ရခိုင်ပြည်နယ်၊ မောင်တောမြို့နယ် ကိုင်းကြီးကျေးရွာတွင် အကြမ်းဖက်သမားဟုဆိုသူများ၏ တိုက်ခိုက်မှုကြောင့် ရွာသား ခြောက်ဦးသေဆုံးပြီး နှစ်ဦးပျောက်ဆုံးလျက်ရှိကြောင်း နိုင်ငံတော်အတိုင်ပင်ခံရုံးသတင်းထုတ်ပြန်ရေးကော်မတီမှ သတင်းထုတ်ပြန်ထားသည်။
ဖြစ်စဉ်မှာ မောင်တောမြို့နယ် ကိုင်းကြီး(မြို)ရွာ အနောက်ဘက်၌ ယနေ့သြဂုတ်၃ရက် နံနက်၁၀ နာရီခန့်က သေနတ်သံများ ကြားသဖြင့် လုံခြုံရေးတပ်ဖွဲ့ဝင်များမှ နယ်မြေရှင်းလင်းဆောင်ရွက်ခဲ့ရာ ကိုင်းကြီးကျေးရွာသား ကိုင်းကြီး (မြို)ကျေးရွာနေ ကုန်ဝိုင်း(၂၅) နှစ်(ဘ)ဦးစံထွန်း၊ လင်းကြတ်(၂၉)နှစ် (ဘ)မာန်ဒိုင်းတို့ နှစ်ဦးအား မှောက်လျက်အနေအထားဖြင့် သေဆုံးလျက်ရှိသည်ကို စတင်တွေ့ရှိခဲ့သည်။
သို့ဖြစ်၍ ဆက်လက်ရှာဖွေရာ ဦးကိုင်းမွှေး(၂၅)နှစ်(ဘ) ဦးတင်ဝိုင်းနှင့် ဒေါ်ဆိန်ရာ (၃၈)တို့တွင်ပြတ်ရှရာများတွေ့ရှိခဲ့ရသည်။ ဒေါ်ရီ(၂၇)နှစ်နှင့် ဒေါ်ထီးကော် (၂၅)နှစ်တွင် သေနတ်ဒဏ်ရာနှင့် ပြတ်ရှရာများဖြင့် သေဆုံးလျက်ရှိသည်ကို တွေ့ရှိခဲ့သည်။
ကိုင်းကြီးကျေးရွာနေ မြိုတိုင်းရင်းသား ၂ ဦးမှာပျောက်ဆုံးလျက်ရှိပြီး လုံခြုံရေးတပ်ဖွဲ့ဝင်များမှ ဆက်လက် ရှာဖွေလျက်ရှိသည်။
ထို့ကြောင့် ကိုင်းကြီးကျေးရွာနေသူများအား သတ်ဖြတ်သွားသည့် အကြမ်းဖက်သမားဆိုသူများကို လုံခြံုရေးတပ်ဖွဲ့များက ပိတ်ဆို့ရှာဖွေ၊ရှင်းလင်းခြင်းများ ဆောင်ရွက်လျက်ရှိကြောင်း နိုင်ငံတော်အတိုင်ပင်ခံရုံး သတင်းထုတ်ပြန်ရေးကော်မတီမှ သတင်းထုတ်ပြန်ထားသည်။