ဂီတလောကနှင့် အတန်ကြာအောင် ဝေးကွာနေသော အဆိုတော် Kesha သည် သူမ၏အယ်လ်ဘမ်အသစ် Rainbow ဖြင့် ပရိသတ်များထံသို့ ပြန်လည်ရောက်ရှိလာခဲ့ပြီး ထိုအယ်လ်ဘမ်သည် Billboard အကောင်းဆုံး အယ်လ်ဘမ် ၂၀၀ ဇယား၌ လက်ရှိတွင် ထိပ်ဆုံးမှ ဦးဆောင်လျက် ရှိသည်။
Nielsen SoundScan မှ တနင်္လာနေ့က ထုတ်ပြန်ခဲ့သော အချက်အလက်များအရ အသက် ၃၀အရွယ် Kesha ၏ အယ်လ်ဘမ်အသစ်သည် အချပ်ရေ ၁၁၆၀၀၀ ခန့် ရောင်းချနိုင်ခဲ့သောကြောင့် Witness အယ်လ်ဘမ်ပိုင်ရှင် ကေတီပယ်ရီ ပြီးနောက်တွင်၂၀၁၇ ခုနှစ်၏ ဒုတိယရောင်းအားအကောင်းဆုံး အမျိုးသမီးအဆိုရှင်တစ်ဦး ဖြစ်လာခဲ့သည်။
Billboard အကောင်းဆုံး အယ်လ်ဘမ် ၂၀၀ ဇယားအား ရေတွက်ပုံမှာ အယ်ဘမ်အချပ်လိုက်ရောင်းချရမှုများ၊ သီချင်းတစ်ပုဒ်ချင်းရောင်းချရမှုအကြိမ်ရေ ( သီချင်းဆယ်ပုဒ်မှာ အယ်လ်ဘမ်တစ်ချပ်နှင့်ညီမျှ) ၊ အင်တာနက်မှ သီချင်းနားဆင်မှု အကြိမ်ရေ ( နားဆင်မှုအကြိမ် ၁၅၀၀ မှာ အယ်လ်ဘမ်တစ်ချပ်နှင့်ညီမျှ) တို့အား တွက်ချက်၍ အဆင့်သတ်မှတ်ခြင်း ဖြစ်သည်။
“ကျွန်မအရမ်းကို ပျော်ရွှင်ပြီးတော့ ကံလည်းအရမ်းကောင်းတယ်လို့ ခံစားရပါတယ်။ ပရိသတ်များကို ကျေးဇူး အရမ်းကိုတင်ပါတယ်။ ကျွန်မရဲ့ ခံစားချက်တွေကို ဖွင့်ဟနိုင်ဖို့အတွက် ဂီတကသာ အကောင်းဆုံးအရာတစ်ခု ဖြစ်ခဲ့ပါတယ်” ဟု Kesha က သူမ၏ဖေ့စ်ဘုတ်စာမျက်နှာ၌ တနင်္လာနေ့က ရေးသားခဲ့ကာ သူမ၏ ပရိသတ်များ ကို ကျေးဇူးစကားပြောကြားခဲ့သည်။
