ရန်ကုန်၊ သြဂုတ် ၅ ။ ။ သြဂုတ်လ ၃ရက် နေ့လည်နှစ်နာရီမှ ၄ရက်နေ့ နေ့လည်နှစ်နာရီအထိ ၂၄နာရီအတွင်းH1N1 ပိုးတွေ့လူနာ (၂၂) ဦးတွေ့ရှိခဲ့ပြီး သေဆုံးသူမရှိကြောင်း ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသည်။
ဇူလိုင်လ (၂၁) ရက်နေ့ သြဂုတ်၄ရက် နေ့လည်နှစ်နာနာရီအထိ လတ်တလောပြင်းထန်အသက်ရှူလမ်းကြောင်း ပိုးဝင်ရောဂါဖြင့် ဆေးရုံတက်ရောက်ကုသသူ စုစုပေါင်းလူနာ (၃၃၆) ဦးရှိခဲ့ပြီး ၎င်းတို့ အနက် H1N1 ပိုးတွေ့လူနာစုစုပေါင်း (၁၃၂)ဦးရှိပြီး သေဆုံးသူ စုစုပေါင်း (၁၄)ဦး ရှိကြောင်း ကျန်းမာရေးနှင့်အားကစားဝန်ကြီးဌာန၏ ထုတ်ပြန်ချက်အရ သိရသည်။
လတ်တလောပြင်းထန် အသက်ရှူလမ်းကြောင်းပိုးဝင်ရောဂါဖြင့် ဆေးရုံ တက်ရောက် ကုသသူ(၃၃၆)ဦးတွင် သေဆုံးမှုနှုန်းမှာ (၄.၁၇)ရာခိုင်နှုန်းရှိနေသည်။
အထူးကုဆေးရုံကြီး (ဝေဘာဂီ)တွင် H1N1 ပိုးတွေ့ အတွင်းလူနာ (၂၇)ဦး၊ အခြားတိုင်းဒေသကြီး/ ပြည်နယ်ဆေးရုံကြီးများတွင် H1N1 ပိုးတွေ့သည့် အတွင်းလူနာ(၃၅)ဦး၊ စုစုပေါင်း (၆၂)ဦး ဆက်လက်ကုသမှု ခံယူလျက်ရှိသည်။
ဇူလိုင်လ (၂၁)ရက်မှ သြဂုတ် ၄ရက်အထိ ဆေးရုံတက်ရောက်ကုသရသော H1N1 ပိုးတွေ့အတွင်းလူနာများအနက် ရောဂါပျောက်ကင်း၍ ဆေးရုံဆင်းလူနာ (၄၅)ဦးရှိခဲ့ ကြောင်း ကျန်းမာရေးနှင့်အားကစားဝန်ကြီးဌာနမှ ထုတ်ပြန်ထားသည်။
တိုင်းဒေသကြီး/ ပြည်နယ်များတွင် ကျန်းမာရေးဝန်ထမ်းများနှင့် အရေးပေါ်တုံ့ပြန်ဆောင်ရွက်ရေးအဖွဲ့ (Rapid Response Team) များသည် ဇူလိုင်(၂၄) ရက်မှစ၍ ပိုးတွေ့လူနာများ နေထိုင်ရာ ရပ်ကွက်/ကျေးရွာများသို့ သွားရောက်ပြီး ကျန်းမာရေး ပညာပေးခြင်း၊ ကျန်းမာရေးအခြေအနေကို စစ်ဆေးခြင်း၊ လူနာအိမ်နှင့်အနီးပတ်ဝန်းကျင်အိမ်များတွင် ဖျားနာလူနာများ ရှိ/မရှိ စုံစမ်းထောက်လှမ်းခြင်း တို့ကို ဆောင်ရွက်နေသည်ဟု ကျန်းမာရေးနှင့်အားကစားဝန်ကြီးဌာန၏ ထုတ်ပြန်ချက်အရသိရသည်။