင်သွားနိုင်ရေး နှစ်ဘက်စလုံးက ဆက်လက်ဆွေးနွေးသွားမည်ဟု သဘောတူညီခဲ့ကြသည်။

၁၃.  ရခိုင်ပြည်နယ်တွင် ဖြစ်ပေါ်နေသည့် အခြေအနေများမှာ လက်ရှိအချိန်တွင် တိုးတက်မှုများ ဖြစ်ပေါ်နေပြီး လုံခြုံရေးအရပါ ထိန်းချုပ်နိုင်မှု ရှိနေကြောင်း နှစ်ဘက်စလုံးက အမြင်ချင်းတူညီခဲ့ကြသည်။ ပညာရေး၊ ကျန်းမာရေး၊ လယ်ယာစိုက်ပျိုးရေးနှင့် သက်ဆိုင်ရာ ကဏ္ဍများ၊ စိုက်ပျိုးရေးထုတ်ကုန်ထုတ်ပိုးဆောင်ရွက်ရေး၊ လူ့အသိုင်းအဝိုင်းများ ဖွံ့ဖြိုးရေး၊ တံတားငယ်များ တည်ဆောက်ရေး၊ လမ်းများအဆင့်မြှင့်တင်ရေး၊ အသေးစားလျှပ်စစ် စီမံကိန်းများ ဆောင်ရွက်ရေး၊ နေထိုင်စားသောက်ရေး၊ လေ့ကျင့်ရေးစင်တာများ ထူထောင်ရေး၊ အိမ်ထောင်စု လက်မှုအတတ်ပညာများ အားပေးရေး၊ သဘာဝပတ်ဝန်းကျင်နှင့် ယဉ်ကျေးမှု အမွေအနှစ်များကို ထိန်းသိမ်းစောင့်ရှောက်ရေး စသည့် ကဏ္ဍအပိုင်းများအပါအဝင် အခြေခံအဆောက်အအုံနှင့် လူမှု-စီးပွား ပရောဂျက်များ ဖော်ဆောင်သွားခြင်းဖြင့် ပြည်နယ်တွင် လူမှု-စီးပွားဖွံ့ဖြိုးတိုးတက်ရေး ရရှိနိုင်မည်ဟု နှစ်ဘက်စလုံးက သဘောတူခဲ့ကြသည်။ ရခိုင်ပြည်နယ်ဖွံ့ဖြိုးရေးအစီအစဉ်များအောက်တွင် အိန္ဒိယဘက်က အကူအညီများ ပေးထားမှုအပေါ် မြန်မာဘက်က လက်ခံကြိုဆိုခဲ့ပြီး လာမည့်လအနည်းငယ်အတွင်း စံပြပုံစံများ အကောင်အထည်ဖော်မှုအပြီးသတ်ရေးကိုလည်း သဘောတူခဲ့ကြသည်။

၁၄. လယ်ယာစိုက်ပျိုးရေး ဆိုင်ရာ သုတေသနနှင့် ပညာရေးနယ်ပယ် တို့တွင် ပူးပေါင်းဆောင်ရွက်ထားနိုင်မှုအပေါ် ကျေနပ်ဝမ်းမြောက်ကြောင်း နှစ်ဘက်စလုံးက ပြောခဲ့သည်။ အထူးသဖြင့် ရေဆင်းစိုက်ပျိုးရေးတက္ကသိုလ်တွင် စိုက်ပျိုးရေးသုတေသနနှင့် ပညာရေးဆိုင်ရာ အဆင့်မြင့်စင်တာတစ်ခု၊ စိုက်ပျိုးရေးသုတေသန ဌာနတွင် ထူထောင်ထားသည့် ဆန်စပါး ဇီ၀ ဥယျာဉ် တစ်ခုတို့လည်ပတ်လုပ်ကိုင်ရာတွင် မြန်ဆန်သည့် တိုးတက်မှုများ ရရှိနေမှုအပေါ် နှစ်ဘက်စလုံးက အလေးပေးပြောဆိုခဲ့သည်။ ယင်းအပြင် စိုက်ပျိုးရေးသိပ္ပံ ဘာသာရပ်များတွင် မြန်မာနိုင်ငံမှ ကျောင်းသားများအတွက် ဘွဲ့လွန်နှင့် ဒေါက်တာဘွဲ့များ သင်ကြားရယူနိုင်ရေး အဆင်ပြေစေနိုင်အောင် အိန္ဒိယဘက်က အကူအညီများ ပေးမှုအပေါ် တန်ဖိုးထားကြောင်းလည်း ဆိုခဲ့ကြသည်။

၁၅.  မြန်မာတရားရေးဝန်ထမ်းများ၊ စစ်ဘက်အရာရှိများ၊ ရဲများအတွက် လုပ်ဆောင်နိုင်စွမ်း တည်ဆောက်မှု ပရိုဂရမ်များ ဆက်လက်ရှိနေမှုအပေါ် ကျေနပ်ဝမ်းမြောက်မိကြောင်း နှစ်ဘက်စလုံးက ထုတ်ဖော်ခဲ့သည်။  မြန်မာ သတင်းအချက်အလက် ဌာန နှင့် အိုင်တီစကေး မြှင့်တင်ရေးဆိုင်ရာ အိန္ဒိယ-မြန်မာစင်တာ တို့အတွက် အကူအညီ ဆက်ပေးနေမှုအပေါ် အိန္ဒိယကို မြန်မာဘက်က ကျေးဇူးတင်ကြောင်း ဆိုခဲ့သည်။ နယူးဒေလီရှိ နိုင်ငံခြားဝန်ဆောင်မှုဌာနတွင်လည်း မြန်မာသံတမန်များကို ပုံမှန်လေ့ကျင့်သင်ကြားမှုများ အိန္ဒိယဘက်က ဆက်ပေးရေး နှစ်ဘက်စလုံးက သဘောတူခဲ့သည်။

Kendriya Hindi Sansthan တွင် လေ့ကျင့်သင်ကြားနိုင်ရေးအတွက် နှစ်စဉ်နှစ်တိုင်း မြန်မာသံတမန် နှစ်ဦး လာရောက်တက်ရောက်ရန်  အိန္ဒိယ၏ ကမ်းလှမ်းချက်ကို မြန်မာဘက်က ကြိုဆိုခဲ့သည်။ တစ်ချိန်တည်းတွင်မှာပင်  ငါးနှစ်အထိ နှစ်စဉ်နှစ်တိုင်း အိန္ဒိယလေ့ကျင့်သင်ကြားရေး ဌာနများတွင် အင်္ဂလိပ်ဘာသာစကားသင်တန်းများ မြန်မာ အစိုးရဝန်ထမ်း ၁၅၀ တက်ရောက်နိုင်ရန်လည်း ရှိနေသည်။

၁၆.  မြန်မာရဲတပ်ဖွဲ့၏ လေ့ကျင့်သင်ကြားရေးအစီအစဉ်များ၊ လုပ်ဆောင်နိုင်စွမ်း တည်ဆောက်မှု တို့တွင် နောက်ထပ် အဆင့်မြှင့်တင်လုပ်ဆောင်သွားရေး လိုအပ်နေကြောင်း အသိအမှတ်ပြုရင်း အိန္ဒိယအစိုးရ၏ နည်းပညာနှင့် ငွေကြေးအကူအညီနှင့်အတူ မြန်မာနိုင်ငံ ရမည်းသင်းမြို့တွင် အမျိုးသမီး ရဲလေ့ကျင့်ရေးစင်တာ အဆင့်မြှင့်တင့်ရေးဆိုင်ရာ MOU လက်မှတ်ရေးထိုးမှုအပေါ်လည်း နှစ်ဘက်စလုံးက ကြိုဆိုခဲ့သည်။ ရန်ကုန်တွင် ရဲလေ့ကျင့်ရေးစင်တာတစ်ခု ဖွင့်လှစ်ရာတွင် အိန္ဒိယဘက်က ကူညီပေးမည့်အပေါ် မြန်မာဘက်က ကြိုဆိုခဲ့ပြီး စံပြပုံစံများအတွက် ပူးတွဲလုပ်ဆောင်သွားရန် ဆုံးဖြတ်ခဲ့သည်။

၁၇.  မြန်မာနိုင်ငံတွင် လုပ်ငန်းပရောဂျက်အများအပြားအတွက် အိန္ဒိယဘက်က ကူညီပေးမှုအပေါ် မြန်မာအစိုးရက ကျေးဇူးတင်ကြောင်းဆိုခဲ့သည်။ ယင်းအကူအညီများက နှစ်နိုင်ငံအကြား နှင့် ဒေသတွင်း ချိတ်ဆက်ဆက်သွယ်မှုကို တိုးမြင့်စေလျက်ရှိသည်။ ကုလားတန် ဘက်စုံ စီမံကိန်းနှင့် အခြားသော လမ်း၊တံတား တည်ဆောက်ရေးစီမံကိန်းများ နှင့်အပြည့်အဝထုတ်ပေးသော အကူအညီစီမံကိန်းများကဲ့သို့ အကူအညီများ ပါဝင်နေသည်။

စစ်တွေ ဆိပ်ကမ်းနှင့် ပလက်၀ ကုန်းတွင်းရေကြောင်း ဆိပ်ကမ်း တို့ အပြီးသတ်ထားနိုင်သည့် ကုလားတန် ဘက်စုံစီမံကိန်းတွင်လည်း ရေရှည်တိုးတက်မှုများ လုပ်ဆောင်ထားနိုင်မှု၊ မြန်မာဆိပ်ကမ်းအာဏာပိုင်များထံသို့ ကုန်တင်ရေယာဉ်ခြောက်စီး လွှဲပြောင်းပေးအပ်ခဲ့မှုတို့ အပေါ် မြန်မာဘက်က တန်ဖိုးထားကြောင်းဆိုခဲ့သည်။ အခြားသော နိုင်ငံတကာ ဆိပ်ကမ်းများတွင် ကျင့်သုံးနေလျက်ရှိသည့် အလေ့အထများနှင့်အညီ ဆိပ်ကမ်းလည်ပတ်ထိန်းသိမ်းမှုများအတွက် တာဝန်ရှိသော ဆိပ်ကမ်းအော်ပရေတာ ခန့်အပ်ရေးဆိုင်ရာ MOU ရေးထိုးရေးကိုလည်း နှစ်ဘက်စလုံးက သဘောတူခဲ့သည်။ ယင်းက ဆိပ်ကမ်းနှင့် IWT အခြေခံအဆောက်အအုံများကို စီးပွားဖြစ် အသုံးပြုနိုင်ခွင့် ရရှိစေနိုင်သကဲ့သို့ တည်ဆောက်ဆဲဖြစ်သည့် ပလက်ဝ-ဇိုရင်ပွေ လမ်းပိုင်းကဲ့သို့သော အနီးအနားဧရိယာများရှိ ဖွံ့ဖြိုးမှုများကိုပါ တိုးမြင့်သွားစေနိုင်သည်။

ယင်းလမ်းပိုင်းတည်ဆောက်မှုကို စတင်ဆောင်ရွက်နေလျက်ရှိသည့်အပေါ် နှစ်ဘက်စလုံးက ကျေနပ်အားရကြောင်း ထုတ်ဖော်ခဲ့ပြီး  ပရောဂျက်နှင့်သက်ဆိုင်သည့် လူပုဂ္ဂိုလ်၊ ဆောက်လုပ်ရေးပစ္စည်းများနှင့်တပ်ဆင်ပစ္စည်းများ နယ်စပ်မှတဆင့် အဆင်ပြေပြေ ရွှေ့ပြောင်းသယ်ယူရေးအတွက်လည်း သဘောတူညီခဲ့ကြသည်။  သုံးနိုင်ငံအမြန်လမ်းမကြီး၏ တမူး-ကျီးကုန်း၊ ကလေးဝလမ်း၊ ကလေးဝ-ရာဂျီး လမ်းပိုင်းတို့တွင် တံတားများ ပြန်လည်တည်ဆောက်ရေးလုပ်ငန်းများကို မကြာခင် စတင်သွားရေး နှစ်ဘက်စလုံးက သဘောတူခဲ့သည်။ Rim- တီးတိန်လမ်းပိုင်းနှင့် ယင်း၏ တည်ဆောက်မှုတွင် DPR တို့ကို ပေါင်းစည်းသွားရေး နှစ်ဘက်စလုံးက သဘောတူညီခဲ့သည်။ မြန်မာအစိုးရ၏ တောင်းဆိုချက်အရ Rihkhawdar-Zowkharhtar တံတားနှင့် Bwaynu တံတားတို့အတွက် DPRs ပြင်ဆင်ပေးမှုများ အိန္ဒိယဘက်ကလုပ်ဆောင်ပေးရန် သဘောတူညီခဲ့သည်။

၁၈.  ကျန်းမာရေး နယ်ပယ်ရှိ လုပ်ငန်းပရောဂျက်များနှင့်ပတ်သက်၍ နှစ်ဘက်စလုံးက ပြန်လည်သုံးသပ်ခဲ့ပြီး ရန်ကုန်ကလေးဆေးရုံနှင့် စစ်တွေအထွေထွေဆေးရုံ အဆင့်မြှင့်တင်မှုလုပ်ငန်းများ လုပ်ဆောင်နေမှု၊ မုံရွာအထွေထွေဆေးရုံတည်ဆောက်ပြီးစီးသွားမှု တို့အတွက်လည်း ကျေနပ်အားရကြောင်း မှတ်ချက်ပြုခဲ့ကြသည်။အလားတူ အိန္ဒိယ၏ ဦးဆောင် ဆေးရုံလုပ်ငန်းအဖွဲ့များအနက်တစ်ခုနဲ့ ချိတ်ဆက်ပူးပေါင်းပြီး နေပြည်တော်တွင် အဆင့်မြင့်ဆေးရုံကြီးတစ်ရုံ ထူထောင်လည်ပတ်သွားရေး ဆွေးနွေးမှုများ စတင်သွားရန် နှစ်ဘက်စလုံးက သဘောတူညီခဲ့သည်။

၁၉. ၂၀၁၂ ခုနှစ်က မြန်မာအတွက် အိန္ဒိယဘက် ပေးအပ်ခွင့်ပြုခဲ့သည့် ချေးငွေ ဒေါ်လာ သန်း ၅၀၀ ကို အသုံးပြုလုပ်ဆောင်ရာတွင်လည်း တိုးတက်မှုများ ရှိခဲ့ကြောင်း နှစ်ဘက်စလုံးက ဆိုသည်။ယခု ချေးငွေအကူအညီဖြင့် လုပ်ဆောင်နေသည့် ပရောဂျက်များမှာ အရေးကြီးသည့် နယ်မြေဧရိယာများရှိ အခြေခံအဆောက်အအုံများကို ကူညီဖွံ့ဖြိုးသွားစေသကဲ့သို့ စိုက်ပျိုးရေးနှင့် ပို့ဆောင်ရေးဆိုင်ရာ လုပ်ဆောင်နိုင်စွမ်းများကို ကူညီတိုးမြင့်စေနိုင်မည်ဖြစ်ကြြောင်း အသိအမှတ်ပြုရင်း နှစ်ဘက်သဘောတူထားသည့် ပရောဂျက်များကို ဆက်လက်ဖော်ဆောင်သွားရေး သဘောတူညီခဲ့ကြသည်။

၂၀. ယခု အခြေခံအဆောက်အအုံ ပရောဂျက်များမှတဆင့် တန်ဖိုးအပြည့်အ၀ ရရှိနိုင်ရေးအလို့ငှာ ဆက်သွယ်ချိတ်ဆက်ရေးနှင့် သက်ဆိုင်သည့် အဖွဲ့အစည်းဆိုင်ရာ စီစဉ်ဆောင်ရွက်မှုများကို နေရာတကျ ဦးစားပေးထည့်သွင်းသွားရန်လိုအပ်ကြောင်း နှစ်ဘက်စလုံးက သဘောတူခဲ့သည်။ နှစ်နိုင်ငံနယ်စပ်ကို ဖြတ်သန်းပြီး မော်တော်ယာဉ်၊ ခရီးသည်တင်ယာဉ်နှင့်ကုန်တင်ယာဉ်များ ပိုမိုစီးဆင်းမှု လွယ်ကူသွားနိုင်ရေးအတွက် နှစ်နိုင်ငံအကြား သဘောတူညီချက်တစ်ခု ရရှိရေး အရေးကြီးကြောင်း နှစ်ဘက်စလုံးက သဘောတူခဲ့သည်။

၂၁။ မြန်မာနှင့်အိန္ဒိယနိုင်ငံကြားတွင် လျှပ်စစ်ဓာတ်အားနှင့် စွမ်းအင်ထောက်ပံ့မှုကွန်ယက်ကို ပိုမိုကောင်းမွန်စွာ ပေါင်းစပ်ဖန်တီးနိုင်ဖို့ အရေးကြီးကြောင်း နှစ်ဖက်စလုံးက မီးမောင်းထိုးပြောဆိုခဲ့သည်။ မြန်မာနိုင်ငံ၏ စွမ်းအင် ကဏ္ဍ၌ လေ့လာဖော်ထုတ်ရေးနှင့် ထုတ်လုပ်ရေးတို့တွင် အိန္ဒိယနိုင်ငံ၏ ပူးပေါင်းပါဝင်လာမှုကို မြန်မာတို့က ကြိုဆိုပြီး ရေနံဓာတုပစ္စည်းများ နှင့် ရေနံထွက်ကုန်များ၊ အခြေခံအဆောက်အဦး ဈေးကွက်များနှင့် LPG ဂိတ် ပေါက်များ တည်ဆောက်ရေးတို့အတွက် တင်ဒါခေါ်ယူရာတွင် အိန္ဒိယကုမ္ပဏီများအနေဖြင့် ပူးပေါင်းပါဝင်ဖို့ မြန်မာတို့က ဖိတ်ခေါ်ခဲ့သည်။

အိန္ဒိယ၏ ထိပ်တန်းရေနံနှင့်သဘာဝဓာတ်ငွေ့ ကုမ္ပဏီကြီးများသည် မြန်မာနိုင်ငံ ၌ ရုံးစိုက်ရန် လုပ်ကိုင်နေကြပြီဖြစ်ကြောင်း အိန္ဒိယတို့ဘက်က အသိပေးပြောကြားခဲ့သည်။ နယ်စပ်ကိုဖြတ်၍ ဒီဇယ်ပို့ဆောင်ရန် မြန်မာမှ ပါရမီစွမ်းအင်အုပ်စုနှင့် အိန္ဒိယမှ Numaligarh Refinery ကုမ္ပဏီတို့ကြား၌ သဘောတူညီမှု ရရှိခဲ့သည့်အတွက်လည်း နှစ်နိုင်ငံစလုံးက ချီးကျူးထောပနာပြုခဲ့သည်။ ထိုသဘောတူညီချက် ကြောင့် မြန်မာနိုင်ငံမြောက်ပိုင်းမှ ပြည်သူများအနေဖြင့် ပိုမိုသက်သာပြီး ပိုမိုစိတ်ချရသော ရေနံထွက်ကုန်များ ကို ရရှိနိုင်မည်ဖြစ်သလို နှစ်နိုင်ငံစလုံးအနေဖြင့် မြန်မာနိုင်ငံအတွင်း၌ ရေနံထွက်ကုန်ပစ္စည်းများကို သိုလှောင် ထားပြီး လက်လီရောင်းချနိုင်ရန်အတွက် ပူးပေါင်းဆောင်ရွက်ရာတွင် အထောက်အကူပြုစေမည်ဖြစ်သည်။ ပထမဦးဆုံး အရှိန်အဟုန်မြှင့် ဒီဇယ်ပို့ကုန်များသည် မြန်မာနိုင်ငံသို့ ၂၀၁၇ စက်တင်ဘာလ ၄ ရက်နေ့ကတည်း က ရောက်ရှိခဲ့ပြီဖြစ်သည်။

၂၂။ အိန္ဒိယတို့သည် မြန်မာအစိုးရ၏ အသစ်ပြန်လည်အသုံးပြုနိုင်သည့်စွမ်းအင်ကို အခြေခံသော လျှပ်စစ် ဓာတ်အား ဖွံ့ဖြိုးတိုးတက်ရေးစီမံကိန်းကို အကူအညီပေးရန်နှင့် နည်းပညာပိုင်းအရ အကူအညီပေးမှုများကို ပိုမိုပေးအပ်သွားနိုင်ရန် အသင့်ဖြစ်နေပြီဖြစ်ကြောင်း ပြောခဲ့သည်။ ဒါ့အပြင် မြန်မာနိုင်ငံအတွင်း၌ နေရောင်ခြည် စွမ်းအင်သုံး ဓာတ်အားပေးဇုန်များ ဖွံ့ဖြိုးတိုးတက်ရေးအတွက် လေ့လာမှုများ ဆောင်ရွက်ပေးမည်ဟု ကနဦးက အိန္ဒိယဘက်မှ ကမ်းလှမ်းခဲ့သလို ယခုအခါ မြန်မာနိုင်ငံအတွင်း၌ ရရှိနိုင်သည့် နေရောင်ခြည်အရင်းအမြစ်များကို အကဲဖြတ်ပေးမည်ဟု ထပ်မံကမ်းလှမ်းခဲ့သည်။

နှစ်နိုင်ငံကြားရှိ အကျိုးများသော စွမ်းအင်နယ်ပယ်အတွက် ပူးတွဲလုပ်ဆောင်နိုင်ရန် နည်းလမ်းများကိုလည်း နှစ်ဖက်တာဝန်ရှိသူများက ဆွေးနွေးခဲ့ကြသည်။ မြန်မာနိုင်ငံ ပဲခူးတိုင်းဒေသကြီးမှ နေပြည်တော်နှင့် ရခိုင်ပြည်နယ်တို့ရှိ အရေးပါသောမြို့နယ်များနှင့် အဆောက်အဦးများ အတွက် LED အခြေခံသောစွမ်းအင်ကိုအသုံးပြုကာ မီးလင်းရေးစီမံကိန်းအတွက် နည်းပညာပိုင်းအရကူညီပေး ခဲ့သော အိန္ဒိယကုမ္ပဏီကို ကျေးဇူးတင်ရှိကြောင်း မြန်မာဘက်ကပြောခဲ့သည်။ အိန္ဒိယက စွမ်းအင်ကုန်သွယ်ရေး ကဏ္ဍအတွက် ၎င်းတို့၏အတွေ့အကြုံများကို မျှဝေခဲ့ပြီး ထိုနယ်ပယ်တွင် စမ်းသပ်လုပ်ဆောင်ချက်များကို မြန်မာတို့နှင့် ပူးပေါင်းလုပ်ကိုင်လိုသည့် ၎င်းတို့၏ဆန္ဒကို ထုတ်ဖော်ပြောဆိုခဲ့သည်။ ပူးပေါင်းပါဝင်ကြသည့် နိုင်ငံ များအတွက် ကြီးမားသောအကျိုးကျေးဇူးများကို ရရှိစေမည့် သဘောထားဖြင့် နိုင်ငံတကာနေရောင်ခြည်စွမ်း အင်မဟာမိတ်အဖွဲ့ တည်ထောင်မည့် အိန္ဒိယ၏အကြံပြုချက်အား လေးလေးနက်နက် စဉ်းစားပေးမည်ဖြစ် ကြောင်း မြန်မာဘက်က ကတိပေးခဲ့သည်။

 ၂၃။ နှစ်နိုင်ငံစလုံးသည် နှစ်ဦးနှစ်ဖက်ပါဝင်သော ကုန်သွယ်ရေးနှင့် ရင်းနှီးမြုပ်နှံမှုများ၏ လက်ရှိအခြေအနေကို ဂရုပြုမိခဲ့ကြပြီး ပိုမိုတိုးတက်လာဖို့ အလားအလာကောင်းများရှိနေကြောင်း သဘောတူခဲ့ကြသည်။ ထို့ကြောင့် နှစ်နိုင်ငံကြားရှိ ကုန်သွယ်ရေးကို လွယ်ကူချောမောစေရန်အတွက် ကုန်သွယ်ရေးအတားအဆီးများကို ပယ်ဖျက် ကာ ဈေးကွက်အခွင့်အလမ်းများကို တိုးတက်အောင်လုပ်ဆောင်မည်ဟု နှစ်ဘက်တာဝန်ရှိသူများက အလေး ထား ပြောကြားခဲ့သည်။ ၂၀၁၇ ဇွန်လက အိန္ဒိယနိုင်ငံ နယူးဒေလီမြို့တွင် ကျင်းပခဲ့သော မြန်မာ-အိန္ဒိယ ပူးတွဲ ကုန်သွယ်ရေးကော်မတီ၏ ၆ကြိမ်မြောက် အစည်းအဝေးပွဲမှ သုံးသပ်ချက်များနှင့် ပက်သက်၍ သူတို့က ကျေနပ် နေခဲ့ကြသလို နယ်စပ်ကုန်သွယ်ရေးကော်မတီ အစည်းအဝေးကျင်းပရန်လည်း သဘောတူညီခဲ့ကြသည်။ 

၂၄။ မြန်မာတို့၏ အထည်အလိပ်ကဏ္ဍ စံညွန်းများသတ်မှတ်ခြင်း၊ အရည်အသွေးစစ်ဆေးခြင်းနှင့် ထောက်ခံ ချက်ပေးခြင်း၊ သုတေသနနှင့် တီထွင်တိုးတက်ရန် လုပ်ဆောင်ခြင်း၊ လူသားအရင်းအမြစ် ဖွံ့ဖြိုးတက်ရေးနှင့် လုပ်ကိုင်နိုင်စွမ်းကို ပျိုးထောင်ခြင်းတို့တွင် ၎င်းတို့နှင့်အတူ ပူးပေါင်းဆောင်ရွက်လိုသည့် မြန်မာတို့၏သဘော ထားကို အိန္ဒိယဘက်က လက်ခံကြိုဆိုခဲ့သည်။

၂၅။ နှစ်ဦးနှစ်ဖက်ပါဝင်သော ကုန်သွယ်ရေးတွင် ပဲတင်ပို့မှုသည် အရေးပါပြီး ထိုပဲကုန်သွယ်မှုသည် မြန်မာ လယ်သမားများနှင့် အိန္ဒိယမှစားသုံးသူများကြားတွင် သွယ်ဝိုက်သောအားဖြင့် ပက်သက်နေကြောင်း  နှစ်ဖက် တာဝန်ရှိသူများက လက်ခံခဲ့ကြသည်။ ယင်းအခြေအနေနှင့် စပ်လျဉ်း၍ အိန္ဒိယတို့ဘက်မှ မကြာသေးခင်က ပဲထွက်ကုန်အမျိုးမျိုးတင်ပို့မှုကို အရေအတွက်ပိုင်းအရ ကန့်သတ်ကြောင်း အကြောင်းကြားစာ ထုတ်ပြန်ခဲ့မှုနှင့် ပက်သက်၍ နိုင်ငံတော်အတိုင်ပင်ခံပုဂ္ဂိုလ်က သူမ၏စိုးရိမ်မှုကို ထုတ်ဖော်ပြောဆိုခဲ့သလို နှစ်နိုင်ငံကြားရှိ ပြည်သူများ၏ ရေရှည်ခိုင်မာလာခဲ့သော ရင်းနှီးခင်မင်မှုနှင့် အကျိုးအမြတ်ကိုမျှော်ကိုးကာ မြန်မာနိုင်ငံမှ တင်ပို့ မည့် ပဲကုန်များအပေါ် ကန့်သတ်ချက်အား ရုတ်သိမ်းပေးရန်အတွက် အိန္ဒိယဝန်ကြီးချုပ်အား မေတ္တာရပ်ခံခဲ့သည်။ ယင်းကိစ္စသည် ရေရှည်အစီအမံများ ဖြစ်ပေါ်လာစေရန်အတွက် အရေးပါကြောင်းနှင့် အနာဂတ်တွင် နှစ်နိုင်ငံမှပြည်သူများ၏ အကျိုးစီးပွားကို ကာကွယ်ပေးရန်အတွက် အရေးပါသောကိစ္စဖြစ်ကြောင်း အိန္ဒိယ ဝန်ကြီးချုပ်က တုံ့ပြန်ပြောဆိုခဲ့သည်။   

၂၆။ နှစ်ဘက်စလုံးသည် နယ်စပ်ဖြတ်သန်းရေး သဘောတူညီမှုကို အပြီးသတ်နိုင်ခဲ့ပြီး အောင်မြင်စွာညှိုနှိုင်းနိုင် ခဲ့သည့်အတွက် အားရကျေနပ်ခဲ့ကြသည်။ထိုနယ်စပ်ဖြတ်သန်းရေး သဘောတူညီမှုကြောင့် ပြည်သူများအနေ ဖြင့် ဘုံနယ်စပ်နယ်မြေကို ဖြတ်သန်းရာတွင် စည်းမျဉ်းစည်းကမ်းဖြင့် ထိန်းနိုင်သလို သဟဇာတဖြစ်စေမည် ဖြစ်သည်။ ထို့ကြောင့် နှစ်နိုင်ငံကြားရှိ ကုန်သွယ်ရေးနှင့် ခရီးသွားလာရေးကို မြှင့်တင်နိုင်မည်ဖြစ်သလို နှစ်နိုင်ငံ မှ အကြီးတန်းအရာရှိများကို ရုံးလုပ်ငန်းများလုပ်ဆောင်ရာ၌ လျင်မြန်စွာအပြီးသတ်နိုင်ဖို့ ညွှန်ကြားနိုင်မည်ဖြစ် သည်။ နှစ်ဖက်နိုင်ငံမှ ခေါင်းဆောင်များသည် အိန္ဒိယနိုင်ငံ အင်ဖယ်ဒေသမှ မြန်မာနိုင်ငံမန္တလေးမြို့သို့ ဘတ်စ် ကားဖြင့် သွားလာနိုင်ဖို့အတွက် ပူးပေါင်းလုပ်ကိုင်ရန် သဘောတူညီချက်ကို ဆွေးနွေးညှိုနှိုင်းပြီး မြန်ဆန်စွာ အပြီးသတ်နိုင်ရန် သဘောတူညီခဲ့ကြသည်။  

၂၇။ နှစ်နိုင်ငံကြားရှိလေကြောင်း ဆက်သွယ်မှုကို ပိုမိုတိုးမြှင့်ခြင်းသည် ပြည်သူများကြားရှိ ဆက်သွယ်ရေးကို အားကောင်းစေပြီး ခရီးသွားလုပ်ငန်း၊ ကုန်သွယ်ရေးနှင့် ရင်းနှီးမြှုပ်နှံမှုတို့ မြင့်မားလာအောင် လုပ်ဆောင်ပေးနိုင် ကြောင်း နှစ်ဖက်တာဝန်ရှိသူများက ရှုမြင်ကြသည်။ အိန္ဒိယဘက်မှ ငွေကြေးနှင့်နည်းပညာ အကူအညီကို အသုံးချကာ ပခုက္ကူလေဆိပ်နှင့် ကလေးလေဆိပ်တို့ကို အဆင့်မြှင့်တင်ရန် မြန်မာနိုင်ငံလေကြောင်းဌာနနှင့် အိန္ဒိယလေဆိပ်အာဏာပိုင်အဖွဲ့တို့ ပူးပေါင်းဆောင်ရွက်သွားမည်ဖြစ်ကြောင်း နှစ်ဖက်ခေါင်းဆောင်များက သဘောတူခဲ့ကြသည်။

ဒါ့အပြင် မြန်မာလေကြောင်းသွားလာရေးထိန်းသိမ်းကြီးကြပ်မှု ဌာနအနေဖြင့် အိန္ဒိယ နိုင်ငံသို့ လာရောက်ပြီး အရည်အသွေးမြှင့်တင်မှု အထူးသင်တန်းများကို တက်ရောက်နိုင်ကြောင်း အိန္ဒိယအစိုး ရမှ ကမ်းလှမ်းခဲ့မှုအပေါ် မြန်မာတို့ဘက်က ဝမ်းမြောက်ဝမ်းသာကြိုဆိုလက်ခံခဲ့သည်။ မြန်မာနိုင်ငံ မန္တလေးမြို့နှင့် တမူးမြို့ကြားတွင် ရထားလမ်းဖောက်လုပ်နိုင်ရန်အတွက် လေ့လာမှုများပြုလုပ်ရန် နှစ်ဖက်ခေါင်းဆောင်များ က သူတို့၏အရာရှိများကို ညွှန်ကြားခဲ့ကြသည်။ အိန္ဒိယမှလာသော အဖွဲ့တစ်ဖွဲ့က တမူးမြို့နှင့် မန္တလေးမြို့ကို ဆက်သွယ်မည့် ရထားလမ်းဖောက်လုပ်ရန်အတွက် လေ့လာဆန်းစစ်ချက်များ ပြင်ဆင်ရန် သဘောတူခဲ့ကြသည်။  

၂၈။ လူကုန်ကူးခံရသူများကို ကယ်ဆယ်ရန်နှင့် ပြန်လည်ထူထောင်ပေးရန် နှစ်ဦးနှစ်ဖက်သဘောတူလက်ခံ သော လုပ်ငန်းစဉ်များကို ဖော်ဆောင်ဖို့အရေးကြီးကြောင်း နှစ်ဖက်စလုံးက ခေါင်းဆောင်များက လက်ခံခဲ့ကြ သည်။ ထိုကိစ္စနှင့်စပ်လျဉ်း၍ သူတို့က MOU ကိုအပြီးသတ်နိုင်ရေးနှင့် လူကုန်ကူးမှုကာကွယ်ရေးအတွက် ပူးပေါင်း ဆောင်ရွက်နိုင်ရန် သဘောတူခဲ့ကြသည်။

၂၉။ အိန္ဒိယနှင့် မြန်မာပြည်သူများကြားတွင် ရင်းနှီးမှုပိုမိုခိုင်မာစေရန် ယဉ်ကျေးမှုကဏ္ဍသည် အခရာကျကြောင်း ခေါင်းဆောင်နှစ်ဦးက အလေးပေးပြောဆိုခဲ့ပြီး ၂၀၁၇မှ ၂၀၂၀ ကာလအတွင်း ယဉ်ကျေးမှုဖလှယ်ခြင်းအစီအစဉ် (CEP) များ ပြုလုပ်ကြရန် သဘောတူညီခဲ့ကြသည်။ ထို CEP အစီအစဉ်သည် အိန္ဒိယအရှေ့မြောက်ပိုင်း ပြည်နယ်များနှင့် မြန်မာနယ်စပ်ဒေသများ၌ ယဉ်ကျေးမှုဖလှယ်ခြင်းကို အဆင့်မြှင့်တင်ပေးနိုင်မည်ဖြစ်ကြောင်း သူတို့က ယုံကြည်ကြသည်။ ဒါ့အပြင် နယူးဒေလီမြို့ရှိ အိန္ဒိယရှေးဟောင်း သုတေသနတက္ကသိုလ်၌ နှစ်စဉ်နှစ် တိုင်း မြန်မာရှေးဟောင်း သုတေသနပညာရှင်နှစ်ဦးကို တက်ရောက်ခွင့်ပေးမည်ဖြစ်ကြောင်း အိန္ဒိယဘက်မှ အတည်ပြုခဲ့သည်။           

၃၀။ လက်ရှိတွင် ဗုဒ္ဓဂါယာ၌ မြန်မာဘုရင်ဘကြီးတော်နှင့် မင်းတုန်းမင်းတို့တည်ထားသော ဘုရားကျောင်းများနှင့် ကျောက်စာ၊ ခေါင်းလောင်းစာများကို ထိန်းသိမ်းရေးအတွက် တာဝန်ယူဆောင်ရွက်နေသည့် အိန္ဒိယရှေး ဟောင်းသုတေသန ဆန်းစစ်လေ့လာရေးအဖွဲ့၏ ပရောဂျက်သည် တိုးတက်မှုရှိနေပြီး ၂၀၁၇ ဒီဇင်ဘာလတွင် ပြီးဆုံးမည်ဖြစ်ကြောင်း အိန္ဒိယဘက်မှ အသိပေးခဲ့သည်။ ထိုသတင်းနှင့်ပက်သက်ပြီး မြန်မာတို့ဘက်မှ ကျေနပ် လျက်ရှိကာ ထိုဘုရားကျောင်းများသည် အိန္ဒိယ-မြန်မာ ယဉ်ကျေးမှုအမွေအနှစ်များအတွက် အရေးပါသော အခန်းကဏ္ဍတွင်ရှိကြောင်း အလေးထားပြောဆိုခဲ့သည်။

၃၁။ ပုဂံမြိုကမှ ရှေးဟောင်းအမွေအနှစ်များကို ထိန်းသိမ်းစောင့်ရှောက်ကာ ရေရှည်တည်တံ့အောင်ပြုလုပ်ပေး သလို လူမှုစီးပွားရေးအခြေအနေများကို ဖွံ့ဖြိုးတိုးတက်အောင် ပြုလုပ်ပေးနေသည့် အိန္ဒိယ၏ အကူအညီများကို မြန်မာဘက်မှ လက်ခံကြိုဆိုခဲ့သည်။ ထိုအကူအညီများထဲမှ အရေးပါသောအစီအစဉ်မှာ အိန္ဒိယရှေးဟောင်း သုတေသန ဆန်းစစ်လေ့လာရေးအဖွဲ့၏ အကူအညီဖြင့် ပုဂံရှိ ရှေးဟောင်းဘုရား ၉၂ ဆူနှင့် အဆောက်အဦး များကို ထိန်းသိမ်းစောင့်ရှောက်မည့် အစီအစဉ်ဖြစ်သည်။

ယင်းသို့လုပ်ဆောင်နိုင်ခြင်းမှာ MOU ကို အဆုံးသတ် နိုင်ခြင်းကြောင့်ဖြစ်ကြောင်း နှစ်ဖက်စလုံးကလက်ခံကြသည်။ အိန္ဒိယ-မြန်မာ ပူးပေါင်းလုပ်ဆောင်မှု စီမံကိန်းများ အနေဖြင့် တာဝန်ယူဆောင်ရွက်သွားရန်ရှိသော အခြားစီမံကိန်းများမှာ မြန်မာ့လက်မှုပညာတွင် အခရာကျသော ဒေသအဖြစ် ပုဂံနယ်မြေကို သတ်မှတ်ခြင်း၊ အစားအစာနှင့် ယဉ်ကျေးမှုကိစ္စများ၊ LED စွမ်းအင်အခြေခံလမ်းမီး တိုင်များ စိုက်ထူခြင်း၊ ရေအရင်းအမြစ် အဆက်မပြတ်ရရှိနိုင်ရန်အတွက် မိုးရေများကစုဆောင်းခြင်း၊ ပုဂံဒေသရှိ ကျောင်းများကို အဆင့်မြှင့်တင်ပြီး ပုဂံပြည်သူများ အခြားနည်းလမ်းဖြင့် ဝင်ငွေမြင့်မားလာအောင် သင်တန်းပေး ခြင်း စသည့်အစီအစဉ်များ ပါရှိသည်။       

၃၂။ အိန္ဒိယအစိုးရက မြန်မာနိုင်ငံသားများကို အခမဲ့ဗီဇာချထားပေးဖို့ ဆုံးဖြတ်ခဲ့သည့်အတွက် အိန္ဒိယကို မြန်မာက လှိုက်လှိုက်လှဲလှဲ ကျေးဇူးတင်သည်။

၃၃။ အိန္ဒိယ၌ အကြောင်းအမျိုးမျိုးကြောင့် အကျဉ်းကျခံနေရသော မြန်မာနိုင်ငံသား ၄၀ခန့်ကို အထူးလွတ်ငြိမ်း ချမ်းသာခွင့်ပေးရန် ဆုံးဖြတ်ခဲ့သော အိန္ဒိယအစိုးရအား မြန်မာအစိုးရက ကျေးဇူးတင်သည်။ ထိုဆုံးဖြတ်ချက်ကို နှစ်ဖက်အစိုးကသာမက မြန်မာပြည်သူများ၊ အထူးသဖြင့် အိန္ဒိယအကျဉ်းထောင်မှ လွတ်မြောက်လာမည့် အကျဉ်းသားများ၏ မိသားစုဝင်များက လှိုက်လှိုက်လှဲလှဲ ကျေးဇူးတင်ကြသည်။

၃၄။ ဒီမိုကရေစီအရေးကို ထောက်ခံခြင်းနှင့် အားပေးမြှင့်တင်ရာတွင် မီဒီယာများသည် အဓိကအရေးပါသော အခန်းကဏ္ဍမှပါဝင်သည်ကို နှစ်ဖက်စလုံးက အသိအမှတ်ပြုခဲ့ပြီး အိန္ဒိယသတင်းစာကောင်စီနှင့် မြန်မာသတင်း စာ ကောင်စီတို့ကြား၌ ပူးပေါင်းဆောင်ရွက်နိုင်ခဲ့သည့်အတွက် နှစ်ဖက်အစိုးရက လက်ခံကြိုဆိုခဲ့ကြသည်။ ထိုနှစ်ဖွဲ့ကြားရှိ ဆောင်ရွက်ချက်များသည် ဂျာနယ်လစ်များကြား အတွေ့အကြုံဖလှယ်ခြင်းနှင့် အိန္ဒိယနှင့် မြန်မာနိုင်ငံ၌ နိုင်ငံရေးနှင့်စီးပွားရေး ဖွံ့ဖြိုးတိုးတက်မှုတို့ကို ပိုမိုနားလည်သဘောပေါက်လာစေရန် အဆင့်မြှင့် တင်ပေးနိုင်မည်ဖြစ်သည်။

၃၅။ နှစ်ဖက်စလုံးသည် ကုန်သွယ်ရေး၊ သယ်ယူပို့ဆောင်ရေးနှင့် စွမ်းအင်ကဏ္ဍတို့အပါအဝင် နယ်ပယ်အသီးသီ း ၌ အပြန်အလှန်အကျိုးအမြတ် အမြင့်မားဆုံးရရှိစေရန်အတွက်   ဒေသအလိုက်ပူးပေါင်းဆောင်ရွက်မှုကို အလေးထားလုပ်ကိုင်မည့် ၎င်းတို့၏ဆုံးဖြတ်ချက်ကို ထပ်မံအတည်ပြုခဲ့ကြသည်။ နှစ်နိုင်ငံတစ်လွှားရှိ ပြည်သူ အားလုံး၏ ဘဝများနှင့် အသက်ရှင်နေထိုင်မှု ပိုမိုတိုးတက်လာစေရန်အတွက် ဒေသလိုက်ပူးပေါင်းဆောင်ရွက်မှု များသည် အရေးပါသော ပဏာမခြေလှမ်းတစ်ရပ်ဖြစ်ကြောင်း နှစ်ဖက်စလုံးက အသိအမှတ်ပြုခဲ့ကြသည်။

၃၆။ ကမ္ဘာ့ကုလသမဂ္ဂနှင့် နိုင်ငံပေါင်းစုံပါဝင်သော အခြားအဖွဲ့အစည်းများတွင် ရင်းနှီးစွာပူးတွဲလုပ်ကိုင်သွားမည် ဖြစ်ကြောင်း အိန္ဒိယနှင့်မြန်မာတို့ ထပ်မံအတည်ပြုခဲ့ကြသည်။ နိုင်ငံပေါင်းစုံပါဝင်သော ကိစ္စရပ်များတွင် ဘုံအကျိုးစီးပွားအတွက် ၎င်းတို့အနေဖြင့် ပူးတွဲလုပ်ဆောင်ရန်မှာ အရေးကြီးကြောင်း ၎င်းတို့ကအလေးပေး ပြောဆိုခဲ့သည်။ အားကောင်းသော ကမ္ဘာ့ကုလသမဂ္ဂကြီး   ဖြစ်ပေါ်လာရန်အရေးကြီးကြောင်း နှစ်ဖက်စလုံးက ထပ်လောင်းပြောဆိုခဲ့ပြီး လုံခြုံရေးကောင်စီကို စောစီးစွာ ပြန်လည်ဖွဲ့စည်းဖို့ လိုအပ်ပြီဖြစ်ကြောင်း အလေးပေး ပြောဆိုခဲ့သည်။ လုံခြုံရေးကောင်စီ ပြန်လည်ဖွဲ့စည်းရန်အတွက် အစိုးရပါဝင်သော ညှိုနှိုင်းဆွေးနွေးမှုများကို ထောက်ခံမည်ဖြစ်ကြောင်း ၎င်းတို့က ထပ်မံအတည်ပြုခဲ့သည်။ ပြန်လည်ဖွဲ့စည်းမည့် လုံခြုံရေးကောင်စီထဲ၌ အမြဲတမ်းအဖွဲ့ဝင်အဖြစ် ပါဝင်နိုင်ရန်ကြိုးပမ်းနေသော အိန္ဒိယနိုင်ငံကို ထောက်ခံကြောင်း မြန်မာက ထပ်လောင်း ပြောဆိုခဲ့သည်။

၃၇။ နှစ်ဦးနှစ်ဘက်ပါဝင်သော ဘဏ္ဍာရေးဆိုင်ရာ အဖွဲ့အစည်းများကို ပြန်လည်ထူထောင်ပြီး အားကောင်း အောင်လုပ်ဆောင်သွားဖို့ လိုအပ်ကြောင်းနှင့် နိုင်ငံတကာစီးပွားရေး ဆုံးဖြတ်ချက်များ ချမှတ်ရာတွင် ဖွံ့ဖြိုး တိုးတက်သောနိုင်ငံများ ပူးပေါင်းပါဝင်လာရန်နှင့် သဘောထားအမြင်များ ထုတ်ဖော်ပြောဆိုနိုင်ရေးအတွက် မြှင့်တင်ပေးဖို့လိုအပ်ကြောင်း နှစ်ဖက်စလုံးက မီးမောင်းထိုးပြခဲ့သည်။

၃၈။ အိန္ဒိယနှင့် မြန်မာတို့သည် ဒေသတွင်း၌ အလွန်ကောင်းမွန်သော အိမ်နီးချင်းနိုင်ငံများအဖြစ် နေထိုင်ကြရန် ခိုင်မာစွာ ကတိကဝတ်ပြုခဲ့ကြသည်။ ဒါ့အပြင် အခြေအနေများ တိုးတက်ကောင်းမွန်လာအောင် အတူတကွ ဆက်လက်ပြီး လက်တွဲလုပ်ကိုင်သွားမည်ဖြစ်ကြောင်း အလေးပေးပြောဆိုခဲ့ကြသည်။ ထို့ကြောင့် နှစ်နိုင်ငံမှ ပြည်သူများ၏ အကျိုးကိုမျှဝေပြီး မြှင့်တင်သွားမည်ဟု သဘောတူညီခဲ့ကြသလို တစ်ဖက်နှင့်တစ်ဖက် သဟဇာ တဖြစ်အောင် နေထိုင်ပြီး အပြန်အလှန်မှီခိုကာ နှစ်ဦးနှစ်ဖက်အကျိုးရှိသော ပတ်ဝန်းကျင်တစ်ခုကို ဖန်တီးသွား ရန် သဘာတူခဲ့ကြသည်။

၃၉။ ဝန်ကြီးချုပ်မိုဒီသည် မြန်မာနိုင်ငံ၌ ခေတ္တနေထိုင်နေသည့် အချိန်အတောအတွင်း၌ သူနှင့်သူ၏ ကိုယ်စား လှယ်အဖွဲ့အပေါ် ယဉ်ကျေးပျူငှာပြီး နွေးထွေးဖော်ရွေစွာ ကြိုဆိုခဲ့ကြသည့်အတွက်   မြန်မာသမ္မတကြီးကို   ကျေးဇူးတင်ကြောင်းပြောခဲ့သည်။

၄၀။ ဝန်ကြီးချုပ်မိုဒီသည် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းဆုကြည်အား နှစ်ဦးနှစ်ဖက် အဆင်ပြေ သင့်လျော်သည့်အချိန်၌ အိန္ဒိယနိုင်ငံသို့ လာရောက်လည်ပတ်ရန် ဖိတ်ခေါ်ခဲ့သည်။ မြန်မာနိုင်ငံတော်အတိုင်ပင် ခံ ပုဂ္ဂိုလ်က ထိုဖိတ်ကြားချက်ကို အလွန်ကျေးဇူးတင်ကြောင်း ပြောကြားခဲ့သည်။